މާތްވެގެންވާ އިސްލާމް ދީނާއި، ދިވެހި ގައުމާއި، ރައްޔިތުންގެ ދިފާއުގައި ސިފައިން ނުކުރާނެ އެއްވެސް ކަމެއް ނޯންނާނެކަމަށް ވައިސް ޗީފް އޮފް ޑިފެންސް ފޯރސް ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފް ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ ސަރުކާރަށް 3 އަހަރު ފުރުމާއި ގުޅިގެން ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ކުރި ސުވާލަކަށް ޖަވާބު ދެއްވަމުންނެވެ. އެގޮތުން ސިފައިންނަކީ އަބަދުވެސް ގައުމަށް ދިމާވާ ކޮންމެ ކަމެއްގައި އެންމެ އިސް ސަފުގައި ނުކުމެ މަސައްކަތް ކުރަމުންދާ ބައެއްކަން ފާހަގަ ކުރައްވައި ވައިސް ޗީފް ވިދާޅުވީ، ސިފައިން ތިބެނީ އަބަދުވެސް، ގައުމަށް ދިމާވާ ކޮންމެ ކަމެއްގައިވެސް އެންމެ ގާތުން ރައްޔިތުންނަށް ޚިދުމަތް ފޯރުކޮށްދިނުމަށް ތައްޔާރަށް ކަމަށެވެ. އެގޮތުން ރާއްޖޭގެ ތަފާތު 4 ސަރަހައްދެއްގައި އެމްއެންޑީއެފްގެ މަރުކަޒުތައް ގާއިމުކޮށްގެން ހަރަކާތްތެރިވަމުންދާ ކަމަށް ވިދާޅުވިއެވެ. އެ މަރުކަޒުތަކުގެ ދަށުންވެސް އެމްއެންޑީއެފްގެ އިތުރު ޕޯސްޓުތައް ހިންގަމުންދާކަން ފާހަގަ ކުރެއްވިއެވެ.
އޭގެ އިތުރުން، ކޮވިޑުގެ ހާލަތުގައިވެސް ސިފައިންގެ ކޮންމެ އޮފިސަރެއްވެސް މަސައްކަތް ކޮށްފައިވާނީ ރައްޔިތުންގެ ހައްގުގައިކަމަށް ވައިސް ޗީފް ވިދާޅުވިއެވެ.
އެމްއެންޑީއެފްގެ ކޮންމެ އޮފިސަރަކީވެސް ހުވައެއްގެ މަތީގައި ތިބޭ ބައެއްކަން ފާހަގަ ކުރައްވައި ވައިސް ޗީފް ވިދާޅުވީ، އިސްލާމް ދީނާއި ގައުމު ދިފާއު ކުރުމުގައި ފުރާނައިން ގުރުބާންވާން ކޮންމެ ސިފައިންގެ އޮފިސަރެއްވެސް ހުންނާނީ ތައްޔާރަށް ކަމަށެވެ. އަދި އިސްލާމް ދީނާއި، ގައުމާއި ރައްޔިތުންގެ ދިފާއުގައި ސިފައިން ނުކުރާނެ އެއްވެސް ކަމެއް ނޯންނާނެ ކަމުގެ ޔަގީންކަން ވައިސް ޗީފް ދެއްވިއެވެ.
އަޅުގަނޑުމެންގެ އެއްވެސް މީހަކު، މި ޤައުމުގެ އެންމެ ތަންކޮޅެއްވެސް ބޭރުގެ ބައެއްގެ އަޅުވެތިކަމަށް ދިއުމަށްޓަކައި ފުރުސަތެއް ނުދޭނެ، މާތްވެގެންވާ އިސްލާމް ދީނާއި، ދިވެހި ޤައުމާއި، ރައްޔިތުންގެ ދިފާއުގައި އެންމެ ފަހު މީހާއާ ޖެހެންދެންވެސް ކުރަންޖެހުނު ކޮންމެ ކަމެއް ކުރުމަށްޓަކައި އަބަދުވެސް ސިފައިން ތިބޭނީ ތައްޔާރަށް، އެކަމުގައި ސިފައިން ދެމިތިބޭނެ.ވައިސް ޗީފް އޮފް ޑިފެންސް ފޯރސް ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފް
ވައިސް ޗީފް ވަނީ ރައްޔިތުންގެ މުދަލާއި، ރައްޔިތުންގެ ފުރާނަ ރައްކާތެރިކުރުމަށް ކުރެވެން ހުރި ކޮންމެ ކަމެއް ކުރުމަށްޓަކައި ކޮންމެ ސިފައިންގެ މީހަކުވެސް ދެމިތިބޭނެ ކަމުގެ ޔަގީންކަން ދިވެހި ސިފައިންގެ ލީޑަރޝިޕްގެ ނަމުގައި ރާއްޖޭގެ ރައްޔިތުންނަށް ދެއްވާފައެވެ.
ދިވެހި ސިފައިންގެ ޚިދުމަތުގެ ކޮންމެ ދުވަހެއް ފެށި ނިމިގެން ދަނީ ގައުމުގެ ހައްގުގައި ކުރާން އޮތް މަސައްކަތުގައި ދެމިތިބެ ކަމަށް، ސިފައިންގެ އެންމެ މަތީވެރިޔާ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުވެސް ވަނީ ވިދާޅުވެފައެވެ.
ސިފައިންގެ ޚިދުމަތް ދިވެހިރާއްޖޭގައި ފަށާފައިވަނީ މީލާދީން 1892 ވަނަ އަހަރު އޭޕްރިލް މަހުގެ 21 ވަނަ ދުވަހުގައެވެ. އެއަށްފަހު މިހާތަނަށް ދިވެހި ސިފައިން ވަނީ އެކި ރޮނގު ރޮނގުން ބޮޑެތި ކުރިއެރުންތަކެއް ހޯދައި، ރައްޔިތުންނަށް ދިމާވި ކޮންމެ ކަމެއްގައި އެންމެ އިސް ސަފުގައި މަސައްކަތް ކޮށްފައެވެ.
