އިނގިރޭސިވިލާތުގެ މެންޗެސްޓާ ސިޓީގައި ދެވުނު ބޮމުގެ ހަމަލާއާ ގުޅިގެން ދިހަ ވަނަ މީހާ އިނގިރޭސި ފުލުުހުން ހައްޔަރުކޮށްފިއެވެ.

ހޯމަ ދުވަހުގެ ރޭ މެންޗެސްޓާ ސިޓީގެ މެންޗެސްޓާ އެރީނާ އަށް ދިން ޖާނުންފިދާވުމުގެ ހަމަލާގައި 22 މީހުން މަރުވިއެވެ.  މިހާތަނަށް ދިހަ މީހުުން ހަމަލާ އާއި ގުޅިގެން ހައްޔަރުކޮށްފައިވާއިރު ދެމީހުން ވަނީ ފަހުން ދޫކޮށްލާފައެވެ. ދޫކޮށްލައިފައިވަނީ 16  އަހަރުގެ ފިރިހެން ކުައްޖަކާއި 34 އަހަރުގެ އަންހެނެކެވެ. އެ ދެމީހުންނަށް ވެސް ދައުވާއެއް އުފުލާފައި ނުވެއެވެ. ހައްޔަރުކޮށްފައި ތިބި އަށް މީހުންނަކި ވެސް ޓެރަރިޒަމާ ގުޅޭ ކުށްތަކުގައި ހައްޔަރުކޮށްފައިވާ މީހުން ކަމަށް ފުލުހުން ބުނެއެވެ.

އިނގިރޭސި ފުލުހުން ގަބޫލުކުރާ ގޮތުން މެންޗެސްޓާ އެރީނާގައި ޖާނުންފިދާވެގެން ހަމަލާ ދިން ސަލްމާން އަބެދީ އަކީ ނެޓްވޯކަކަށް ނިސްބަތްވާ ލީބިއާ ދަރިކޮޅުގެ މީހެކެވެ.

ހޯމަ ދުވަހު މެންޗެސްޓަރ އެރީނާގައި ދިން ބޮމުގެ ހަމަލާގައި 22 މީހުން މަރުވެ 116 މީހުން ޒަޚަމްވިއިރު މަރުވި މީހުންގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ.

އެމެރިކާގެ މަޝްހޫރު ލަވަކިޔުންތެރިޔާ އާރިއާނާ ގްރާންޑޭގެ ޝޯވއަށް ފަހު މެންޗެސްޓަރ އެރީނާއަށް ދީފައިވާ ބޮމުގެ ހަމަލާގެ ޒިންމާ އިސްލާމިކް ސްޓޭޓް ނުވަތަ އައިއެސް އިން ވަނީ ނަގައިފައެވެ. ހަމަލާ ދިން ވަގުތު އެތަނުގައި ތިބި ބައެއް ފަރާތްތަކުން ބުނީ، ބޮން ގޮއްވާފައިވަނީ އާރިއާނާ ފަހު ލަވަ ނިންމާލާ "ޝުކުރިއްޔާ މެންޗެސްޓަރ"އޭ ބުނެ ސްޓޭޖުން ފޭބި ވަގުތު ކަމަށެވެ.  މި ހަމަލާގައި އާރިއާނާއަށް އަނިޔާއެއް ވެފައެއް ނުވާއިރު، އޭނާވަނީ އެކަމާ ގުޅިގެން "ހިތުގައި ޖެހިއްޖެ"ކަމަށް، ޓްވިޓާކޮށްފަ އެވެ.