އެމްޑީޕީގެ ކޮންމެ މެނިފެސްޓޯއެއްގައި ހިމެނިފައިވާ އަދި އެޖެންޑާ 19ގައިވެސް ބުނެފައިވާ އެންމެ ކުޑަ އުޖޫރަ ކަނޑައެޅިއްޖެ
އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު
ރާއްޖޭގެ މަސައްކަތްތެރިންނަށް ކަންކަން ކަށަވަރުކޮށްދިނުމަކީ އަބަދުވެސް އެމްޑީޕީގެ އަމާޒެއްކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
އެކަމަށްޓަކައި ސަރުކާރާއި މަޖިލީހަށް މަރުހަބާ ވިދާޅުވެ ރައީސް ނަޝީދު ކުރެއްވި ޓްވީޓެއްގައި ވިދާޅުވީ, އެމްޑީޕީގެ ކޮންމެ މެނިފެސްޓޯއެއްގައި ހިމެނިފައިވާ އަދި އެޖެންޑާ 19ގައި ވެސް ބުނެފައިވާ އެންމެ ކުޑަ އުޖޫރަ ކަނޑައެޅިއްޖެކަމަށެވެ. ރާއްޖޭގައި އެންމެ ފުރަތަމަ ފަހަރަށް މިނިމަމް ވޭޖް ނުވަތަ އެންމެ ދަށް މުސާރަ ކަނޑައަޅައި, ހޯމަ ދުވަހު އިކޮނޮމިކް މިނިސްޓަރ ވަނީ އެކަން އިއުލާންކުރައްވާފައެވެ. މިނިމަމް ވޭޖް ކަނޑައެޅުމަކީ އެމްޑީޕީން ރިޔާސީ އިންތިޚާބުގައި ވެސް އަދި ރައްޔިތުންގެ މަޖިލީހުގެ އިންތިޚާބުގައިވެސް ވެފައިވާ ވައުދެކެވެ.
މިނިމަމް ވޭޖް ކަނޑައެޅުމާ ގުޅިގެން އެމްޑީޕީން ވެސް ވަނީ ސަރުކާރަށް މަރުހަބާ ކިޔާފައެވެ. އެކަމާގުޅިގެން އެމްޑީޕީން ނެރުނު ނޫސްބަޔާނުގައި ބުނެފައިވަނީ, މިނިމަމް ވޭޖް ކަނޑައެޅުމަކީ އެމްޑީޕީގެ އަދި ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ވަރަށް މުހިއްމު ވައުދެއްކަމުގައިވާ، ވަޒީފާއަދާކުރާ ފަރާތްތަކަށް ދިވެހިރާއްޖޭގައި ދެވޭ އެންމެ ކުޑަ އުޖޫރަ ސަރުކާރުން ކަނޑައަޅުއްވައި އިޢުލާނުކުރައްވާފައިވާތީ، މި ތާރީޚީ ދުވަސް ފާހަގަކޮށް މި ޕާރޓީން ވަރަށް ހޫނު މަރުހަބާއެއް ކިޔާކަމުގައެވެ.
އެމް.ޑީ.ޕީން ރާއްޖޭގެ ރައްޔިތުންނަށާއި އަދި ވަޒީފާއަދާކުރާ ފަރާތްތަކަށް ބޮޑެތި ހެޔޮ ބަދަލު ގެނައުމަށް ގެންގުޅޭ ތަސައްވުރާއި ސިޔާސަތުގެ ދަށުން، ވަޒީފާއަދާކުރާ ފަރާތްތަކަށް ދިވެހިރާއްޖޭގައި ދެވޭ އެންމެ ކުޑަ އުޖޫރަ ކަނޑައެޅުމުގެ މަސައްކަތް ސަރުކާރުން ކުރައްވައި، އެގޮތުން ދެވޭ އެންމެ ކުޑަ އުޖޫރަ ކަނޑައަޅުއްވައި ވަނީ އިއުލާނުކުރައްވާފައެވެ. އެ ވައުދު ފުރިހަމަ ކުރުމުގެ ގޮތުން ވަޒީފާއާ ބެހޭ ގާނޫނަށް ގެންނަންޖެހޭ ބަދަލު އެޖެންޑާ-19ގެ މަސައްކަތްތަކުގެ ދަށުން މީގެކުރިން ރައްޔިތުންގެ މަޖިލީހުން ފާސްކުރެއްވުމާއެކު، މިނިމަމް ވޭޖް އެޑްވައިޒަރީ ބޯޑުން މަސައްކަތްކުރައްވައި އެރުވި ލަފާއާއެކު މިނިސްޓަރ އޮފް އިކޮނޮމިކް ޑިވެލޮޕްމެންޓް ވަނީ އެންމެ ކުޑަ އުޖޫރަ އިއުލާނުކުރައްވާފައެވެ.
ވަޒީފާއަދާކުރާ ފަރާތްތަކަށް ދެވޭ އެންމެ ކުޑަ އުޖޫރަ ކަނޑައަޅައި ތަންފީޒުކުރަންފެށުމުގެ ސަބަބުން, އަޚުލާގީ، އިޖްތިމާއީ އަދި އިގުތިސާދީ ގޮތުން ވަށާޖެހޭ އުސޫލަކުން ހެޔޮ ބަދަލުތަކެއް، ވަޒީފާއަދާކުރާ ފަރާތްތަކަށާއި ވަޒީފާދޭ ފަރާތްތަކަށާއި އިގުތިސާދަށާއި އަދި ރާއްޖެއަށް އަންނާނޭކަމަށް އެ ޕާރޓީން ދެކޭކަމަށެވެ. އަދި އެންމެހައި ފަރާތްތަކުން އިޚްލާސްތެރިކަމާއެކު މި ސިޔާސަތު ތަންފީޒުކުރައްވަމުން ގެންދަވާނޭކަމަށް އުންމީދުކުރާކަމަށްވެސް އެމްޑީޕީގެ ބަޔާނުގައި ބުނެފައިވެއެވެ.
