ފުލުހުންގެ ލޯންޗުގައި ރޯކޮށްލި މައްސަލައިގެ ދައުވާލިބޭ ފަރާތަކަށް ޗިޓް ލިބިފައިނުވާތީ އަޑުއެހުން ކެންސަލް
މި މައްސަލައިގައި 2 މީހަކަށް ދައުވާކުރޭ
ފުލުހުންގެ ލޯންޗު ރޯކޮށްލި މައްސަލައިގައި ދައުވާ އުފުލާފައިވާ ލ. ގަން، ތުނޑި، ލަވްސައިޑް ޢަބްދުއްލަޠީފް އާއި ލ. ކަޅައިދޫ ފިނިހިޔާގެ މޫސާ އިނާސް
މޯލްޑިވްސް ޕޮލިސް ސަރވިސްގެ ލޯންޗެއްގައި ގަސްދުގައި ރޯކޮށްލި މައްސަލައިގައި ދައުވާތައް އުފުލި ދެ މީހުންގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ތާވަލު ކުރުމަށްފަހު ކެންސަލް ކޮށްފިއެވެ.
މި މައްސަލައިގެ އަޑުއެހުން ތާވަލުކޮށްފައި އޮތީ ބުދަ ދުވަހުގެ ހެނދުނު 10:00 އަށެވެ. އެހެންނަމަވެސް، އަޑުއެހުން ކެންސަލް ކޮށްފައިވަނީ ވާރޗުއަލްކޮށް ޝަރީއަތް ކުރިއަށް ގެންދިއުމަށް މާފުށީ ޖަލުން ރޫމެއް ނުލިބުމުގެ ސަބަބުންނާއި، ދައުވާލިބޭ އެއް ފަރާތަށް ޗިޓް ރައްދުވެފައި ނުވާތީ ކަމަށް ކްރިމިނަލް ކޯޓުން މައުލޫމާތު ދެއެވެ.
މި މައްސަލައިގައި ދައުވާ އުފުލާފައި ވަނީ، ލ. ގަން، ތުނޑި، ލަވްސައިޑް ޢަބްދުއްލަޠީފް އާއި ލ. ކަޅައިދޫ ފިނިހިޔާގެ މޫސާ އިނާސްގެ މައްޗަށެެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ސަފްވަތު ޙަބީބެވެ. މި މައްސަލައިގައި އެންމެ ފަހުން ބޭއްވި އަޑުއެހުމުގައި އޮތީ ޝަރީއަތުގެ ކުރިން ހުށަހަޅާ ހުށަހެޅުންތަކަށް ވާހަކަ ދެއްކުމެވެ. ނަމަވެސް މި އަޑުއެހުމުގައި ދިފާއީ ވަކީލު ވަނީ ބައެއް ލިއެކިއުންތައް ނުލިބޭ ކަމުގެ ޝަކުވާ ކުރައްވާފައެވެ.
އަދި ދައުލަތުން ވެސް ވަނީ ދިފާއީ ވަކީލު ހުށަހަޅުއްވާފައިވާ މެއިލް ލިބިފައިވާކަން ކަށަވަރު ކުރުމަށް ވަގުތު ބޭނުންވާކަން ފާހަގަކުރައްވައި، ޓެރަރިޒަމްގެ ޢަމަލެއް ހިންގުމުގެ ކުށުގެ ދަޢުވާގެ ޝަރީއަތުގެ ކުރިން ހުށަހަޅާ ހުށަހެޅުންތަކަށް ގޮތެއް ނިންމެވުމުގެ ބައި ކުރިއަށް ގެންދިއުމަށް އެދިވަޑައިގެންފައެވެ. ނަމަވެސް ދިފާއީ ވަކީލު ވަނީ ދެ ދައުވާގެ ހުށަހެޅުންތަކަށް އެއް މަޖިލީހެއްގައި ބަހުސްކުރުމަށް ބޭނުންވާކަން ފާހަގަކުރައްވާފައެވެ.
އެކަމާ ގުޅޭގޮތުން މައްސަލަ ބައްލަވާ ގާޒީ ސަފްވަތު ޙަބީބު ވިދާޅުވީ، ދިފާއުން ހުށަހަޅާފައިވާ 3 ހުށަހެޅުން ލިބުމުން، އެ ހުށަހެޅުންތައް ދިރާސާ ކުރުމަށް ދައުލަތަށް ވެސް ވަގުތު ބޭނުންވާނެ ކަމަށެވެ.
ގާޒީ ވަނީ ދެން އޮންނަ އަޑުއެހުމެއްގައި ދެފަރާތުން ހުށަހެޅުންތަކަށް ވާހަކަ ދެއްކުމުގެ ބައި ކުރިއަށް ގެންދަވާނެކަން ފާހަގަ ކުރައްވައި، ދެފަރާތަށް ލިއުމުން ހުށައެޅުންތައް ހުށަހެޅުމަށް ބޭނުންވާނަަަމަ އެ ފުރުސަތު ދެއްވާފައެވެ. އަދި އެއާއެކު އެ އަޑުއެހުން ވަނީ ކުރުކޮށްލައްވާފައެވެ.
ލ. ގަން، ތުނޑި ބަނދަރު ސަރަހައްދުގައި އޮތް ފުލުހުންގެ ލޯންޗުގައި އަލިފާން ރޯކޮށްލާފައިވަނީ 22 މާރޗު 2020 ދުވަހުއެވެ.
