ޖުމްހޫރީ ނިޒާމަކަށް ވެރިކަން ބަދަލުކުރުމަކީ ޒަމާނާ ގުޅޭ ދިވެހި ވެރިކަމަކަށްޓަކައި ދިވެހިން ގެނައި ބޮޑު ބަދަލެއް
އަންނަން އޮތް ޖީލުތަކަށް ޖުމްހޫރީ ވެރިކަން ނަގުލުކޮށްދިނުމަކީ އަޅުގަނޑުމެންގެ ވާޖިބެއް
ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި މިނިސްޓަރ އޮފް ހޯމް އެފެއާޒް އައްޝައިޚް އިމްރާން އަބްދުﷲ ވާހަކަފުޅު ދައްކަވަނީ
ޖުމްހޫރީ ނިޒާމަކަށް ވެރިކަން ބަދަލު ކުރުމަކީ ޒަމާނާ ގުޅޭ ދިވެހި ވެރިކަމަކަށްޓަކައި ދިވެހިން ގެނައި ބޮޑު ބަދަލެއް ކަމަށް މިނިސްޓަރ އޮފް ހޯމް އެފެއާޒް އައްޝައިޚް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ. ދިވެހިރާއްޖޭގެ ޖުމްހޫރީ ވެރިކަމުގެ ތާރީޚަށް އަލިއަޅުއްވައި ވާހަކަ ދައްކަވަމުން މިނިސްޓަރ އިމްރާން ވިދާޅުވީ ދިވެހިރާއްޖޭގެ ވެރިކަން ހިންގުމުގެ ނިޒާމު ޖުމްހޫރީ ވެރިކަމަށް ބަދަލުވެގެން ދިޔަ ދިއުމަކީ ދިވެހިންގެ ހޭލުންތެރިކަމާއި ވިސްނުމާއި ކުރިއެރުން ބަދަލުވެގެން އައި މިންވަރު ވަރަށް ރީތިކޮށް ރަމްޒު ކޮށްދިން ކަމެއް ކަމަށެވެ.
މި ރޮނގުން ވާހަކަފުޅު ކުރިއަށް ގެންދަވަމުން މިނިސްޓަރ އިމްރާން ވިދާޅުވީ ދިވެހިން ޒަމާނަށް ލޯހުޅުވި ތަރައްޤީއާއި ދިވެހިންގެ ކުރިއެރުމަށް އެކުގައި މަސައްކަތް ކުރިކަން ދައްކައިދިން އަލިގަދަ ހަގީގަތެއް ކަމަށެވެ. އެގޮތުން ދިވެހިންގެ ކުރިއެރުމާއި އިޤްތިޞާދަށް ތަފާތު ބަދަލުތައް ގެނެސް އެންމެން އެކުވެ ޝާމިލުވެ ގުޅިގެން ހިންގާ ވެރިކަމުގެ ނިޒާމެއް ކުރީ ދިވެހިން ކަމަށް ވިދާޅުވިއެވެ.
މިނިސްޓަރ ވިދާޅުވީ މިއަދުގެ ސަރުކާރަށް ތިން އަހަރު ވެގެންދާއިރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް، މިއަދު ސާބިތު ކޮށްދެއްވަނީ ހަލަބޮލި ސިޔާސީ މާހައުލެއްގައި އިޤްތިޞާދީ ގޮންޖެހުން ބޮޑު ވަގުތެއްގައި ނުތަނަވަސް ކަމާއި ދަތިކަމުން އެއްކިބާވެ ޖުމްހޫރީ ވެރިކަމުގެ މަތިވެރިކަމާއެކު ހަލަބޮލިކަމާއި ހަމަނުޖެހުމާއި ނުލައި އަމާންކަމާއި ރައްކާތެރިކަމާއެކު ސަރުކާރު ހިންގުމުގައި ހުރިހާ ރައްޔިތުން ބައިވެރިކޮށްގެން ޖުމްހޫރީ ވެރިކަމެއް ކުރެވިދާނެ ކަމުގެ ފުރިހަމަ ހަގީގަތް ކަމަށެވެ. ހޯމް މިނިސްޓަރ ވިދާޅުވީ އަންނަން އޮތް ޖީލުތަކަށް ޖުމްހޫރީ ވެރިކަން ނަގުލުކޮށްދިނުމަކީ އަޅުގަނޑުމެންގެ ވާޖިބެއް ކަމަށެވެ.
މިނިސްޓަރ އިމްރާން އަބްދުﷲ ވިދާޅުވީ ގޮތުގައި 2013 ވަނަ އަހަރު ޖުމްހޫރީ ނިޒާމުގައި ޖެހުނު ކުޑަ ގޮށެއްގެ ސަބަބުން ޖުމްހޫރީ ދުވަހަށް ކޮންމެވެސް ވަރެއްގެ ކިލަނބު ކަމަކާއި އައިބު ކަމެއް އައިސްފައިވާ ކަމުގައެވެ. އެހެން ނަމަވެސް 2023 ވަނަ އަހަރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އެ ގޮށް މުއްސަވައި ދެއްވައި ޖުމްހޫރީ ދުވަހުގެ ހައިބަތާއި ޤަދަރާއި ޝަރަފު އަނބުރާ ގެނެސްދެއްވާނެ ކަމަށް އުއްމީދު ކުރައްވާ ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވިއެވެ.
