ހަނގުރާމައަށް ދިޔުމަށްފަހު ރާއްޖެ އަންނަން ބޭނުންވާ ދިވެހިން ރިހެބިލިޓޭޓް ކުރަން ޑިސެމްބަރުމަހު ފަށާނެ
މުވައްޒަފުންނަށް ރަނގަޅު ތަމްރީނުތަކެއް ދިނުމުގެ މަސައްކަތް ދަނީ ކުރަމުން
މިނިސްޓަރ އޮފް ހޯމް އެފެއާޒް އިމްރާން އަބްދުﷲ
ރާއްޖެއިން ބޭރަށް ހަނގުރާމައަށް ގޮސް ތިބި މީހުންގެ ތެރެއިން ރާއްޖެއަށް އަންނަން ބޭނުންވާ ދިވެހިން ގެނެސް ރިހެބިލިޓޭޓް ކުރުމަށް ހޯމް މިނިސްޓްރީން ގާއިމް ކުރާ ސެންޓަރުގެ މަސައްކަތް ޑިސެމްބަރު މަހު ފަށާނެ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައެވެ. މިނިސްޓަރ ވިދާޅުވީ، ރާއްޖެ ގެނެސް ރީހެބިލިޓޭޓް ކޮށްގެން މުޖުތަމައަށް ނެރެންޖެހޭ މީހުންގެ ސީދާ އަދަދު ހާމަކުރެވެން ނެތް ނަމަވެސް ރާއްޖެ އަންނަން ބޭނުންވާ ވަރަށް ނިކަމެތި ހާލުގައި ތިބި، އަންހެނުންނާއި ކުޑަކުދިން އެބަތިބި ކަމަށެވެ. އެހެންކަމުން އަންނަން ބޭނުންވާ އާއިލާތައް އަނބުރާ ގެނެސް އެމީހުންގެ އާއިލާތަކާއި ނުވަތަ މުޖުތަމައާއި އަލުން ގުޅުވައިލުމަށްޓަކާ އެމަރުހަލާގައި ކުރަންޖެހޭ ގިނަ މަސައްކަތްތަކެއް ހުރިކަން ގަބޫލުކޮށް ހޯމް މިނިސްޓްރީން ނޭޝަނަލް ރީއިންޓެގްރޭޝަން ސެންޓަރ (އެންއާރްސީ)ގެ ނަމުގައި ސެންޓަރެއް ގާއިމްކޮށްފައިވާ ކަމަށް މިނިސްޓަރ ވިދާޅުވިއެވެ.
މި ސެންޓަރުގައި ތިބޭ މީހުން ރިހެބިލިޓޭޓް ކުރުމަށްޓަކައި ޕްރޮގްރާމްތަކެއް ފަރުމާ ކުރެވި ހޯމް މިނިސްޓްރީން އެންމެ މުހިންމުކޮށް ކުރަމުން ގެންދާ ކަމަކީ، މުވައްޒަފުން ރަނގަޅަށް ތަމްރީން ކުރުމުގެ މަސައްކަތް ކަމަށް ވިދާޅުވިއެވެ. މި ސެންޓަރުގައި މަސައްކަތް ކުރާނެ މުވައްޒަފުން ބޭނުންވެގެން އިއުލާން ކުރުމުން މީހުން އެކަމަށް ވަރަށް ފަސްޖެހޭކަމަށް އިމްރާން ފާހަގަކުރެވިއެވެ. މިއީ ރާއްޖޭގައި މުޅިން އަލަށް ކުރާ ކަމެއް ކަމުން އެކަމުގެ ތެރެއަށް ވަނުމަށް މީހުން ފަސްޖެހެނީ ކަމަށްވުން އެކަށީގެންވާ ކަމަށް ވެސް ވިދާޅުވިއެވެ.
މި މެސެޖް ޚާއްސަކޮށް ސައިކޮލޮޖީގެ ތަފާތު ދާއިރާތަކުން ކިޔަވައިގެން ތިބި ޒުވާނުންނަށް ދޭން ބޭނުންވާ ކަމަށް މިނިސްޓަރ ވިދާޅުވިއެވެ. މިފަދަ ކަމަކަށް ކުރިމަތިލައިގެން މުޖުތަމައަށް މުހިންމު ހެޔޮ ބަދަލެއް ގެނެސްދިނުމުގެ ޝައުގުވެރިކަން ހުރި އަދި އެފަދަ މައުލޫމާތު ލިބިވަޑައިގެން ތިއްބެވި ބޭފުޅުންނަށް މި މަސައްކަތް ކޮށްދެއްވިދާނެކަމަށް އިމްރާން ވިދާޅުވިއެވެ. ރިހެބިލިޓޭޓް ކުރަން ބޭނުންވާނެ ފުރިހަމަ ޓްރެއިނިން މިނިސްޓްރީ އާއި އެއްކޮށް މަސައްކަތް ކުރާ މުއައްސަސާ ތަކާއިގުޅިގެން ކުރިއަށްގެންދާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ، ހަނގުރާމައަށް ގޮސްފައި އަންނަ މީހުންގެ ވިސްނުމުގައި ހަރުލާފަހުރި ތަފާތު ވިސްނުންތަކެއްގެ ސަބަބުން އެކުރާ އަސަރުތަކުން ސަލާމަތް ވުމަށްޓަކައި ދީނީ ގޮތުންވެސް ޕްރޮގްރާމްތަކެއް ފަރުމާކުރެވިފައިވާ ކަމުގައެވެ. އަތޮޅުތަކަށް ކުރާ ޒިޔާރަތް ތަކުގައިވެސް އެފަދަ އެއާއިލާތަކާއި ބައްދަލު ކުރައްވާ އެމީހުންގެ ވާހަކަތައް އަޑުއަހާފައިވާ ކަމަށް ވިދާޅުވިއެވެ. ޚާއްސަކޮށް އަންހެނުންނާއި ކުޑަކުދިން އާއިލާތަކާއި ދުރުގައި، ފިނި މޫސުމުގެ އެންމެ ފިނީގައި އަދި ހޫނު މޫސުމުގެ އެންމެ ގަދަ ހޫނުގައި ވަރަށް ދަތި ނިކަމެތިހާލުގައި އުޅޭއިރު އޭގެ އަސަރު ވަރަށް ބޮޑަށްކުރާ ކަމަށެވެ.
މިކަންކަމަށް ހައްލެއް ހޯދައިދިނުމުގެ ގޮތުން ސަރުކާރުން އިސްނަގައިގެން ބިނާކުރެވޭ ސެންޓަރަކަށް މި ރިހެބިލޭޝަން ސެންޓަރ ވާނެކަމަށް މިނިސްޓަރ ވިދާޅުވިއެވެ. މިއީ މުޅި ދުނިޔޭގައިވެސް ގޮންޖެހުން ބޮޑު އަދި އަލަށް ކުރަމުން އަންނަ ތަޖުރިބާއެއް ކަން މިނިސްޓަރ ފާހަގަކުރެއްވިއެވެ. ޚާއްސަކޮށް އިސްލާމީ ބައެއް ގައުމުތަކުން ބުނެފައިވަނީ އެގައުމުތަކުން ރާއްޖެއަށް އެހީތެރިވުމުގެ ގޮތުން ކުރެވެންއޮތް ހުރިހާ ކަމެއް ކޮށްދެއްވާނެ ކަމަށެވެ. ރާއްޖޭގެ މިސެންޓަރަކީ ނަމޫނާ ސެންޓަރަކަށް ހެދުމަކީ އެގައުމުތަކުގެ ވެސް ވަރަށް ބޮޑު އުންމީދެކެވެ.
