އެންމެ ދަރަނި ބޮޑު ސަރުކާރަކީ ރައީސް ޔާމީނުގެ ސަރުކާރު: އަމީރު
އެއީ ދުނިޔޭގެ އިްތިޝާދު ވަރަށް ރަނގަޅަށް އޮތް ދުވަސްވަރެއް
އެކި ސަރުކާރުތަކުގައި ދަރަނީގެ މިންވަރު
އެއް ދައުރެއްގައި އެންމެ ދަރަނި ބޮޑު ސަރުކާރަކީ ރައީސް ޔާމީނުގެ ސަރުކާރުކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
2022 ވަނަ އަހަރަށް ލަފާކުރާ ބަޖެޓާ ގުޅޭގޮތުން ރައްޔިތުންގެ މަޖިލީހުގައި ވާހަކަ ދައްކަވަމުން މިނިސްޓަރ ވިދާޅުވީ ސީދާ ރައީސް ޔާމީނުގެ ސަރުކާރަށް ނިސްބަތްވާ 39.6 ބިލިޔަން ރުފިޔާގެ ދަރަނި އޮތްކަމަށެވެ. ރައީސް މައުމޫނުގެ ސަރުކާރުގައި ދަރަނި އޮތީ 6.2 ބިލިއަން ރުފިޔާގައެވެ. އަދި 2008ން 2012ށް ރައީސް ނަޝީދުގެ ވެރިކަމުގައި 11.3 ބިލިއަން ރުފިޔާ ޚަރަދުކޮށްފައި ވާއިރު، ރައީސް ވަޙީދުގެ ދައުރުގައި ދަރަނި އޮތީ 6.2 ބިލިއަން ރުފިޔާގައެވެ.
މުޅި ދުނިޔޭގެ ތާރީޚުގައި ކުރިމަތިވެފައިވާ އެންމެ ބޮޑު އިޤްތިޞާދީ ހީނަރުކަމުގެ ތެރޭގައި ވެސް މިސަރުކާރުން މިހާތަނަށް ރެކޯޑުކޮށްފައިވަނީ 34 ބިލިއަން ރުފިޔާގެ ދަރަނިކަމަށް މިނިސްޓަރ ވިދާޅުވިއެވެ. މިއާ ޚިލާފަށް ރައީސް ޔާމީނުގެ ސަރުކާރަކީ ރާއްޖޭގެ އިތުރުން މުޅި ދުނިޔޭގެ އިޤްތިޞާދު ވެސް އެންމެ ހަލުވި ދުވެލީގައި ހިނގަމުން ދިޔަ ދުވަސްވަރެވެ.
އެހެން ކަމުން މިސަރުކާރުން ދަރަނީގެ ގޮތުގައި ރެކޯޑު ކޮށްފައިވާ 34 ބިލިއަން ރުފިޔާގެ ތެރެއިން 250 މިލިއަން ޑޮލަރަށްވާ ދިވެހި ރުފިޔާ މިއަހަރުގެ ތެރޭގައި އުނި ވެގެންދާނެއެވެ.
މީގެ އިތުރުން ލޯން އެގްރީމެންޓުގެ ގޮތުގައި ސޮއިކޮށްފައިވާ އަދަދަށް ބަލާއިރު، ރައީސް ޔާމީނުގެ ސަރުކާރުގައި 58.9 ބިލިއަން ރުފިޔާ ކޮންޓްރެކްޓް ކުރެވިފައި ވާއިރު، މިސަރުކާރުގައި ކޮންޓްރެކްޓް ކުރެވިފައި ވަނީ 51.1 ބިލިއަން ރުފިޔާއެވެ.
މިބަޖެޓާއެކު ރާއްޖޭގެ ރައްޔިތުން ފާގަތި މުސްތަޤްބަލަކަށް ގެންގޮސްދިނުމަށް ކޮންމެވެސް ވަރެއްގެ ޙައްލެއް ލިބޭނެ ކަމަށް މިނިސްޓަރ ވިދާޅުވިއެވެ.
އެގޮތުން 2023 ވަނަ އަހަރު ނިމުމުގެ ކުރިން ދަތުރުފަތުރުގެ ނިޒާމުން މުޅި ރާއްޖެ ގުޅާލުމާއި، 11،000 ހައުސިންގ ޔުނިޓް ގާއިމުކުރުމުގެ އިތުރުން ރާއްޖޭގެ ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކުރާނެކަން މިނިސްޓަރ ވަނީ ފާހަގަކުރައްވާފައެވެ.
އަދި މިސަރުކާރުން ހިންގަމުން އައި ގިނަ މަޝްރޫޢުތަކެއް ކޮވިޑުގެ ސަބަބުން ހުއްޓިފައިވީ ނަމަވެސް 2022 ވަނަ އަހަރުގެ ތެރޭގައި އެމަސައްކަތްތައް ނިމިގެންދާނެކަމަށް މިނިސްޓަރ ވިދާޅުވިއެވެ. ހަލުވި ދުވެލީގައި މި މަސައްކަތްތައް ކުރިއަށް ގެންދިޔަ ނަމަވެސް ރަނގަޅު ކޮލިޓީގައި މި މަސައްކަތްތައް ނިންމައި، ދިގު މުއްދަތަކަށް ރައްޔިތުންނަށް މީގެ ފައިދާ ކުރާނެ ގޮތަކަށް މަސައްކަތް ކުރިއަށް ގެންދިއުމަށް ވަރަށް ބޮޑު އިސްކަމެއް ދެއްވާނެ ކަމަށް މިނިސްޓަރ ވިދާޅުވިއެވެ.
ރައީސް ޔާމީނުގެ ސަރުކާރުގައި ހަދާފައިވާ 7،000 ހައުސިންގ ޔުނިޓުގައި މީހުން ދިރިއުޅެން ފެށުމުގެ ކުރިން އެތަން ތަޅާލުމަށްފަހު މީހުންނަށް އުޅެވޭނެ ހާލަތަށް އެތަން ގެންނަން ޖެހުނެވެ. މީގެ ސަބަބުން ދައުލަތުގެ ޚަރަދުތައް ބޮޑުވެފައިވާކަން ފާހަގަކުރައްވައި މިނިސްޓަރ ވިދާޅުވީ އެގޮތަށް ކަންތައްވިޔަ ނުދެއްވާނެ ކަމަށެވެ.
