އުއްމީދީ ބަދަލުތަކަކާއެކު ގައުމީ ވޮލީ ޓީމު އެކުލަވާލައިފި

އުއްމީދީ ބަދަލުތަކަކާއެކު އަންނަ ޑިސެމްބަރު މަހު ބަންގްލަދޭޝްގައި ބާއްވާ ސެންޓްރަލް ޒޯން ވޮލީބޯޅަ މުބާރާތަށް ގައުމީ ފިރިހެން ވޮލީބޯޅަ ޓީމު އެކުލަވާލައިފިއެވެ.

އަންނަ މަހުގެ 21 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް ބަންގްލަދޭޝްގައި ބާއްވާ މުބާރާތާ ގައުމީ ފިރިހެން ވޮލީ ޓީމު ކުރިމަތިލާނީ ތަޖުރިބާކާރު ކޯޗު މުޙައްމަދު ސާޖިދު (ކާއްޓޭ) ގެ އިރުޝާދުގެ ދަށުންނެވެ. މީގެ ކުރިން ދެ ފަހަރެއްގެ މަތިން ހެޑް ކޯޗުގެ މަގާމު ކާއްޓޭ އަދާކޮށްފައިވާއިރު، އޭނާގެ އިރުޝާދުގެ ދަށުން ގައުމީ ޓީމުން މީގެ ކުރިންވެސް ވަނީ ސެންޓްރަލް ޒޯން ވޮލީބޯޅަ މުބާރާތުގައި ވާދަކޮށްފައެވެ.

މި މުބާރާތަށް ތައްޔާރުވާން 21 ކުޅުންތެރިންގެ ސްކޮޑަކާއެކު ގައުމީ ޓީމުން އެންމެ ފުރަތަމަ ފަރިތަކުރުންތައް ފެށިއިރު، ބުދަ ދުވަހު ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ވަނީ 15 ކުޅުންތެރިންގެ ސްކޮޑެއް ފައިނަލް ކޮށްފައެވެ. މި ސްކޮޑުގައި ޒުވާން ތިން ކުޅުންތެރިއަކު ހިމެނިއިރު، އެ ތިން ކުޅުންތެރިންނަކީ އުމުރުން 17 އަހަރުގެ މާއިޝް އަޙްމަދާއި، އުމުރުން 19 އަހަރުގެ އަޙްމަދު ނާފިއު އަދި އުމުރުން 20 އަހަރުގެ ޝާމިލް މުޙައްމަދެވެ. މި ތިން ކުޅުންތެރިންނަކީވެސް ގައުމީ ސްކޮޑުގައި މުޅިން އަލަށް ހިމެނުނު ތިން ކުޅުންތެރިންނެވެ.

ކާއްޓޭގެ އިރުޝާދުގެ ދަށުން ގައުމީ ސްކޮޑު ފައިނަލްކުރިއިރު، ވީއޭއެމުގެ ޓެކްނިކަލް ކޮމިޓީން މީގެ ކުރިން ވަނީ ގައުމީ ޓީމުތަކަށް ކުޅުންތެރިން ނެގުމުގައި އުސޫލުތަކެއް ކަނޑައަޅާފައެވެ. އެގޮތުން މުބާރާތުގައި ވާދަކުރާ ސްކޮޑުގައި 23 އަހަރުން ދަށުގެ ގައުމީ ޓީމުގެ ދެ ކުޅުންތެރިން ހިމެނުމަށް ވަނީ ހަމަޖެހިފައެވެ.

މީގެ ކުރިން ދިން އިންޓަވިއުއެއްގައި ކާއްޓޭ ބުނީ މުބާރާތަށް ސްކޮޑް ފައިނަލް ކުރާއިރު ވީއޭއެމުން ކަނޑައަޅާފައިވާ އުސޫލުތަކެއް ބަލާނެ ކަމަށާއި، އެގޮތުން ޓީމަށް ކުޅުންތެރިން ނެގުމުގައި ހާޒިރީއަށް ބެލުމަށްވެސް ހަމަޖެހިފައިވާ ކަމަށެވެ. އަދި މި ޓީމުގެ ޒުވާން ދެ ކުޅުންތެރިއަކު ހިމަނަން ހަމަޖެހިފައިވާތީ، އެއީ ސީނިއާ ކުޅުންތެރިންނަށްވެސް އޮތް ޗެލެންޖެއްކަމަށްވެސް ކާއްޓޭ ވަނީ ބުނެފައެވެ.

ސެންޓްރަލް ޒޯން މުބާރާތަށް 12 ކުޅުންތެރިންގެ ސްކޮޑެއް ދާއިރު، މުބާރާތަށް ތައްޔާރުވާން ބަހްރޭނުގައި ކުރާ ކޭމްޕުގައި ބައިވެރިވާނީ މި ފަހަރު އެކުލަވާލި 15 ކުޅުންތެރިންގެ ސްކޮޑެވެ. އެހެންކަމުން މިހާރު އެކުލަވާލި ސްކޮޑުން އަދި ތިން ކުޅުންތެރިއަކު ބާކީވާނެއެވެ. ސެންޓްރޯލް ޒޯނުގެ ކުރިން ބަހްރޭނުގައި ރާއްޖޭގެ ވޮލީބޯޅަ ޓީމުތައް ކޭމްޕުކުރާއިރު، މިއީ ދާދި ފަހުން ރާއްޖޭގެ ކުޅިވަރާ ބެހޭ ވަޒީރު އަޙްމަދު މަޚްލޫފް ބަހްރޭނަށް ކުރެއްވި ރަސްމީ ދަތުރުފުޅުގެ ތެރެއިން ލިބުނު ފުރުސަތެކެވެ.

އަންނަ މަހު ސެންޓްރަލް ޒޯން ވޮލީބޯޅަ މުބާރާތް ބަންގާޅުގައި ބާއްވާއިރު، މި މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. މީގެ ކުރިން މި އަހަރުގެ ސެންޓްރަލް ޒޯން ފިރިހެން ވޮލީބޯޅަ މުބާރާތްތައް ތިން ބަޔަކަށް ބަހާލައިގެން ކުރިއަށްގެންދަން ހަމަޖެހިފައި އޮތްއިރު، ރާއްޖެ ވާދަކުރަން އޮތީ ދެކުނު އޭޝިއާގެ މުބާރާތުގައެވެ. އެކަމަކު އެ ތިން މުބާރާތުގެ ބަދަލުގައި އެއް މުބާރާތް ބާއްވަން ނިންމުމާއެކު، މި ފަހަރުގެ މުބާރާތުގައި ލަންކާ އާއި އުޒްބެކިސްތާން ފަދަ ވަރުގަދަ ގައުމުތަކާ ދެކޮޅަށް ރާއްޖެ ކުޅެން ޖެހޭނެއެވެ.

މީގެ އިތުރުން އަންނަ މަހު ސެންޓްރަލް ޒޯނުގެ އަންހެން ވޮލީބޯޅަ މުބާރާތްވެސް ބަންގާޅުގައި ބާއްވާއިރު، އެ މުބާރާތުގައި ވާދަކުރާ ގައުމުތަކަކީ ރާއްޖެ އާއި، ކިރްގިސްތާނާއި، ނޭޕާލް އުޒްބެކިސްތާން އަދި ބަންގްލަދޭޝެވެ.  އެ މުބާރާތާ ގައުމީ އަންހެން ވޮލީ ޓީމު ކުރިމަތިލާނީ މުމްތާޒް އަލީ (މުންތޭ) ގެ އިރުޝާދުގެ ދަށުންނެވެ.