ޗެލްސީ އާއި ޔުނައިޓެޑް ދެވަނަ ބުރަށް

ޔުއެފާ ޗެމްޕިއަންސް ލީގުގެ ދެވަނަ ބުރުގެ ޖާގައެއް އެންމެ ފަހުގެ ޗެމްޕިއަން ޗެލްސީ އާއި މެންޗެސްޓާ ޔުނައިޓެޑް ހޯދައިފިއެވެ.

ގަދަ 16 ގެ ޖާގައެއް ޗެލްސީން ހޯދީ އަންގާރަ ދުވަހުގެރޭ ކުޅުނު މެޗުން ޔުވެންޓަސް އަތުން 4-0 ގެ ނަތީޖާއަކުން މޮޅުވެގެންނެވެ.

އަމިއްލަ ދަނޑުގައި ކުޅުނު މި މެޗުގައި ޗެލްސީން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 25 ވަނަ މިނެޓުގައި އެންޓޯނިއޯ ރޫޑިގާ ދިން ބޯޅައަކުންމި ލަނޑު އެ ޓީމަށް ކާމިޔާބުކޮށްދިނީ ޓްރެވޯ ޗަލޯބާއެވެ. އަދި ދެވަނަ ހާފު ފަށައިގެން 10 ވަނަ މިނެޓުގައި ރީސް ޖޭމްސް ވަނީ ލަނޑެއް ޖަހައި، ޗެލްސީގެ ލީޑު ފުޅާކޮށްދީފައެވެ.

އަދި އޭގެ ތިން މިނެޓު ފަހުން ރުބެން ލޮފްޓަސް-ޗީކް ތަނަވަސްކޮށްދިން ފުރުސަތަކުން ޗެލްސީގެ ތިންވަނަ ލަނޑު ކާމިޔާބުކޮށްދިނީ ކަލުމް ހަޑްސަން-އޮޑޯއި އެވެ. އޭގެ ފަހުންވެސް މި މެޗުގައި ޗެލްސީން ގިނަ ހަމަލާތަކެއް އުފެއްދިއިރު، އެ ޓީމުން ހަތަރުވަނަ ލަނޑު ޖަހާފައިވަނީ މެޗުގެ އިތުރު ވަގުތުގައެވެ. މި ލަނޑު އެ ޓީމަށް ކާމިޔާބުކޮށްދިނީ އަނިޔާއިން ރަނގަޅުވެ ދާދި ފަހުން ކުޅުމުގެ ތެރެއަށް އެނބުރި އައި ޓިމޯ ވާނާއެވެ.

މި މޮޅާއެކު ގަދަ 16 ގެ ޖާގައެއް ޗެލްސީން ހޯދިއިރު، ގްރޫޕް އެޗްގެ އެއްވަނައަށް އެ ޓީމު ޖެހިލީ ކުޅުނު ފަސް މެޗުން ލިބުނު 12 ޕޮއިންޓާއެކުއެވެ. ދެވަނައިގައި އޮތް ޔުވެންޓަސްއަށްވެސް ފަސް މެޗުން 12 ޕޮއިންޓް ލިބިފައިވާއިރު، އެ ޓީމުން މީގެ ކުރިން ވަނީ ދެވަނަ ބުރުގެ ޖާގައެއް ކަށަވަރުކޮށްފައެވެ.

މީގެ އިތުރުން ޗެމްޕިއަންސް ލީގުގައި ގަދަ 16 ގެ ޖާގައެއް ޔުނައިޓެޑުން ހޯދީ އަންގާރަ ދުވަހުގެރޭ ކުޅުނު މެޗުން ވިޔަރެއާލް އަތުން 2-0 ގެ ނަތީޖާއަކުން މޮޅުވެގެންނެވެ.

މި މެޗަކީ ޔުނައިޓެޑުގެ ކޯޗުގެ މަގާމުން އޮލެ ގުނަ ސޯލްޝެއާ ވަކިކުރުމަށްފަހު އެ ޓީމުން ކުޅުނު ފުރަތަމަ މެޗެވެ. އެއާއެކު ވިޔަރެއާލް ދަނޑުގައި ކުޅުނު މެޗުގައި ޔުނައިޓެޑަށް އިރުޝާދުދީފައިވަނީ ވަގުތީ ކޯޗު މައިިކަލް ކެރިކެވެ. ކެރިކް މީގެ ކުރިން ހުރީ ސޯލްޝެއާގެ އެސިސްޓަންޓް ކޯޗެއްގެ ގޮތުގައެވެ.

އަންގާރަ ދުވަހުގެރޭ ކުޅުނު މެޗުގައި ޔުނައިޓެޑުން ރަނގަޅު ކުޅުމެއް ދެއްކިއިރު، އެ ޓީމުން ލީޑުު ނަގާފައިވަނީ މެޗުގެ 78 ވަނަ މިނެޓުގައެވެ. ވިޔަރެއާލުގެ ފަހަތުން ހެދި ގޯހެއްގެ ފައިދާނަގައި މި ލަނޑު ޔުނައިޓެޑަށް ޖަހައިދިނީ އިތުބާރު ފޯވާޑް ކްރިސްޓިއާނޯ ރޮނާލްޑޯއެވެ. އަދި މެޗުގެ ފަހު މިނެޓުގައި ޖޭޑަން ސަންޗޯ ވަނީ ޔުނައިޓެޑަށް ލީޑު ފުޅާކޮށްދީފައެވެ. މިއީ މި އަހަރުގެ ހޫނު މޫސުމުގައި ޔުނައިޓެޑަށް ބަދަލުވުމަށްފަހު ސަންޗޯ އެ ޓީމަށް ކާމިޔާބުކޮށްދިން ފުރަތަމަ ލަނޑެވެ.

މި މޮޅާއެކު ގަދަ 16 ގެ ޖާގައެއް ޔުނައިޓެޑުން ކަށަވަރުކުރީ ބާކީ މެޗެއް އޮއްވައެވެ. އެގޮތުން ގްރޫޕް އެފްގެ އެއްވަނައިގައި ޔުނައިޓެޑް އޮތީ ފަސް މެޗުން 10 ޕޮއިންޓް ހޯދައިގެންނެވެ. ދެވަނައިގައި އޮތް ވިޔަރެއާލަށް ފަސް މެޗުން ހަތް ޕޮއިންޓް ލިބިފައިވާއިރު، ތިންވަނައިގައި އެޓަލާންޓާ އޮތީ ފަސް މެޗުން ހަ ޕޮއިންޓާއެކުއެވެ. އަދި ފުލުގައި އޮތް ޔަންގް ބޯއީސްއަށް ފަސް މެޗުން ވަނީ ހަތަރު ޕޮއިންޓް ލިބިފައެވެ.