ކުމުންދޫ ކަނބަލުންގެ ފުޓްސަލް މުބާރާތް ފަށައިފި
މިމުބާރާތުގައި 5 ޓީމް ބައިވެރިވެފައިވޭ
ކުމުންދޫ ކަނބަލުންގެ ފުޓްސެލް މުބާރާތުގެ ތެރެއިން
ހދ. ކުމުންދޫގައި ރަޖިސްޓަރީކޮށްގެން ހިންގަމުން އަންނަ ޖަމްޢިއްޔާއެއް ކަމުގައިވާ, ކުމުންދޫ ޔޫތު ސްޕޯޓްސް (ކޭވައިއެސް)ގެ ފަރާތުން އިންތިޒާމް ކޮށްގެން އެ ރަށުގެ ކަނބަލުންނަށް ޚާއްޞަކޮށްގެން ކުރިއަށް ގެންދާ, ކަނބަލުންގެ ފުޓްސަލް މުބާރާތް ރޭ ފަށައިފިއެވެ.
މުބާރާތް ހުޅުވުމުގެ ރަސްމިއްޔާތު ޝަރަފްވެރި ކޮށްދެއްވާފައި ވަނީ ފެނަކަ ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ އިބްރާހީމް ވަޙީދާއި ކުމުންދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ރައީސާ ފާޠިމަތު ރީނާޒްއެވެ.
މުބާރާތުގައި ރޭ ދެ މެޗު ކުޅެފައިވާއިރު، ފުރަތަމަ މެޗުގައި ބައްދަލުކޮށްފައި ވަނީ ޓާފް ކުއީންއާއި ޒީރު ސްޓާރސްއެވެ. މި މެޗު 2-1ގެ ނަތީޖާއަކުން ކާމިޔާބު ކޮށްފައި ވަނީ ޓާފް ކުއީންއެވެ. މި މެޗުގެ މޮޅު ކުޅުންތެރިއަކަށް ހޮވިފައި ވަނީ ޓާފް ކުއީންގެ ޖޯޒީ ނަމްބަރު 12 ޖަމީލާ މޫސާއެވެ.
މުބާރާތުގެ ދެވަނަ މެޗުގައި ބައްދަލު ކޮށްފައި ވަނީ ސީއެސް ވިމެންއާއި ސަންދިޔާއެވެ. މި މެޗު 3-1ގެ ނަތީޖާއަކުން ކާމިޔާބު ކޮށްފައި ވަނީ ސީއެސް ވިމެންއެވެ. މި މެޗުގެ މޮޅު ކުޅުންތެރިއަކަށް ހޮވިފައި ވަނީ ސީއެސް ވިމެންގެ ޖަރޒީ ނަމްބަރު 10 ފާޠިމަތު ޝަހުލާއެވެ.
މި މުބާރާތުގައި މިރޭ ވެސް ދެ މެޗު ކުޅުމަށް ވަނީ ހަމަޖެހިފައެވެ. ފުރަތަމަ މެޗުގައި 20:15ގައި ބައްދަލު ކުރާނީ ޒީރު ސްޓާރސްއާއި ސީއެސް ވިމެންއެވެ. ދެވަނަ މެޗުގައި 21:15ގައި ބައްދަލުކުރާނީ ސަންދިޔާއާއި ބީސީ ވިމެންއެވެ.
5 ޓީމް ވާދަކުރާ މިމުބާރާތުގެ ޗެންޕިއަން ޓީމަށް 3000 ރުފިޔާގެ ދިނުމަށްވަނީ ހަމަޖެހިފައެވެ. މިމުބާރާތުގެ މެއިން ސްޕޮންސަރއަކީ ކުމުންދޫ ޖަސްޓް ނިއު ޝޮޕް އެވެ.
ކުމުންދޫ ޔޫތު ސްޕޯރޓްސްގެ ފަރާތުން ކަނބަލުންނަށް ފުޓްސެލް މުބާރާތް ބާވާ މިއީ ދެވަނަ އަހަރެވެ.
