ދަތުރުކުރާއިރު ބޫސްޓަރ ޑޯޒް ޖެހުމަށް ޝަރުތުކުރުމާމެދު އީޔޫއިން މަޝްވަރާތައް ފަށައިފި

ކޮވިޑް-19އިން ދިފާއުވުމަށް ޖަހާ ވެކްސިންގެ އަސަރު ހުންނަނީ ކިހާ މުއްދަތަކަށްތޯއާއި, ޔޫރަޕްގެ ތެރޭގައި ދަތުރުކުރާއިރު ބޫސްޓަރ ޑޯޒް ޖަހާފައި ހުރުމަށް ޝަރުތުކުރުމާމެދު ޔޫރަޕިއަން ޔޫނިއަން (އީޔޫ)ގެ ގައުމުތަކުން މަޝްވަރާތައް ފަށައިފިއެވެ.

މިހާރު ޔޫރަޕްގެ ތެރޭގައި, ދެ ޑޯޒް ޖަހާފައިވާ މީހުންނަށް ކަރަންޓީނަކާނުލާ ދަތުރުކުރެވޭއިރު, ކުރިޔަށް އޮތްތަނުގައި މިކަން މިގޮތުގައި ދެމެހެއްޓުމަށް ބޫސްޓަރ ޑޯޒް ޖަހަންޖެހޭތޯ މިމަޝްވަރާތަކުގައި ކަނޑައެޅިގެންދާނެއެވެ. އެގްޒެކެޓިވް ޔޫރަޕިއަން ކޮމިޝަނުން މިހަފްތާތެރޭގައި ކޮވިޑް-19 ފާސް ބޭނުންކޮށްގެން ޔޫރަޕްގެ ތެރޭގައި ދަތުރުކުރުމާ ގުޅޭގޮތުން ޕްރޮޕޯސަލްއެއް ހުށަހެޅުމަށް ވަނީ ހަމަޖެހިފައެވެ. ޔޫރަޕަށް މިވަގުތު ކޮވިޑްގެ އައު ސަރޖެއް ވަނީ ކުރިމަތިވެފައެވެ.

އީޔޫއިން ކަނޑައަޅާފައިވާ ފާހުގައި ވަނީ، ވެކްސިންގެ ދެ ޑޯޒް ފުރިހަމަކުރުމާއި ފަހުގެ ތާރީޚެއްގައި ހަދާފައިވާ ނެގެޓިވް ޕީސީއާރް ޓެސްޓް ނުވަތަ ފަހުގެ ތާރީޚެއްގައި ކޮވިޑް ޖެހި ރަނގަޅުވެފައިވާ މީހުންނަށް ޔޫރަޕްގެ ތެރޭގައި ދަތުރުކުރުމުގައި ލުއިތަކެއް ދިނުމަށެވެ.

މިފާހަކީ މޯބައިލުން ބަލާލެވޭގޮތަށް، ކޮންމެ ގައުމަކުން ވަކިވަކިން އުފައްދާފައިވާ ފާހެކެވެ. މިފާސް ބަލައިގަންނާނީ ހަމައެކަނި އީޔޫގައެވެ. މިފާސް މިހާރު އަންނަނީ އީޔޫގެ އެކި ގައުމުތަކުގެ އިންޑޯރގެ އެކި ކަންކަމުގައިވެސް ބޭނުންކުރަމުންނެވެ. އެގޮތުން ރެސްޓޯރެންޓްތަކާއި ބާރތަކާއި ތިއޭޓަރުތަކަށް ވަނުމުގައި މިފާހުގެ ބޭނުން އަންނަނީ ކުރަމުންނެވެ.

ޔޫރަޕްގެ ހުރިހާ ގައުމުތަކަކަށް އެއްބަސްވެވޭ ގޮތަށް، އީޔޫ ޑިޖިޓަލް ކޮވިޑް ފާސް ބޭނުންކުރަމުން ދިޔުމަށް ގައުމުތަކުން ވަނީ އެދިފައެވެ. އަދި ސައިންސުން ފެންނަ ހެކިތަކާއެކު، ފާހަށް ބަދަލުތަކެއް ގެނައުމަށް ގައުމުތަކުން ވަނީ ވާހަކަދައްކާފައެވެ.