ބަޖެޓް 2026: ފިނޭންސް މިނިސްޓްރީގެ ވަރުގަދަ އިންޒާރު މުއިއްޒު ސަރުކާރަށް - މުސާރައިގެ ހޭދަ މައްޗަށް ދާނަމަ ޚަރަދު ނުހިފެހެއްޓޭ ހިސާބަށް ދާނެ!
ދައުލަތުގެ މުވައްޒަފުންގެ މުސާރައަށް ކުރާ ހޭދަ 17 ބިލިއަނަށް އަރައި ޚަރަދު ނުހިފެހެއްޓޭ ލެވެލަށް ދާން ފަށައިފި
ފިނޭންސް މިނިސްޓްރީގެ ޑެފިއުޓީ މިނިސްޓަރ އަހުމަދު ސާއިދު މުސްތަފާ (ކަނާތުން ދެވަނަ އަށް) 2026 ވަނަ އަހަރަށް ލަފާކޮށް ހުށަހަޅަފައިވާ ބަޖެޓުގައި މިނިވަން މުއައްސަސާތަކަށް ކަނޑައަޅާފައިވާ ބަޖެޓާ ގުޅޭގޮތުން ކުރެވުނު މަޝްވަރާ ތަކުގައި.
ދައުލަތުން މުސާރަ އަށް ކުރާ ހޭދަ މައްޗަށް ދާނަމަ ޚަރަދުތައް ނުހިފެހެއްޓޭ ހިސާބަށް ހިނގައިދާނެ ކަމަށް ބުނެ ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީ އަށް ފިނޭންސް މިނިސްޓްރީ އިން އިންޒާރު ދީފި އެވެ.
ކޮމިޓީ އަށް މައުލޫމާތު ދެއްވަމުން ފިސްކަލް ޖާގަ މިދަނީ ހަނިވަމުން ކަމަށާއި "އެއީ ވައިގެ ތެރެއިން އުފެދިގެން އަންނަ އެއްޗެެއް ނޫން،" ކަމަށާއި އެއީ އާމްދަނީ އާއި ޚަރަދު ވަކި ގޮތަކަށް އެކަށަ އެޅިގެން އަންނަ އެއްޗެއް ކަމަށް ފިނޭންސް މިނިސްޓްރީގެ ޑެޕިއުޓީ މިނިސްޓަރ އަހްމަދު ސާއިދު މުސްތަފާ ވިދާޅުވި އެވެ.
އޭނާ ވިދާޅުވީ، މި އަހަރުގަ ވެސް ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލް ހުޅުވިގެން ދިއުމާ އެކީގައި "މިއިން ޒަމާނަކު ނުދޭހާ ގިނަ އެޕްރޫވަލް ވަޒީފާ ތަކަށް ދެވިއްޖެ" ކަމަށެވެ.
ޚަރަދު ތައް މައްޗަށް ދާއިރު ސާއިދުވަނީ ޕާފޯމަންސް ބޭސްޑް ބަޖެޓިންގ އަށް ސަރުކާރުގެ ތެރެއިން އެއްބާރުލުން ނުލިބޭކަން ފާހަގަ ކުރައްވާފައެވެ.
އޭނާ ވިދާޅުވީ، މިނިސްޓްރީން ޕާފޯމަންސް ބޭސްޑް ބަޖެޓެއް ކުރިއަށް ގެންދަން މަސައްކަތް ކުރާތާ އަހަރުތަކެއް ވެއްޖެ ކަމަށާއި، އެހެން ނަމަވެސް އިދާރާތަކުން "ޓެކްނިކަލް ފެންވަރުގަ ވެސް އެންމެ އެދެވޭ އެހީތެރި ކަމެއް އަދި ނުލިބޭ، ކަމަށެވެ.
އޭނާ ވިދާޅުވީ، ދާއިމަށް މި ގޮތައް މުވައްޒަފުން އިތުރު ކުރަމުން ދިއުމަކީ ދައުލަތައް އޭގެ ބުރަ ބޮޑުވާނެ ކަމެއް ކަމަށެވެ.
އޭނާ އިތުރަށް ވިދާޅުވީ މިހާރު އަންދާޒާ ކުރެވޭ މުސާރަ އަށް ކުރެވޭ ހޭދަ، މިހާރު ކަނޑައެޅިފައިވާ މިންވަރަށް ވުރެ ބޮޑު ވަމުންދާ ނަމަ މާލީ ގޮތުން ޚަރަދު ނުހިފެހެއްޓޭ ލެވެލް އަށް ދިއުމަކީ އެކަށީގެންވާ ކަމެއް ކަމުގައެވެ.
އާމްދަނީ ގެ ގޮތުގައި 40 ބިލިއަން ލިބޭނެ ކަމަށް އަންދާޒާ ކޮށްފައިވާއިރު، 17 ބިލިއަން މުސާރަ އަށް ހޭދަވާނެ ކަމަށް އޭނާ ވިދާޅުވިއެވެ. ކުރީ ސަރުކާރުގެ ވެރިކަމުގެ ފަހު އަހަރު މުވައްޒަފުންގެ ހަރަދު ހުރީ 12.8 ބިލިއަން ރުފިޔާގަ އެވެ.
ސާއިދު ވިދާޅުވީ، ކުންފުނިތަކުގެ މުސާރަ އާއި ހިންގުމުގެ ޚަރަދު ތަކަށް ވެސް ފިނޭންސް މިނިސްޓްރީން ފައިސާ ފޯރުކޮށްދޭ ކަމަށެވެ.
ކުރިއަށް އޮތް އަހަރަށް ލަފާ ކުރާ ދައުލަތުގެ ބަޖެޓުގައި މުސާރަ އާއި އުޖޫރައަށް 8.6 ބިލިއަން ރުފިޔާ ކަނޑައަޅާފައިވާއިރު، އިނާޔަތްތަކަށް 6.1 ބިލިއަން ރުފިޔާ އަދި ޕެންޝަނަށް 2.3 ބިލިއަން ރުފިޔާ ވަނީ ހިމަނާފަ އެވެ. މިއީ މިދިޔަ އަހަރަށް ވުރެ 2.4 ބިލިއަން ރުފިޔާ އިތުރު އަދަދެކެވެ.
