މަތީ ތައުލީމުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ކުރެވޭ: ޑރ ހަންނާނު
ކޯސްތައް ހިންގުމަށް ދެވޭ މުއްދަތު ކަނޑައެޅުމުގެ މަސައްކަތް ދަނީ ކުރިއަށް
މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ ޑރ އަބްދުލް ހަންނާން ވަހީދު
ދިވެހިރާއްޖޭގައި މަތީ ތައުލީމު ދިނުމަށް ހިންގާ ކޯސްތަކުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ކުރަމުން އަންނަ ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ ޑރ އަބްދުލް ހަންނާން ވަހީދު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން ޑރ ހަންނާނު ވިދާޅުވީ މަތީ ތައުލީމު ދިނުމަށްޓަކައި ހިންގޭ ކޯސްތަކުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. ނަމަވެސް މިހާރު ކުރަމުން އަންނަ މަސައްކަތުގެ އިތުރަށް ކުރަން ޖެހޭ ބައިވަރު މަސައްކަތްތަކެއް އެބަހުރި ކަމަށް ވިދާޅުވިއެވެ.
ކޯސްތަކުގެ ފެންވަރު ހިފެހެއްޓުމަށް އެމްކިއުއޭއިން މިހާރު ކުރަމުން އަންނަ މަސައްކަތްތަކުގެ ތެރޭގައި، އެމްކިއުއޭގެ ހުއްދަ ލިބިގެން ނޫން ގޮތަކަށް މަތީ ސާނަވީގެ އެއްވެސް ކޯހެއް ކުރިއަށް ނުގެންދެވޭ ގޮތަށް ހަމަޖައްސާފައިވާ ކަމަށް ޑރ ހަންނާން ވިދާޅުވިއެވެ. މި ހުއްދަ ލިބޭނީ މިނިސްޓްރީ އޮފް ހަޔަރ އެޑިޔުކޭޝަނުގައި ރަޖިސްޓަރީ ވެފައި ހުންނަ ފަރާތްތަކަށް އެކަންޏެވެ. ޑރ ހަންނާން ވިދާޅުވީ އެމްކިއުއޭގެ ހުއްދަ ނުހޯދައި އެއްވެސް ކޯހެއް ކުރިއަށް ނުގެންދެވޭ ގޮތަށް އޮތުމަކީ ކޯސްތަކުގެ ފެންވަރު ރަނގަޅު ކުރުމަށް ކުރެވޭ އެންމެ މުުހިންމު ކަންތައް ކަމަށެވެ.
ކޯސްތައް ހިންގުމަށް އެމްކިއުއޭގެ ހުއްދަ ކޮންމެހެން ބޭނުންވި ނަމަވެސް ކޯސްތައް ކުރިއަށް ގެންދާގޮތް ރަނގަޅަށް ބެލޭނެ ނިޒާމެއް މިހާތަނަށް ހަމަޖެއްސިފައެއް ނެތެވެ. މިހާރު އޮތް ނިޒާމުގެ ތެރެއިން ކޯސްތައް ހިންގުމުގެ ފެންވަރާއި، ކިޔަވައިދިނުމުގެ ފެންވަރުގެ އިތުރުން ދަރިވަރުން އިމްތިހާނު ކުރެވޭ ފެންވަރު އެމްކިއުއޭއަށް ވަޒަންކުރެވެނީ ކޯސް ހިންގާ ފަރާތްތަކުންދޭ މައުލޫމާތުން އެކަންޏެވެ. ޑރ ހަންނާން ވިދާޅުވީ މިކަންތައް ރަނގަޅަށް ބެލޭނެ ނިޒާމެއް ހަމަޖެއްސުމަކީ ވަރަށް މުހިންމު ކަމެއް ކަމަށެވެ. ނަމަވެސް މިކަމަށްޓަކައިގިނަ މަސައްކަތްތަކެއް ކުރަން ޖެހޭނެ ކަމަށް ވިދާޅުވިއެވެ.
ކޮލެޖް/ޔުނިވަރސިޓީތަކުން ކޯސްތައް ކުރިއަށް ގެންދިއުމަށްޓަކައި މިހާރު ހުއްދަ ދެމުން އަންނަނީ ވަކި މުއްދަތެއް ނެތް ގޮތަށެވެ. ދުނިޔޭގެ އެހެނިހެން ގައުމުތަކުގައި ކޯސްތައް ހިންގުމަށް ހުއްދަ ދެނީ އާންމު ގޮތެއްގައި ފަސް އަހަރުގެ މުއްދަތަކަށެވެ. އޭގެ ފަހުން ކޯސް އިތުރަށް ހިންގޭނީ އަލުން ހުއްދައަށް އެދުމުން ކުރިން ހިންގި ކޯހުގެ ފެންވަރު ބެލުމަށްފަހުއެވެ. މީގެ ސަބަބުން ކޯސްތައް ހިންގުމުގައި ހުރި ކަންތައްތައް ރަނގަޅު ކުރެވި ކޯސްތަކުގެ ފެންވަރު ރަނގަޅުވެގެން ދާނެއެވެ.
އެހެން ކަމުން މިކަންތައްތައް ރަނގަޅު ކުރުމުގެ ގޮތުން ކޯސްތައް ކުރިއަށް ގެންދިއުމަށް ހުއްދަ ދެވޭ މުއްދަތެއް ކަނޑައެޅުމަށްޓަކައި ގަވައިދުތަކަކާއި ގައިޑްލައިންތަކެއް ހަދަމުން އަންނަ ކަމަށް ޑރ ހަންނާން ވިދާޅުވިއެވެ.
