އަލަށް އުފަންފާ ކުދިންނަށް އެސްޓީއޯގެ ހަދިޔާއެއް

އަލަށް އުފަންވާ ކުދިންނަށް ހަދިޔާދޭ ޕްރޮމޯޝަނެއް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ފަށައިފިއެވެ.

މި ޕްރޮމޯޝަންގެ ދަށުން ހަދިޔާ ލިބޭނީ ޓްރީޓޮޕް ހޮސްޕިޓަލުގައި އަލަށް އުފަންވާ ކުދިންނަށް އެކަންޏެވެ.

"ފަޚުރުވެރި އާއިލާ"ގެ ނަމުގައި އެސްޓީއޯއިން ފަށާފައިވާ މި ޕްރޮމޯޝަންގެ ދަށުންދޭ ގިފްޓް ހޭމްޕާ ތެރޭގައި އަލަށް އުފަންވާ ދަރިފުޅުގެ އިތުރުން މައިމީހާއަށް ބޭނުންވާ ސާމާނު ހުންނާނެ ކަމަށް އެސްޓީއޯއިން މައުލޫމާތުދެއެވެ.

މީގެ ތެރޭގައި ދުނިޔޭގެ އިތުރުން ރާއްޖޭގައިވެސް ނަންހިނގާ މަޝްހޫރު ބްރޭންޑުތަކުގެ ސާމާނު ހިމެނެއެވެ. އެގޮތުން ހަގީސް ބްރޭންޑުގެ ނެޕީ، ވޮންޑަ ޕޭންޓްސް އާއި ޕިއުރިޓީ ބްރޭންޑުގެ ލޯޝަނާއި ޝޭމްޕޫގެ އިތުރުން ފެންވަރުވާ ސާމާނު ހިމެނެއެވެ. އަދި އެސްޓީއޯއިން ވިއްކާ ކުޑަކުދިންނަށް ޚާއްސަ އުފެއްދުންތައް ވެސް މި ގިފްޓް ހޭމްޕާގައި ހިމެނެއެވެ.

މި ޕްރޮމޯޝަން ކުރިއަށް ދާނީ އެއް އަހަރު ދުވަހުގެ މުއްދަކަށެވެ.