ސަރުކާރުގެ އެންމެ ބޮޑު ކާމިޔާބީއަކީ ކޯލިޝަންގެ ހުރިހާ ބައިވެރިންނާއެކު 3 އަހަރު ދެމިތިބުން - އިމްރާން
17 ނޮވެމްބަރު 2021 | ބުދަ 12:14ސަރުކާރަށް އެންމެ މުހިއްމުކަމަކީ، ހަމަޖެހުމާއި މަސްލަހަތު ހިފެއްޓިގެން ދިޔުން
އިމްރާން އަބްދުﷲ - ހޯމް މިނިސްޓަރ
ސަރުކާރަށް 3 އަހަރު ފުރި ކާމިޔާބުގެ ވާހަކަދައްކާއިރު ސަރުކާރުގެ އެންމެ ބޮޑު ކާމިޔާބީއަކީ، 2018ގެ ރިޔާސީ އިންތިޚާބުގައި ރައްޔިތުންގެ ކުރިމައްޗަށް ނުކުމެ ރައްޔިތުންނަށް ވައުދުވެ އިންތިޚާބުވި ސަރުކާރު، އިންތިޚާބު ކުރުމުގައި މަސައްކަތް ކުރެއްވި ހުރިހާ ބައިވެރިން ބަދަަހިކަމާއެކު އެކުގައި 3 އަހަރު ދެމިތިބުން ކަމުގައި ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ސަރުކާރަށް 3 އަހަރު ފުރުމާގުޅިގެން ރާއްޖެޓީވީއަށް ދެއްވި ޚާއްސަ އިންޓަރވިއުގައި މިނިސްޓަރ ވިދާޅުވީ، މިހާތަނަށް އައި ކޮންމެ ސަރުކާރެއް އައީ ކޯލިޝަނަކުން ނަމަވެސް މަދު ދުވަސްކޮޅެއްގެ ތެރޭގައި ކޯލިޝަން ރޫޅިގެން ގޮސްފައިވާ ކަމަށެވެ. އެއާ ޚިލާފަށް މިސަރުކާރަށް 3 އަހަރު ވެގެން ދިޔައިރުވެސް ކޯލިޝަން ދެމިއޮތީ ވަރަށް ބަދަހި ކަމާއެކުގައި ކަމަށެވެ.
ކޮވިޑްގެ މި ޕެންޑަމިކްގެ ތެރޭގައި ދުނިޔޭގެ އިގުތިސާދަށް ގޮންޖެހުން ކުރިމަތިވި ހާލަތުގައިވެސް ރައްޔިތުންނަށް އެއްވެސް އެއްޗަކަށް ދަތިނުވެ މިއަދާ ހަމައަށް ގެނައުމަށް ކުރެވުނު މަސައްކަތަކީ މިސަރުކާރަށް ދިމާވި ޗެލެންޖެއް ކަމަށާއި، އެކަން ވަރަށް ކާމިޔާބު ކަމަށެވެ.
ސަރުކާރަށް އެންމެ މުހިއްމުކަމަކީ، ހަމަޖެހުމާއި މަސްލަހަތު ހިފެއްޓިގެން ދިޔުން ކަމަށާއި، ރައްޔިތުންނަށް އަމާން ކަމާއި ރައްކާތެރިކަން ފޯރުކޮށްދިނުން ކަމަށެވެ. އެކަަންކަން ކަށަވަރުކުރުމަށް ހުރިހާ ވުޒާރާއަކުންވެސް މަސައްކަތްކުރައްވާ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މި ފަސް އަހަރު ނިމިގެންދާއި، ރާއްޖޭގައި ހުރި ބޮޑެތި މައްސަލަތަކަށް އެދެވޭ ހައްލެއް ލިބިގެންދާނެ ކަމަށެވެ. އެގޮތުން ގޭންގް ކުށްތަކާއި ޑްރަގް ވިޔަފާރިއާއި، ޖިނާއީ ބޮޑެތި ކުށްތަކުން މުޖުތަމައު ސަލާމަތް ކުރުމަށް މަސައްކަތް ކުރެވިގެންދާނެކަން މިނިސްޓަރ ފާހަގަކުރެއްވިއެވެ.
ފުލުހުންގެ އައު ގާނޫނާއެކު ފުލުހުން ކުރުމަށް މިހާރު ތަރުތީބު ކުރެވިފައި ހުރި މަސައްކަތްތަކަކީ، އެތައް އަހަރެއްވަންދެން ފުނި ޖެހިފައި ހުރި، ރާއްޖޭގެ އަމަން އަމާން ކަމާއި ގުޅިފައިހުރި މަސައްކަތްތަކެއް ކަމަށާއި، އެ މަސައްކަތުގެ ތެރެއިން ބޮޑެތި މައްސަލަތަކަށް ބޮޑެތި ހައްލުތަކެއް ހޯއްދަވައިދެއްވާނެ ކަމުގެ ޔަގީންކަން މިނިސްޓަރ ދެއްވިއެވެ. އެމަސައްކަތްތައް މިހާރު ފެށި، ކުރިއަށް އޮތް ދެ އަހަރުގެ ތެރޭގައި ނަތީޖާ ފެނިގެންދާނެ ކަމަށް މިނިސްޓަރ ވިދާޅުވިއެވެ.
