ރާއްޖޭގެ ފަތުރުވެރިކަމުގެ ކުރިމަގާމެދު ސުވާލު އުފައްދަން ފަށައިފި

ދިވެހިރާއްޖޭގެ އިގްތިސާދުގެ އެންމެ ބޮޑު ބައެއް ހިއްސާކުރާ ސިނާއަތަކީ ފަތުރުވެރިކަމުގެ ސިނާއަތެވެ. އިގްތިސާދުގެ 45 އިންސައްތަ މި ސިނާއަތުން ހިއްސާކުރާއިރު، މި ސިނާއަތަކީ ރާއްޖޭގޭ އިގްތިސާދަށް ނުހަނު މުހިންމު ސިނާއަތެކެވެ. މި ސިނާއަތުގެ މުހިންމުކަން މި ފަހުންވެސް ވަނީ ވަރަށް ބޮޑަށް ސާފުވެފައެވެ. އެއީ ކޮވިޑް-19 ގެ ހާލަތާއެކު މުޅި ގައުމު ލޮކްޑައުންކުރަން ޖެހުނު ހިސާބުންނެވެ.

ކޮންމެ ސިނާއަތަކަށްވެސް އެކި އެކި ގޮންޖެހުން ދިމާވާހެން މި ސިނާއަތަށްވެސް އެކި ގޮންޖެހުންތައް ދިމާވެއެވެ. އެގޮތުން ކޮވިޑް-19 އަކީ މިފަދަ ގޮންޖެހުމެކެވެ. އަދި މިހާރު އެންމެ ދެކެވެމުންދާ އެއް ވާހަކަ ކަމަށްވާ މޫސުމީ ބަދަލުތަކަކީވެސް ގޮންޖެހުމެކެވެ. ރާއްޖޭގެ ފަތުރުވެރިކަން މިހާ ދުވަސްވަންދެންވެސް ދެމި މިއޮތީ ރާއްޖެއަށް ލިބިފައިވާ ގުދުރަތީ ރީތިކަމުގެ ސަބަބުންނެވެ. މޫސުމީ ބަދަލުތަކަކީ ރާއްޖޭގެ ގުދުރަތީ ނިޒާމަށް ނޭދެވޭ އަސަރުތަކެއް ކުރާނެ ކަމެކެވެ.

ރާއްޖެއަކީ އެހެން ގައުމުތަކާ އަޅާ ބަލާއިރު ތިރިކޮށް އުފެދިފައި އޮތް ގައުމަކަށްވެފައި، ނާޒުކު ތިމާވެއްޓެއް ލިބިގެންވާ ގައުމަކަށް ވުމާއެކު، މިފަދަ ގައުމަކުން މޫސުމީ ބަދަލުތަކުގެ އަސަރު މާ ބޮޑަށް ފެނިގެންދާނެއެވެ. މިކަމަށް ހައްލު ހޯދުމަށް ރާއްޖެއިން މި ވާހަކަތައް ދުނިޔޭގެ ފެންވަރުގެ އެކި ފޯރަމްތަކުގައި ދައްކަމުންދާއިރު، މިއީ ރާއްޖޭގެ ފަތުރުވެރިކަމަށް އެޅިދާނެ ހިޔަންޏަކަށް ވެދާނެތޯ ގިނަ ބަޔަކު ސުވާލު އުފައްދަމުންދެއެވެ. މި ދުވަސްވަރަކީ ބޭރު ދުނިޔެއަށް ރާއްޖެ އިޝްތިހާރު ކުރުމަށް މަސައްކަތްތަކެއް ކުރެވެމުންދާ ދަނޑިވަޅަކަށް ވުމާއެކު މިކަމާއި ގުޅިގެން ޓުއަރިޒަމް މިނިސްޓަރ ޑރ އަބްދުﷲ މައުސޫމް ވިދާޅުވީ ދާދި ފަހުން ލަންޑަންގައި ކުރިއަށްދިޔަ ޑަބްލިއުޓީއެމް ސަމިޓުގައިވެސް އެ ވާހަކަތައް އައި ކަމަށެވެ. އެމްއެމްޕީއާރުސީއާއެކު ބޭއްވި ނޫސްވެރިންގެ ބައްދަލުވުމެއްގައިވެސް އެ ސުވާލު އައި ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ މި ޒަމާނަކީ އީޖާދީ އެކި ކަންކަން ތައާރަފުވަމުން އަންނަ އިރެއް ކަމަށެވެ. އެހެންކަމުން މި ދިމާވާ ގޮންޖެހުންތަކުން ސަލާމަތްވާނެ ގޮތްތަކެއްވެސް ހޯދުމަށް މަގުފަހިވެގެންދާނެ ކަމަށް މިނިސްޓަރ ވިދާޅުވިއެވެ. ދުނިޔެ ހޫނުވުމުގެ މައްސަލައިގައި ރާއްޖެއިން ހިއްސާކުރަނީ ވަރަށް ކުޑަ މިންވަރެއް ކަމަށް މިނިސްޓަރ ވިދާޅުވިއެވެ. އެހެންނަމަވެސް މި ކަމުގެ ނޭދެވޭ އަސަރުތައް އެންމެ ފުރަތަމަ ކުރަމުންދަނީ ރާއްޖެއަށް ކަމަށާއި، އެހެންކަމުން ދުނިޔެ ހޫނުވުމުގެ އެންމެ ބޮޑު ހިއްސާއެއް އޮތް ގައުމުތަކުން ރާއްޖެއިން މިކަމުން ސަލާމަތްވުމަށް އެހީވެދިނުމަށް މިނިސްޓަރ އެދިލެއްވިއެވެ. އެހެން ބައެއްގެ ނޭއްގާނީ އަމަލުތަކެއްގެ ސަބަބުން އޭގެ އަސަރު ރާއްޖެއަށް ކުރުމަކީ ބަލައިގަނެވޭނެ ކަމެއް ނޫން ކަމަށް މިނިސްޓަރ ވިދާޅުވިއެވެ.

