ފުވައްމުލަކަށް ދިމާވެފައިވާ ކަރަންޓުގެ މައްސަލައަށް އަވަސް ހައްލެއް ބޭނުންވޭ – މޭޔަރު
ކަރަންޓްގެ ލޯޑު ބޮޑުވެ ބައެއް އިންޖީނުތައް ނިވޭ
ފުވައްމުލަކު ސިޓީ، ކަރަންޓުގެ މައްސަލަ ވަނީ ބޮޑުވެފައި
ފުވައްމުލަކަށް ދިމާވެފައިވާ ކަރަންޓުގެ މައްސަލައަށް އަވަސް ހައްލެއް ބޭނުންވާ ކަމަށް އެ ސިޓީގެ މޭޔަރު އިސްމާއިލް ރަފީގު ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަމުން ފުވައްމުލަކު ސިޓީ ކައުންސިލްގެ މޭޔަރު އިސްމާއިލް ރަފީގު ވިދާޅުވީ ކަރަންޓުގެ މައްސަލަ ހައްލުކުރުމަށް ފެނަކައިން މިހާރުވެސް ޕްރޮޖެކްޓެއް ހިންގަމުން އަންނަ ކަމަށާއި، އެކަމަކު އެ ޕްރޮޖެކްޓްގެ މަސައްކަތް ކައުންސިލުން އެދޭ މިންވަރަށްވުރެ ލަސްކަމެއް އެބައުޅެއެވެ.
ރަފީގް ވިދާޅުވީ، ފުވައްމުލަކުގައި އަޅާ އައު އިންޖީނުގެއާއެކު ފުވައްމުލަކަށް ދިމާވެފައިވާ ކަރަންޓުގެ މައްސަލަ ހައްލުވާނެ ކަމަށް އުންމީދުކުރާ ކަމަށެވެ.
ފުވައްމުލަކުގެ އިންޖީނުގޭގެ މިހާރުގެ ހާލަތަށް ބަލާކަމުގައިވާނަމަ، ބައެއް ފަހަރު ލޯޑު ބޮޑުވެގެން ބައެއް އިންޖީނުތައް ދަނީ ނިވެކަމަށް މޭޔަރު ވިދާޅުވިއެވެ.
އިސްމާއިލް ރަފީގް އިތުރަށް ވިދާޅުވީ ސޯލާގެ ދެ މެގަވޯޓްގެ ޕްރޮޖެކްޓެއް މިހާރުވެސް ކުރިޔަށްދާ ކަމަށާއި، މި ޕްރޮޖެކްޓާއެކު ތިމާވެއްޓާ ރައްޓެހި ކަރަންޓުގެ ހަބަކަށް ވުމަށް ފުވައްމުލަކުން ކުރަމުން އަންނަ މަސައްކަތަށް ކުރިއެރުންތަކެއް ލިބިގެންދާނެއެވެ.
