ދިވެހީންނަށް ތަޖިކިސްތާނުން ވިސާ ލުއިކޮށްދީފި

ދުރާލައި ވިސާ ނެގުމަކާނުލައި ދިވެހީންނަށް ތަޖިކިސްތާނަށް އެތެރެވެވޭގޮތް އެގައުމުން ހަމަޖައްސައިދިނުމާ ގުޅިގެން އެގައުމުގެ ސަރުކާރަށާއި ޚާރިޖީވަޒީރަށް ދިވެހިރާއްޖޭގެ ޚާރިޖީވަޒީރު ޝުކުރު އަދާކުރައްވައިފިއެވެ.

ރާއްޖޭގެ ޚާރިޖީވަޒީރު އަބްދުﷲ ޝާހިދު ބުދަދުވަހު ކުރެއްވި ޓުވީޓެއްގައި ވިދާޅުވީ ދިވެހީންނަށް ކުރީބައިގައި ވިސާނެގުމަކާނުލައި ތަޖިކިސްތާނަށް ދެވޭނޭގޮތް ހަމަޖައްސައިދެއްވާފައިވާތީ އެގައުމުގެ ސަރުކާރާއި ޚާރިޖީވަޒީރު ސިރާޖުއްދީނު މުހުޔިއްދީނަށް ޝުކުރު އަދާކުރައްވާ ކަމުގައެވެ.

ދިވެހީންނަށް ތަޖިކިސްތާނުން ހަމަޖައްސައިދިން މިލުޔަކީ ދެގައުމުގެ މެދުގައި ސަގާފީގޮތުންނާއި ހަޟާރަތީގޮތުން ގުޅުންތައް އިތުރަށް ވަރުގަދަވެގެންދާނެ ކަމެއް ކަމުގައިވެސް އަބްދުﷲ ޝާހިދު ވަނީ ވިދާޅުވެފައެވެ.

ތަޖިކިސްތާނަކީ މެދުތެރޭ އޭޝިޔާގައިވާ އިސްލާމީ ޖުމްހޫރިއްޔާއެކެވެ. ކުރީގެ ސޯވިއެޓް ޔޫނިއަންގެ ބައެއްގެ ގޮތުގައި އޮވެފައި އެގައުމު ރޫޅިގެން ދިޔުމާ ގުޅިގެން ވަކި މިނިވަން މުސްތަގިއްލު ގައުމެއްގެ ގޮތުގައި ތަޖިކިސްތާނު ވުޖޫދަށް އައީ 1991 ގައެވެ. ގާތްގަޑަކަށް 10 މިލިޔަން މީހުންގެ އާބާދީއެއް އޮންނަ ތަޖިކިސްތާނާއި އިންވެގެންވާ ގައުމުތަކަކީ އަފްޣާނިސްތާނާއި ޗައިނާޔާއި އުޒްބެކިސްތާނާއި ކިރްގިސްތާނެވެ.

ވިސާއާ ނުލައި ދިވެހިންނަށް ތަޖިކިސްތާނަށް ދަތުރުކުރެވޭނީ 2022 ޖެނުއަރީ 1 އިން ފެށިގެންނެވެ. 2018 ނޮވެމްބަރުން ފެށިގެން މިހާތަނަށް ރަޝިޔާ، މޮރޮކޯ، ތައިލެންޑް އަދި ޔުނައިޓެޑް އަރަބް އެމިރޭޓްސްއަށް ކުރިން ވިސާއާ ނުލައި ދިވެހިންނަށް ދަތުރުކުރެވޭނެ އިންތިޒާމް ހަމަޖެހިފައިވާއިރު، އިންޑިއާ، ސްރީލަންކާ އަދި ސައުދީއަށް ދަތުރުކުރުމުގައި ވެސް އިތުރު ފަސޭހަތަކެއް ވަނީ ހަމަޖެހިފައެވެ.

މީގެ އިތުރުން ދިވެހިރާއްޖޭގައި ތިބެގެން ޔޫރަޕްގެ ބައެއް ގައުމުތަކުގެ ޝެންގެން ވިސާ ނެގޭނެ އިންތިޒާމު ވެސް ވަނީ ހަމަޖެހިފައެވެ.