މޫސުމީ ބަދަލުތަކާއި ގުޅިގެން ރާއްޖެއަށް ކުރެވެން ހުރި ކަންކަން މިހާރުވެސް ގެންދަނީ ކުރަމުންނެވެ. އެގޮތުން އިއާދަކުރަނިވި ހަކަތަ ބޭނުންކުރާ މިންވަރު އިތުރުކުރުމާއި، ޕްލާސްޓިކް ބޭނުންކުރުން ހުއްޓުވުމަށް ކުރަމުންދާ މަސައްކަތްތަކާއިި، 2030 ވަނަ އަހަރުގެ ކުރިން ނެޓް ޒީރޯއަށް ވާސިލްވުމަށް ކުރަމުންދާ މަސައްކަތްތައް ހިމެނެއެވެ. މިކަމުގެ ހެޔޮ އަސަރު ސީދާ ރާއްޖޭގެ އިގްތިސާދަށްވެސް ކުރާނެއެވެ. ފަތުރުވެރިކަން ރަނގަޅުވެގެންދާނެއެވެ.

ރާއްޖޭގެ ފަތުރުވެރިކަމަށް ބަލާލާއިރު، ކޮވިޑް-19އާއި ގުޅިގެން ރާއްޖޭގެ ފަތުރުވެރިން އެއްކޮށް ހުއްޓުމަކަށް އައުމަށްފަހު މިހާރު ވަނީ ކޮވިޑްގެ ކުރިން ރާއްޖޭގެ ފަތުރުވެރިކަން އޮތް ހިސާބަށް އަނބުރާ ވާސިލްވުމަށް މިސްރާބު ޖަހާފައެވެ. މިކަން ޓުއަރިޒަމް މިނިސްޓަރވެސް ފާހަގަކުރެއްވިއެވެ. ރާއްޖެއިން މިހާރު ވަނީ މިއަހަރަށް ކަނޑައެޅި އެއް މިލިއަން ފަތުރުވެރިން ގެނައުމުގެ އަމާޒުވެސް ހާސިލްކޮށްފައެވެ. އަދި މިހާރު ވަނީ އަހަރު ނިމުމުގެ ކުރިން 1.3 މިލިއަން ފަތުރުވެރިން ގެނައުމަށް އައު އަމާޒެއް ކަނޑައަޅާފައެވެ. ކޮވިޑް-19ގެ އިތުރު ރާޅަކާ ކުރިމަތިލާން ނުޖެހޭނަމަ މި އަމާޒަށް ވާސިލްވެވޭނެ ކަން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ފާހަގަކުރައްވައެވެ.