ޑްރޯން ހަމަލާތަކަށްފަހު އިރާގުގެ ބޮޑުވަޒީރުގެ ހާލުކޮޅު ރަނގަޅު ކަމަށް އަސްކަރިއްޔާއިން ހާމަކޮށްފި

އިރާގުގެ ބޮޑުވަޒީރު ދިރިއުޅުއްވާ ގެކޮޅަށް ދިން ޑްރޯން ހަމަލާތަކަށްފަހު ބޮޑުވަޒީރުގެ ހާލުކޮޅު ރަނގަޅު ކަމަށް އިރާގުގެ އަސްކަރިއްޔާއިން ބުނެފިއެވެ.

ބޮޑުވަޒީރު މަރާލަން އުޅުނު ކަމަށް އިރާގުގެ އަސްކަރިއްޔާއިން ބުނާ ޑްރޯން ހަމަލާތައް ދީފައިވަނީ އާދީއްތަ ދުވަހުގެ ފަތިހުގެ ވަގުތެއްގައެވެ. އަދި ބޮޑުވަޒީރު ދިރިއުޅުއްވާ ގެކޮޅަށް އަމާޒުކޮށް ބޮން ތަކެއް ގޮއްވާލި ނަމަވެސް، ބޮޑުވަޒީރު ވިދާޅުވީ އެއްވެސް ގެއްލުމެއް ނުލިބި ސަލާމަތްވެފައިވާ ކަމަށެވެ.

ސަލާމަތީ މަސްދަރުތަކުން ބުނާ ގޮތުގައި މި ހަމަލާގައި ބޮޑުވަޒީރުގެ ޕާސަނަލް ޕްރޮޓެކްޝަން ޑީޓެއިލްގެ ގިނަ ބަޔަކަށް އަނިޔާވި އިރު، މި ހަމަލާ ދީފައިވަނީ މިދިޔަ މަހު އިރާގުގެ ވެރިރަށް ތެހެރާނުގައި ބޭއްވި އާންމު އިންތިޚާބުގެ ނަތީޖާއާ ގުޅިގެން ކުރި މުޒާހަރާތައް ހޫނުވެ، ހަމަނުޖެހުންތައް އިތުރުވުމާ ގުޅިގެންނެވެ. އެމެރިކާގެ ސްޓޭޓް ޑިޕާޓްމަންޓުން ވަނީ މި ހަމަލާ ކުށްވެރިކޮށްފައެވެ. އަދި ތަހުގީގަށް އެހީތެރިކަން ފޯރުކޮށްދިނުމަށް ވެސް ހުށަހަޅާފައިވެއެވެ.

"އިރާގުގެ ދައުލަތުގެ މައި ތަނބަށް އަމާޒުކޮށް ދިން ޓެރަރިޒަމްގެ މި ފާޅުކަން ބޮޑު އަމަލު އަޅުގަނޑުމެން ވަރަށް ބޮޑަށް ކުށްވެރިކުރަން" ތަރުޖަމާނު ނެޑް ޕްރައިސް ނެރުއްވި ބަޔާނެއްގައި ވިދާޅުވިއެވެ. "އިރާގުގެ ސިޔާދަތާއި މިނިވަންކަން ދެމެހެއްޓުމުގެ ދައުވާ އުފުލާފައިވާ އިރާގުގެ ސަލާމަތީ ބާރުތަކާ އަޅުގަނޑުމެން މިދަނީ ވަރަށް ގާތުން މުއާމަލާތް ކުރަމުން، މި ހަމަލާ ތަހުގީގު ކުރަމުންދާއިރު އަހަރުމެންގެ އެހީތެރިކަން ވަނީ ހުށަހަޅާފައި."

އިރާގު ސިފައިންގެ ކޮމާންޑަރު އިން ޗީފްގެ ތަރުޖަމާނަކު ވިދާޅުވެފައި ވަނީ، ޑްރޯން ހަމަލާއަށްފަހު ސަރުކާރުގެ އިމާރާތްތަކާއި، ބޭރުގެ އެމްބަސީތައް ހުންނަ ބަޣުދާދުގެ ފޯރިގަދަ ގްރީން ޒޯންގެ ތެރޭގައި ސަލާމަތީ ހާލަތު ސްޓޭބަލް ކަމަށެވެ.

