ޔާމީނުގެ އިސްތިއުނާފު މައްސަލައިގެ އަޑުއެހުމެއް ބުރާސްފަތި ދުވަހު ސުޕްރީމް ކޯޓުގައި
17 ނޮވެމްބަރު 2021 | ބުދަ 08:06އަޑުއެހުންތައް އެންމެ ފުރަތަމަ ސުޕްރީމް ކޯޓުގައި ފަށާފައިވަނީ ސެޕްޓެމްބަރު މަހުގެ 12 ވަނަ ދުވަހު
ރައީސް ޔާމީނުގެ ޖަލު ޙުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި ވަނީ ކުރިއަށް ގެންގޮސްފައި
މަނީ ލޯންޑްރިންގެ ކުށް ސާބިތުވެ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް 5 އަހަރު ދުވަހުގެ މުއްދަތަށް ޖަލަށް ލުމާއެކު، ޖޫރިމަނާގެ ގޮތުގައި ދައުލަތަށް ދައްކަން ކަނޑައެޅި 5،000،000.00 (ފަސްމިލިއަން) ޔޫއެސް ޑޮލަރު ހޯދުމަށް ކޮށްފައިވާ ޙުކުމް އެމަނިކުފާނުގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުމެއް ބުރާސްފަތި ދުވަހު ސުޕްރީމް ކޯޓުގައި ތާވަލު ކޮށްފިއެވެ.
މި މައްސަލައިގެ އަޑުއެހުމަށް ޔާމީނުގެ ވަކީލުންނަށް ވަނީ ޗިޓް ފޮނުވާފައެވެ. އެގޮތުން ބުރާސްފަތި ދުވަހުގެ ހެނދުނު 09:00 އަށް އަޑުއެހުމަށް ހާޒިރުވުމަށް ވަނީ ޗިޓް ފޮނުވާފައެވެ.
މި މައްސަލައިގެ އަޑުއެހުންތައް އެންމެ ފުރަތަމަ ސުޕްރީމް ކޯޓުގައި ފަށާފައިވަނީ މިދިޔަ ސެޕްޓެމްބަރު މަހުގެ 12 ވަނަ ދުވަހުއެވެ. މި މައްސަލައިގައި ރައީސް ޔާމީނުގެ ފަރާތުން22އިސްތިއުނާފީ ނުކުތާއެއް ހުށައަޅާފައިވާއިރު، ތަފްސީލީ ގޮތެއްގައި އިސްތިއުނާފީ ނުކުތާތަކަށް ދެފަރާތުން ވާހަކަ ދައްކާފައިވެއެވެ. ރައީސް ޔާމީނުގެ ފަރާތުން އިސްތިއުނާފު ކޮށްފައިވާ މައްސަލައިގައި ސާފު ކުރަން ބޭނުންވާ އިތުރު ކަމެއް ނެތްނަމަ ދެން އޮންނާނީ ޙުކުމް ކުރުމަށް ބާއްވާ ޝަރީއަތުގެ އަޑުއެހުމެއްކަން އެންމެ ފަހުން ބޭއްވި އަޑުއެހުމުގައި ފަނޑިޔާރުން ފާހަގަ ކޮށްފައިވެއެވެ.
މި މައްސަލައިގައި ރައީސް ޔާމީނުގެ ފަރާތުންނާއި، ދައުލަތުގެ ފަރާތުން މައްސަލައާ ގުޅޭގޮތުން ޚުލާސާ ގޮތެއްގައި ވާހަކަ ދެއްކެވުމަށް ފަހު ފުރުސަތެއް ދެއްވައި، އަޑުއެހުންތައް ނިންމަވާލައްވާފައިވަނީ 5 އޮކްޓޯބަރު 2021 ގައެވެ. އެގޮތުން ސުޕްރީމް ކޯޓު ރިސެސަށް ދިއުމުގެ ކުރިން މައްސަލަ ނިންމެވުމަށް މަސައްކަތް ކުރައްވާނެ ކަމަށާއި، އަދި މި ވަގުތުގެ ތެރޭގައި މައްސަލަ ލަސްވެދާނެ ފަދަ އެއްވެސް ކަމެއް ނުކުރެއްވުމަށް ފަނޑިޔާރުން ވަނީ އިލްތިމާސް ކުރައްވާފައެވެ.
ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ވަކީލު އަލީ ޝާހު ވިދާޅުވީ، މި މައްސަލައިގައި ޝަރީއަތުގެ އަޑުއެހުމަކަށް ހާޒިރުވުމަށް ޗިޓް ލިބިފައިވާ ކަމަށެވެ.
މި މައްސަލައިގެ އަޑުއެހުންތައް ކުރިއަށް ދިޔައިރު، ރައީސް ޔާމީނުގެ ފަރާތުން 3 ކަމެއް ހުށައަޅުއްވާފައިވެއެވެ. އެއީ އެމަނިކުފާނުގެ ޙުކުމް ތަންފީޒު ކުރުން ފަސްކޮށްދިނުމުގެ އަމުރެއް ނެރެދެއްވުމާއި، ކަފާލާތުގެ ދަށުން ދޫކޮށްލެއްވުމުގެ އިތުރުން، އައުހެކިތަކެއްހުށައެޅުއްވުމެވެ. މި ކަންކަމަށް ތަފްސީލީ ގޮތެއްގައި ޔާމީނުގެ ފަރާތުންނާއި، ދައުލަތުން ވާހަކަ ދައްކާފައިވާއިރު، ސުޕްރީމް ކޯޓުން ވަނީ އެކަމަށް ގޮތެއް ނިންމަވާފައެވެ. އެގޮތުން ޖަލު ޙުކުމް ތަންފީޒު ކުރުން ފަސްކޮށްދިނުމާއި، ކަފާލާތުގެ ދަށުން ދޫކޮށްލުމުގެ އަމުރެއްނެރެދެވެންނެތްކަމަށް ސުޕްރީމް ކޯޓުގައި މި މައްސަލަ ބެއްލެވި 3 ފަނޑިޔާރުންގެ އިއްތިފާޤުން ވަނީ ނިންމަވާފައެވެ.
އެހެންނަމަވެސް، ޙުކުމުގައި ހިމެނޭ ޖޫރިމަނާ ފައިސާ ހޯދުން ފަސްކޮށްދިނުމުގެއަމުރެއްސުޕްރީމް ކޯޓުން ނެރެދެއްވާފައިވެއެވެ. އެގޮތުން 3 ފަނޑިޔާރުންގެ އިއްތިފާޤުން ނިންމަވާފައިވަނީ ޔާމީނުގެ ޙުކުމުގެ ފައިސާ ހޯދުމުގެ ކަންކަން އެއްވެސް ކޯޓެއްގައި ކުރިއަށް ގެންގޮސް ގޮތެއް ނިންމަވައިފިނަމަ، ސުޕްރީމް ކޯޓުގައި މިހާރު ކުރިއަށްދާ އިސްތިއުނާފު މައްސަލައަށް އޭގެ އަސަރު ކުރާނެ ކަމަށެވެ. ވުމާއެކު ޖޫރިމަނާ ފައިސާ ހޯދުމުގެ ގޮތުން އެއްވެސް ކޯޓެއްގައި އަދި ދައުލަތުގެ އެއްވެސް އިދާރާއެއްގައި މައްސަލައެއް ކުރިއަށް ނުގެންދިއުމަށް ސުޕްރީމް ކޯޓުން ވަނީ ދައުލަތުގެ އިދާރާތަކުގެ މައްޗަށް އަންގައި އަމުރުކޮށްފައެވެ.
ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.
