6 ދުވަހުގެ ރަސްމީ ދަތުރުފުޅެއްގައި ޑިފެންސް މިނިސްޓަރ މާރިޔާ އިންޑިޔާއަށް ވަޑައިގެންފި

6 ދުވަހުގެ ރަސްމީ ދަތުރުފުޅެއްގައި ޑިފެންސް މިނިސްޓަރ މާރިޔާ އަހުމަދު ދީދީ އިންޑިއާއަށް ވަޑައިގެންފިއެވެ.

އަންގާރަ ދުވަހު މިނިސްޓަރ މާރިޔާ ކޮޗިންއަށް ވަޑައިގެންފައިވާއިރު، މިނިސްޓަރަށް މަރުހަބާ ދަންނަވާފައިވަނީ އެ ގައުމުގެ އަސްކަރިއްޔާގެ ރިއާ އެޑްމިރަލް ޓީވީއެން ޕްރަސާނާއެވެ.

މިނިސްޓަރގެ މިދަތުރުފުޅާ ގުޅޭގޮތުން، ރާއްޖޭގައި ހުންނަ އިންޑިޔާގެ ހައި ކޮމިޝަނުން ކޮށްފައިވާ ޓްވީޓެއްގައި ބުނެފައިވަނީ، މިދަތުރުފުޅުގައި މިނިސްޓަރ އިންޑިއާގެ ނޭވަލް އެކަޑަމީން ބާއްވާ ޕާސިންގ އައުޓް ޕެރޭޑް ޝަރަފްވެރި ކޮށްދެއްވާނެ ކަމަށެވެ. މިއާއެކު އެ ޕެރޭޑު ޝަރަފުވެރި ކޮށްދެއްވާ ބޭރުގެ ފުރަތަމަ ޑިފެންސް މިނިސްޓަރަށް މިނިސްޓަރ މާރިޔާ ވެވަޑައިގަންނަވާނެއެވެ.

މީގެއިތުރުން، އިންޑިއާގެ ޑިފެންސްގެ ޓްރެއިނިންގ ފެސިލިޓީތަކަށް ޒިޔާރަތްކުރައްވައި، އެ ގައުމުގައި ޓްރެއިނިން ހަދަމުންދާ އެމްއެންޑީއެފްގެ އޮފިސަރުންނާ އެކަމަނާ ބައްދަލު ކުރެއްވުމަށް ވަނީ ހަމަޖެހިފައެވެ.

އިންޑިއާއަށް ވަޑައިގެންނެވުމުގެ ކުރިން މިނިސްޓަރ ވަނީ، އިންޑިއާއިން ރާއްޖެއަށް އަލަށް ކަނޑައެޅުއްވި ސަފީރު މުނޫ މަހާވަރުއާ ބައްދަލު ކުރައްވާފައެވެ.

ވަޒީރުކަމާ ހަވާލުވެވަޑައިގެންނެވި ފަހުން އެކަމަނާ ވަނީ 2019 ވަނަ އަހަރުވެސް އިންޑިއާއަށް ވަޑައިގެންފައެވެ.

އެދަތުރުފުޅުގައި އެގައުމުގެ ޑިފެންސް މިނިސްޓަރާ މަޝްވަރާ ބައްދަލުވުމެއް ބާއްވައި، ރާއްޖެއާއި އިންޑިއާއާ ދެމެދު އޮންނަ އަސްކަރީ ގުޅުމުގެ ތެރެއިން، ރާއްޖޭގައި ހަރުކުރުމަށް އިންޑިއާ ސަރުކާރުން ހުށަހަޅާފައިވާ ކޯސްޓަލް ރާޑަރ ސަވައިލަންސް ސިސްޓަމް (ސީއެސްއާރުއެސް) ހަރުކުރުމާ ގުޅޭ ގޮތުން މަޝްވަރާ ކުރައްވާފައިވެއެވެ.