"މި ހަމަލާ ދިނީ ކާކުކަން ބުނަން އަދި މާ އަވަސް،" ސަލާމަތީ ތަފުސީލުތަކަށް ކޮމެންޓް ކުރުމުގެ ހުއްދަ ލިބިފައި ނުވާތީ، ނަން ހާމަ ނުކުރުމަށް ޝަރުތުކޮށް ސެކިއުރިޓީ އޮފިޝަލް ވިދާޅުވިއެވެ. "އަޅުގަނޑުމެންގެ އިންޓެލިޖެންސް ރިޕޯޓްތައް ޗެކްކޮށް، އިނީޝިއަލް އިންވެސްޓިގޭޝަން ނަތީޖާގެ އިންތިޒާރުގައި އަޅުގަނޑުމެން މި ތިބީ ކުށްވެރިންނަށް އިނގިލި ދިއްކުރާނެ ވަގުތަކަށް އިންތިޒާރު ކޮށްގެން" ކަމަށް ވެސް ސެކިއުރިޓީ އޮފިޝަލް ވިދާޅުވިއެވެ.

ގްރީން ޒޯންގައި ހުންނަ ބޮޑުވަޒީރު ދިރިއުޅުއްވާ ގެއަށް ދިން ހަމަލާގެ ޒިންމާ އަދި އެއްވެސް ޖަމާއަތަކުން އުފުލާފައެއް ނުވެއެވެ. ގްރީން ޒޯން ކައިރީގައި ގާއިމްވެ ތިބި ހުޅަނގުގެ ޑިޕްލޮމޭޓުން ވިދާޅުވީ، އެ ސަރަހައްދުގައި ގޮއްވާލި ބޮމާއި ބަޑީގެ އަޑު އިވުނު ކަމަށެވެ.

ފާއިތުވެދިޔަ އަހަރުތަކުގައި ޕާލަމެންޓާއި ސަރުކާރުގައި ބާރު ފުޅާކޮށްފައިވާ އީރާނާ ގުޅިފައިވާ މިލިޝިއާ ގްރޫޕްތަކަށް ތާއީދުކުރާ ފަރާތްތަކުން ވަނީ އޮކްޓޯބަރު މަހު ބޭއްވި އިންތިޚާބުގެ ނަތީޖާއާ ދެކޮޅަށް މުޒާހަރާކޮށްފައެވެ. ހުކުރު ދުވަހު މުޒާހަރާގެ ބައިވެރިން ގްރީން ޒޯން ކައިރީގައި ފުލުހުންނާ ދިމާއަށް ގަލުން ހަމަލާދީ، މުޒާހަރާގެ ބައިވެރިން ވަނީ ހަމަނުޖެހުން ފާޅުކޮށް އެތައް އޮފިސަރުންނަކަށް އަނިޔާކޮށްފައެވެ.

ބަޣުދާދުގެ ސެކިއުރިޓީ އަދި ހޮސްޕިޓަލުގެ މަސްދަރުތަކާ ހަވާލާދީ ބައިނަލްއަގުވާމީ މީޑިއާއިން ރިޕޯޓްކުރާ ގޮތުގައި، ފުލުހުން ރައްދުގައި ކަރުނަ ގޭހާއި، ލައިވް ބަޑީގެ ހަމަލާތައް ދީ މުޒާހަރާކުރާ މީހެއް މަރާލާފައިވެއެވެ. މިނިވަން ތަޖްރިބާކާރުން ވިދާޅުވާ ގޮތުގައި އިންތިޚާބުގެ ނަތީޖާއަކީ އީރާނުން ވާގިވެރިވާ ހަތިޔާރު އެޅި ޖަމާއަތްތަކާމެދު ރުޅިވެރިކަން ފާޅުކުރުމުގެ ގޮތުން ނެރުނު ނަތީޖާއެއް ކަމުގައެވެ.