އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހަކު މަރާލާފައިވާ ކަމުގެ ތުހުމަތާއެކު އޭނާގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ގެންގޮސް، ޕޯސްޓްމޯޓަމް ހެދުމަށްފަހު ހަށިގަނޑު އަނބުރާ ގެނެސްފިއެވެ.
މައުލޫމާތު ލިބޭ ގޮތުގައި އޭނާއަކީ އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރާ މޭރީ ގްރޭސް ނަމަކަށް ކިޔާ ނަރުހެކެވެ. އޭނާގެ މަރުގެ މައްސަލައިގައި ހައްޔަރުކުރީ އޭނާގެ ފިރިމީހާއެވެ. އެއީވެސް އައިޖީއެމްއެޗްގައި މަސައްކަތް ކުރަމުންދާ ނަރުހެކެވެ.
ނަރުސް މީހާ މަރާލި ކަމުގެ ތުހުމަތުގައި ހައްޔަރު ކުރީ 29 އަހަރުގެ ފިލިޕީންސްގެ ފިރިހެނެެއް ކަމަށް ފުލުހުންވަނީ ބުނެފައެވެ. މަރުގެ ތުހުމަތުގައި އޭނާ ހައްޔަރުކުރީ 27 އޮކްޓޯބަރު ވީ ބުދަ ދުވަހުއެވެ. އޭނާ ހައްުޔަރުކޮށް ބަންދާ މެދު ގޮތެއް ނިންމުމަށް 28 އޮކްޓޯބަރުގައި ކްރިމިނަލް ކޯޓަށް ހާޒިރުކުރުމުން އެ ކޯޓުން އޭނާގެ ބަންދަށް 15 ދުވަސް ވަނީ ޖަހާފައެވެ.
މި މަރާ ގުޅިގެން ފުލުހުން ތުހުމަތުތައް ކުރަން ފެށީ ދަން ޖެހިފައި ހުރި ކަމަށް ބުނެ ނަރުސް މީހާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
