ކޮރަޕްޝަނުގެ އެއްވެސް އަމަލެއް މިހާތަނަށް ކޮށްފައެއް ނުވާނެ – ފައިސަލް
17 ނޮވެމްބަރު 2021 | ބުދަ 14:03ރައްޔިތުންގެ މަޖިލީހުގައި އިންނެވިއިރުވެސް މަގާމުގެ ނުފޫޒު ބޭނުންކޮށް އެއްވެސް ކަހަލަ އަމަލެއް ހިންގާފައި ނުވާނެ
ރާއްޖެޓީވީގެ 'ފަށާއިރު' ޕްރޮގްރާމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވަޑައިގެންނެވުން
ކޮރަޕްޝަނުގެ އެއްވެސް އަމަލެއް މިހާތަނަށް ކޮށްފައި ނުވާނެ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ރާއްޖެ ޓީވީގެ "ފަށާއިރު" ޕްރޮގްރާމްގައި ވާހަކަ ދައްކަވަމުން ފައިސަލް ވިދާޅުވީ އެމްއެމްޕީއާރްސީގެ މައްސަލައެއްގެ ތެރެއިންނާ އެހެން ކަމަކުން ވިޔަސް ފައިސަލްއަށް ކޮރަޕްޝަނުގެ އެއްވެސް ތުހުމަތެއް ކުރެވޭނެ ޖާގައެއް ނޯންނާނެ ކަމަށެވެ.
ފައިސަލް ވިދާޅުވީ، އެބޭފުޅާއަށް ނުލިބޭނެ އެއްޗަކަށް ބަޖެޓް ނުކުރާނެ ކަމަށާއި، ހޯދާފައިވާ އެއްޗެއް ހޯދާފައިވަނީ އެބޭފުޅާ ކުރި މަސައްކަތުން ކަމަށެވެ. އަދި މީގެ ކުރިން ރައްޔިތުންގެ މަޖިލީހުގައި އިންނެވިއިރުވެސް މަގާމުގެ ނުފޫޒު ބޭނުންކޮށް އެއްވެސް ކަހަލަ އަމަލެއް ހިންގާފައި ނުވާނެ ކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ މިއަދު މި މަސައްކަތް ކުރައްވަނީ ރައްޔިތުން އެބޭފުޅާއަށް ދެއްވި އަމާނާތެއްގެ ގޮތުގައި ދެކިގެން ކަމަށާއި، މިކަހަލަ މަގާމުތަކުގައި ތިބޭއިރު މަސައްކަތް ކުރަންވާނީ ވިސްނައިގެން ކަމަށެވެ.
މި ޕްރޮގްރާމްގައި ވާހަކަ ދައްކަވަމުން ފައިސަލް އިތުރަށް ވިދާޅުވީ، ގައުމު ހިންގުމުގެ މަސައްކަތް ކުރަނީ ސިވިލް ސާވިސް އަދި އަމިއްލަ ފަރާތްތަކުން ކުރަމުން އަންނަ މަސައްކަތުން ކަމަށާއި، ކޮންމެ މީހަކީވެސް ސަރުކާރަށް މުހިންމު މީހެއް ކަމަށެވެ. އަދި ރައްޔިތުންނާއި ގުޅުން ބަދަހިކޮށްގެން ސަރުކާރު ހިންގުން އެއީ މި ސަރުކާރުގެ އަމާޒު ކަމަށެވެ.
