އެސްޓީއޯއިން އިސްނަގައިގެން ދުނިޔޭގެ ހަކުރު ބަލީގެ ދުވަސް ރާއްޖޭގައި ފާހަގަކުރަނީ

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އިސްނަގައިގެން ދުނިޔޭގެ ހަކުރު ބަލީގެ ދުވަސް ފާހަގަކުރަން ނިންމައިފިއެވެ.

އެ ކުންފުނިން ބުނީ މިފަހަރުގެ ޕްރޮގްރާމު ހިންގަނީ ނެޝަނަލް ޑައެބެޓީސް ސެންޓަރާއި އައިޖީއެމްއެޗާއި މޯލްޑިވްސް ސޮސައިޓީ އޮފް އިންޓަރނަލް މެޑިސިންގެ އިތުރުން ފުވައްމުލައް ސިޓީ ކައުންސިލާއި ކަމާ ގުޅޭ ފަރާތްތައް ގުޅިގެން ކަމަށެވެ.

ނޮވެމްބަރު 14 ވަނަ ދުވަހަކީ ދުނިޔޭގެ ހަކުރު ބަލީގެ ދުވަހަށްވާއިރު މިފަހަރުގެ ޕްރޮގްރާމު ބޭއްވުމަށް ހަމަޖެހިފައިވަނީ ފުވައްމުލަކު ސިޓީގައެވެ.

މި ޕްރޮގްރާމުގެ ތެރެއިން ޑޮކްޓަރަށް ދެއްކުމާއި ހަކުރު ބަލީގެ ޓެސްޓް ހެދުމާއި ޓެލެމެޑިސިން ކްލިނިކެއް ގާއިމުކުރުމަކީ ވެސް މުހިންމުކަމެއް ކަމަށް އައިޖީއެމްއެޗުން ބުންޏެވެ. އަދި ފުވައްމުލަކު ސިޓީގައި މިފަހަރު މި ޕްރޮގްރާމު ކުރިއަށް ގެންދިޔުމަށް ނިންމީ އެއް ފަސްގަނޑަކަށް މީހުން ގިނަވެފައިވާ ރަށަކަށް އެ ސިޓީ ވާތީ ކަމަށެވެ.

މި ދުވަހާ ގުޅޭގޮތުން މައުލޫމާތު ދެއްވަމުން އައިޖީއެމްއެޗްގެ އެންޑޮކްރިނޮލޮޖީގެ ކޮންސަލްޓަންޓް ޑރ. މުހައްމަދު ސިރުހާން ވިދާޅުވީ ހަކުރު ބަލީގެ ދުވަހު އާންމުންނަށް ދޭން ބޭނުންވާ މެސެޖްތައް އެބަހުރި ކަމަށެވެ. އަދި ގައިން ގައިން ނާރާ ހުރިހާ ބަލިތަކަކީ ވެސް ބަލިން ރައްކާތެރިވެދާނެ ކަމެއް ކަމަށެވެ.

އެންޑޮކްރިނޮލޮޖީ ކޮންސަލްޓަންޓް ޑރ. އިބްރާހިމް ފައިސަލް ވިދާޅުވީ ހަކުރު ބަލި ކޮންޓްރޯލް ކުރުމަށް އާންމު ދިރިއުޅުމަށް ބައެއް މީހުން ބަދަލުތައް ގެންނަން ޖެހޭ ކަމަށެވެ. އަދި ކަސްރަތުކޮށް ހެލިފެލިވެ އުޅުމުން ބަލިތަކުން މީހާ ރައްކާތެރިކޮށްދޭނެ ކަމަށެވެ.

މިފަހަރުގެ ޕްރޮގްރާމުގެ ތެރެއިން ވަރަށް ބޮޑަށް އާންމުން މި ބައްޔަށް ހޭލުންތެރިކަން އިތުރުކުރުމަށް އިސްކަންދެވިގެންދާނެ ކަމަށް އައިޖީއެމްއެޗުން ބުންޏެވެ.