އަހަރުގެ މިހާތަށް ލިބުނު އެއްޗަކަށް ވުރެ އިތުރަށް 1.9 ބިލިއަން ރުފިޔާ ޚަރަދު ކޮށްފި
ހިންގުމުގެ ޚަރަދުތައް ފާހަގަ ކުރެވޭ މިންވަރަކަށް މައްޗަށް ގޮސްފައިވާއިރު ކެޕިޓަލް ޚަރަދުތައް ވަރަށް ބޮޑަށް ދަށުގައި ހުރުމުން ތަރައްގީގެ މަޝްރޫއުތައް އެކަށީގެންވާ ގޮތެއްގައި ކުރިއަށް ނުގެންދާކަން ފާހަގަ ކުރެވޭ.
އެތައް މިނިސްޓްރީތަކެއް އަނދާ ހުލިބި އަލިފާނުގެ ހާދިސާއާ ގުޅިގެން ޗައިނާ ސަރުކާރުން ދިން އެހީތެރިކަން ފިނޭންސް މިނިސްޓަރު މޫސާ ޒަމީރު ހަވާލުކުރަން ބޭއްވި ރަސްމިއްޔާތުގެ ތެރެއިން
ފިނޭންސް މިނިސްޓްރީން އެންމެ ފަހުން ހާމަ ކުރި މާލީ ހިސާބުތަކުން ދައްކާ ގޮތުގައި ޑިސެމްބަރު 11 ވަނަ ދުވަހުގެ ނިޔަލަށް ދައުލަތައް ލިބުނު އެއްޗަކަށް ވުރެ އިތުރަށް 1.9 ބިލިއަން ރުފިޔާ ހޭދަ ކޮށްފި އެވެ.
ޖުމްލަ އާމްދަނީ މިހާތަށް އައި އިރު 36.0 ބިލިއަން ރުފިޔާއަށް އަރާފައިވާ އިރު، މީގެ ބޮޑު ބައެއް ހިއްސާ ކުރަނީ ޓެކްސް ގެ ގޮތުގައި ލިބުނު ފައިސާ އެވެ. މިގޮތުން އެންމެ ބޮޑު ހިއްސާ އެއް އައިސްފައި ވަނީ ޓޫރިޒަމް ގުޑްސް އެންޑް ސާވިސަސް ޓެކްސް އިންނެވެ. ޖުމްލަ ޓެކްސް އާމްދަނީ 26.9 ބިލިއަން ރުފިޔާ އަށް އަށް އަރާފައިވާއިރު، ޓެކްސް ނޫން އާމްދަނީގެ ގޮތުގައި ލިބިފައިވަނީ 8.8 ބިލިއަން ރުފިޔާ އެވެ.
ޚަރަދަށް ބަލާއިރު، ޖުމްލަ 37.9 ބިލިއަން ރުފިޔާ މިހާތަނަށް ވަނީ ޚަރަދު ކޮށްފަ އެވެ. އޭގެ ތެރޭގައި އެންމެ ބޮޑު އެއްޗެއް ހޭދަ ކޮށްފައި ވަނީ ރިކަރަންޓް ޚަރަދުގެ ގޮތުގައެވެ. މުސާރަ، އުޖޫރަ، އަދި ޕެންޝަނަށް އަހަރުގެ މިހާތަނަށް 13.4 ބިލިއަން ރުފިޔާ ޚަރަދު ކޮށްފައި ވެއެވެ. އިދާރީ އަދި އޮޕަރޭޝަނަލް ހަރަދުތައް 19.2 ބިލިއަން ރުފިޔާ އަށް ވަނީ އަރާފަ އެވެ. ސަބްސިޑީގެ ގޮތުގައި 3.4 ބިލިއަން ރުފިޔާ ޚަރަދު ކޮށްފައިވެ އެވެ.
ހިންގުމުގެ ޚަރަދުތައް ފާހަގަ ކުރެވޭ މިންވަރަކަށް މައްޗަށް ގޮސްފައިވާއިރު ކެޕިޓަލް ޚަރަދުތައް 5.4 ބިލިއަން ރުފިޔާގެ ދަށް މިންވަރެއްގައި ހުރިކަން ފާހަގަކުރެވެ އެވެ. އަހަރު ނިމެން ކައިރިވެފައިވާ އިރު ކެޕިޓަލް ޚަރަދުތައް މިހާ ދަށުގައި ހުރުމުން ތަރައްގީގެ މަޝްރޫއުތައް ހިންގުމަށް އެކަށީގެންވާ މަސައްކަތްތަކެއް ސަރުކާރުން ކޮށްފައި ނުވާކަން ހާމަވެ އެވެ.
