ކޮޕީ މުހައްމަދު ރަޝީދުގެ އާއިލާއަށް ރައީސްގެ ތައުޒިޔާ

ދިވެހިބަހާއި އަދަބިއްޔާތާއި މުނިފޫހިފލުވުމުގެ ދާއިރާއިން ގިނަގުނަ ޚިދުމަތްތަކެއް ކުރައްވާފައިވާ، ކޮޕީ މުހައްމަދު ރަޝީދު އަވަހާރަވުމާ ގުޅިގެން އެމަނިކުފާނުގެ އާއިލާއަށް ރައީސުލްޖުމްހޫރިއްޔާ ތައުޒިޔާ ފޮނުއްވައިފިއެވެ.

އުމުރުން 72 އަހަރުގައި ކޮޕީ ރަޝީދު އަވަހާރަވެފައިވަނީ ސްޓްރޯކަކަށްފަހު އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް ބުރާސްފަތި ދުވަހުގެ ރޭގެ ވަގުތެއްގައެވެ. އެމަނިކުފާނު އަވަހާރަވުމާ ގުޅިގެން އާއިލާއަށް ތައުޒިޔާ ފޮނުއްވުމަށްފަހު ރައީސް ވަނީ މަހުރޫމަށް ސުވާރުގޭގެ ނިއުމަތް ދެއްވުން އެދި ދުއާ ކުރައްވާފައެވެެ.

Advertisement

ކޮޕީ ރަޝީދަކީ ޅެންވެރިކަމުގެ ރޮނގުން ވަރަށް ގިނަ ޚިދުމަތްތަކެއް ކޮށްދެއްވައިފައިވާ ބޭފުޅެކެވެ. ނޫސްވެރިކަމުގައި ގިނަ މަސައްކަތްތަކެއް ކުރައްވައި މޯލްޑިވްސް މީޑިއާ ކައުންސިލުން ދޭ ނޫސްވެރިކަމުގެ ލައިފްޓައިމް އެޗީވްމެންޓް އެވޯޑު 2018 ވަނަ އަހަރު ކާމިޔާބުކުރައްވައިފައިވެއެވެ. މާލޭގެ ވަރަށް ގިނަ ސްކޫލްތަކުގައި މުދައްރިސެއްގެ ގޮތުން ދިވެހިބަސް ކިޔަވައިދެއްވައިފައިވެއެވެ. ސަރުކާރުން ވަނީ ކޮޕީ ރަޝީދަށް ތިން ފަހަރެއްގެ މަތިން އާންމު ޚިދުމަތުގެ އިނާމު ދެއްވާފައެވެ. އެގޮތުން، 1984 ވަނަ އަހަރު ތަމްސީލު ކުޅުމުގެ ރޮނގުން ޢާންމު ޚިދުމަތުގެ އިނާމު، 1988 ވަނަ އަހަރު ތާނަ އަރަބި ލިޔުމުގެ ރޮނގުން, އަދި 2005 ވަނަ އަހަރު ދިވެހި އަދަބިއްޔާތަށް ޚިދުމަތްކުރުމުގެ ދާއިރާއިން ޅެންހެދުމުގެ ރޮނގުން އޭނާއަށް ވަނީ އާންމު ޚިދުމަތުގެ އިނާމު ދެއްވާފައެވެ.

ކޮޕީ ރަޝީދަކީ ތާނަ އަރަބި ލިޔުމުގެ ރޮނގުން ވެސް ވަރަށް މަޝްހޫރު ބޭފުޅެކެވެ. ބޮޑުއަކުރު ލިޔުއްވުމަކީ ޚާއްސަ ފަންނެކެވެ. ބޮޑު އަކުރު ލިޔަން ދަސްކޮށްދޭ ގިނަ ކޯސްތަކެއް ހިންގެވިއެވެ.

ކޮޕީ ރަޝީދަކީ، 32 އަހަރަށްވުރެ ދިގު މުއްދަތެއްގައި ސަރުކާރަށް ވެސް ޚިދުމަތް ކުރައްވައިފައިވާ ބޭފުޅެކެވެ. ފުރުއްވައިފައިވާ މަގާމުތަކުގެ ތެރޭގައި، ބ. އަތޮޅު އަތޮޅުވެރިކަމާއި، ދިވެހިބަހާއި ތާރީހަށް ޚިދުމަތްކުރާ ގައުމީ މަރުކަޒުގެ އެސިސްޓެންޓް ޓު ދަ ޑިރެކްޓަރުކަމާއި، އެސިސްޓެންޓް ޑިރެކްޓަރުކަން ހިމެނެއެވެ. މިނިސްޓްރީ އޮފް އެޑިއުކޭޝަންގެ ފޮތް ޗާޕްކުރާ ބައިގެ ޑެޕިއުޓީ ޑިރެކްޓަރުކަމާއި، ޑިރެކްޓަރުކަމާއި، މިނިސްޓްރީ އޮފް އެޑިޔުކޭޝަންގެ ޑިރެކްޓަރުކަމާއި، ޖުޑީޝަލް ސަރވިސް ކޮމިޝަނުގެ އެސިސްޓެންޓް ޑިރެކްޓަރ ޖެނެރަލް ކަމާއި ޑެޕިއުޓީ ޑިރެކްޓަރ ޖެނެރަލްކަމުގެ މަގާމު ވެސް ވަނީ ފުރުއްވާފައެވެ.