ލ. އަތޮޅުގައި ދެ ޑިންގީއެއް ޖެހި ހިނގި އެކްސިޑެންޓެއްގައި ގިނަ ބަޔަކު އަނިޔާވެއްޖެ އެވެ.

ރާއްޖެއެމްވީ އަށް މައުލޫމާތު ދެއްވަމުން ލ. އަތޮޅު ރީޖަނަލް ހޮސްޕިޓަލްގެ ޑިރެކްޓަރު އަބްދުލް ހަނާންނު ވިދާޅުވީ ކަލައިދޫ އިން ފުރައިގެން ދަނބިދޫއަށް ދިޔަ ޑިންގީއަކާއި ދަނބިދޫއިން ފުރައިގެން ދިޔަ ޑިންގީއަކާ ޖެހި ހިނގި އެކްސިޑެންޓުގައި ޖުމްލަ ހަ މީހަކަށް އެކިވަރުގެ އަނިޔާ ލިބިފައިވާ ކަމަށެވެ.

ހަންނާނު ވިދާޅުވީ އަނިޔާވި މީހުންގެ ތެރެއިން އެކަކު ލ. ގަމަށް ގެނެސް ހޮސްޕިޓަލުގައި ފަރުވާ ދެމުންދާ ކަމަށާއި އޭނާގެ ބޯ ވަރަށް ބޮޑަށް ފަޅައިގެން ގޮސްފައިވާ ކަމަށެވެ. އަދި އަނިޔާވި އިތުރު ހަތަރު މީހަކު ގަމަށް ގެނެއުމަށް ސީއެމްބިއުލާންސް ދަތުރުކުރަމުންދާ ކަމަށް އޭނާ ވިދާޅުވި އެވެ.

ރާއްޖެއެމްވީ އަށް މައުލޫމާތު ދިން މީހަކު ބުނީ ކަލައިދޫ އިން ފުރައިގެން ދަނބިދޫއަށް ދިޔަ ޑިންގީގައި ތިބީ ދަނބިދޫ ފުޓުބޯޅަ ޓީމުގެ ކުޅުންތެރިން ކަމަށެވެ. އަދި އެ ޑިންގީގައި ގާތްގަނޑަކަށް 18 މީހުން ތިބިއިރު، އެކްސިޑެންޓްވި އަނެއް ޑިންގީގައި ހުރީ ދުއްވަން އިން މީހާ އެކަނި ކަމަށް އޭނާ ބުންޏެވެ.

އޭނާ ބުނީ މޫސުން ގޯސްވުމުގެ ސަބަބުން ވަރަށް ކަނޑުގަދަ ކަމަށާއި، ކަލައިދޫ އިން ފުރައިގެން ދިޔަ ޑިންގީގައި އެއްވެސް އަލިކަމެއް ނެތް ކަމަށެވެ. 

ފުލުހުންގެ މީޑިއާ އޮފިޝަލް ވިދާޅުވީ ދެ ޑިންގީއެއް ޖެހި އެކްސިޑެންޓެއް ރިޕޯޓް ކޮށްފައިވާ ކަމަށާއި، އަނިޔާ ލިބުނު ބަޔަކަށް ފަރުވާ ދެމުންދާ ކަމަށެވެ. އަދި އެ މައްސަލަ ފުލުހުން ތަހުގީގު ކުރަން ފަށާފައިވާ ކަމަށް ވެސް ވިދާޅުވި އެވެ.