އެސްއޯއީ އަދި ޕީއައިއީގެ ދެ ގަވައިދު އިފްތިތާޙުކޮށްފި

ސްޓޭޓް އޯންޑް އެންޓަރޕްރައިސް އަދި ޕަބްލިކް އިންޓެރެސްޓް އެންޓީޓީ (ޕީއައިއީ)އާ ބެހޭ ދެ ގަވައިދެއް އޮޑިޓަރ ޖެނެރަލް އޮފީސް އަދި އިންސްޓިޓިއުޓް އޮފް ޗާޓާޑް އެކައުންޓްސް އޮފް މޯލްޑިވްސްއިން އިފްތިތާޙު ކޮށްފިއެވެ.

އަންގާރަ ދުވަހު ތަޢާރަފްކުރި މި ދެ ގަވައިދަކީ "ރެގިއުލޭޝަން އޮން އޮޑިޓް އެންޑް އެކައުންޓަބިލިޓީ އޮފް އެސްއޯއީސް" އަދި "ރެގިއުލޭޝަން އޮފް ޕަބްލިކް އިންޓެރެސްޓް އެންޓިޓީ އޮޑިޓަރސް" އެވެ.

އޮޑިޓަރ ޖެނެރަލް އޮފީހުގައި އަންގާރަ ދުވަހު ބޭއްވި ރަސްމިއްޔާތުގައި މި ދެ ގަވައިދު އިފްތިތާޙުކޮށްދެއްވީ ފިނޭންސް މިނިސްޓަރ އިބްރާހިމް އަމީރެވެ.

މި ރަސްމިއްޔާތުގައި މިނިސްޓަރ އަމީރު ވިދާޅުވީ މިއީ މިވަގުތަށް ވަރަށް މުހިންމު ދެގަވައިދު ކަމަށާއި މީގެ ސަބަބުން މިނިސްޓްރީން ކުރަމުން އަންނަ މަސައްކަތްތަކަށް ވެސް ވަރަށް ބޮޑަށް ލުއިފަސޭހަކަމެއް ލިބިގެންދާނެ ކަމަށެވެ. އަދި ސަރުކާރުގެ ކުންފުނިތަކުން ކުރާ މަސައްކަތްތަކަކީ ދެފުށްފެންނަ މަސައްކަތްތަކަކަށްވާނެ ކަމަށާއި، އަދި އެ ކުންފުނިތަކުން ކުރާ މަސައްކަތްތައް އަވަސްވެގެންދާނެ ކަމަށެވެ.

މި ދެ ގަވައިދާއެކު ޕީއައިއީތަކުން ހަދާ އޮޑިޓްތަކަކީ ގާނޫނީ ގޮތުން ފުރިހަމަ ކުރަން ޖެހޭ ހުރިހާކަމެއް ފުރިހަމަކޮށް، ޕްރޮފެޝަނަލް ސްޓެންޑާޑަށް ފެތިފައިވާ އޮޑިޓްތަކެއްކަން ކަށަވަރު ކުރެވިގެންދާނެއެވެ. އަދި އިތުބާރު ކުރެވޭފަދަ ރަނގަޅު ކޮލިޓީއެއްގައި ހުރި އޮޑިޓްތަކަކަށް ވެގެންދާނެއެވެ. މީގެ އިތުރުން ޕީއައިއީ އޮޑިޓަރެއްގެ ގޮތުގައި ރަޖިސްޓަރވުމަށް ފުރިހަމަކުރަންޖެހޭ ޝަރުތުތަކާއި ރަޖިސްޓަރ ވާންޖެހޭ ޕްރޮސީޖަރ މިގައިވައިދުގެ ދަށުން ވަނީ އެކުލަވާލާފައެވެ. ހަމައެހެންމެ އޮޑިޓުތަކާއި އޮޑިޓަރުންގެ ފެންވަރު ވަޒަންކުރެވި، އެފަރާތްތަކުގެ ރެޖިސްޓްރޭޝަން ކެންސަލް ކުރެވޭނެ ގޮތް ވެސް މި ދެ ގަވައިދުގައި ބަޔާންކޮށްފައިވެއެވެ.

މި ދެ ގަވައިދުގެ ދަށުން ކުންފުނިތަކުގެ ފައިދާ، ލިކުއިޑިޓީ، ގިއަރިންގ، ސޮލްވެންސީ، އަދި އެފީޝިއެންސީ ރޭޓު ވަޒަން ކުރެވިގެންދާނެއެވެ. މީގެ ސަބަބުން ކުންފުނި އިތުރަށް ހަރުދަނާވެ، ހިއްސާދާރުންނާ ހަމައަށް އެންމެ އެކަށީގެންވާ ތެދު މައުލޫމާތު ފޯރުކޮށްދެވިގެން ދާނެއެވެ.

ކުންފުނިތަކުން ހަދާ އޮޑިޓް ރިޕޯޓުތައް ވަޒަންކޮށް އޮޑިޓަރ ޖެނެރަލް އޮފީހުން މިއޮޑިޓްތައް އެކި ފަންތީގައި ރޭޓު ކުރާނެއެވެ.