ކުދި ގައުމުތައް ދުނިޔެއިން ފޮހެވިގެން ދިޔަ ނުދިނުމަށް، ދުނިޔޭގެ ފިނިހޫނުމިން 1.5 ޑިގްރީއަށްވުރެ މައްޗަށް ދިޔަ ނުދީ ހިފެހެއްޓުން މުހިންމު ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވީ ކޮޕް26ގެ ލެޖިސްލޭޓަރސް ސަމިޓުގައި ބައިވެރިވެވަޑައިގެން ވާހަކަދައްކަވަމުންނެވެ. މޫސުމީ ބަދަލުތަކުގެ ސަބަބުން ރާއްޖެ ފަދަ ކުޑަ ގައުމަކުން ފެންނަ އަސަރުތައް މާ ބޮޑު ކަމަށާއި ރާއްޖެއަކީ ވަރަށް ތިރީގައި އޮތް ގައުމެއް ކަމުން ކަނޑުގެ ލޮނުގަނޑު އުފުލޭ މިންވަރަކުން ރަށްތައް ގިރުމާއި މިނޫންވެސް އެފަދަ ކަންކަން މިހާރު ފެންނަމުންދާކަމަށް ރައީސް ނަޝީދު ވިދާޅުވިއެވެ.
ދުނިޔޭގެ ފިނި ހޫނުމިން މިހާރު ހުރި ވަރުން ޖައްވު ހޫނުވުމާއި، ހުއްޓާނުލާ ވިއްސާރަވެހުމާއި، ހޫނު ގަދަ މޫސުން ދިގު މުއްދަތަކަށް ދެމިގެންދިއުމާއި، މުރަކަތައް މަރުވުމާއި، ކަނޑުގައި އުޅޭ ދިރުންތައް މަދުވުމާއި، ފެން ތަޣައްޔަރުވުންފަދަ ކަންކަން މިހާރުވެސް ދިމާވަމުންދާކަމަށް ރައީސް ނަޝީދު ވިދާޅުވިއެވެ. މީގެ އަހަރުތަކެއް ކުރިން ނުފެންނަ އެތައް ކަމެއް މިހާރު ފެންނަމުންދާކަމަށް ރައީސް ނަޝީދު ވަނީ ވިދާޅުވެފައެވެ. ކޮޕް26 އެހާ މުހިންމުވާ ސަބަބަކީވެސް އެއީ ކަމަށް ވިދާޅުވިއެވެ.
ރައީސް ނަޝީދު ވިދާޅުވީ މިއީ ދުނިޔޭގެ ފިނިހޫނުމިން 1.5 ޑިގްރީގައި ބެހެއްޓުމަށް ކަނޑައަޅާފައިވާ އަމާޒަށް ވާސިލްވުމަށް ލިބޭ އެންމެ ފަހު ފުރުސަތަށްވުން ވެސް އެކަށީގެންވާ ކަމަށެވެ. ރާއްޖޭގެ ކަނޑުފަޅުތަކުގެ ދިރުންތަކާއި މުރަކަތައް ނެތިދިޔަ ނުދިނުމަށާއި، ރާއްޖެ ފެނުން މަތީގައި ބޭއްވުމަށް އަދި ކުދި ގައުމުތައް ދުނިޔެއިން ފޮހެވިގެން ދިޔަ ނުދިނުމަށް، ދުނިޔޭގެ ފިނިހޫނުމިން 1.5 ޑިގްރީއަށްވުރެ މައްޗަށް ދިޔަ ނުދީ ހިފެހެއްޓުން މުހިންމު ކަމަށް ރައީސް ނަޝީދު ވިދާޅުވިއެވެ.
މީގެ އިތުރުން ރައީސް ނަޝީދު ވަނީ ބޯޓު ދެލި އެންދުމުގެ މައްޗަށް އަލިއަޅުވާލައްވާފައެވެ. ބޯޓު ދެލި އެންދުމަކީ މޫސުމީ ބަދަލުތަކަށް އެންމެ ބޮޑަށް މަގުފަހިކުރުވާ ކަންތައް ކަމުގައި ރައީސް ނަޝީދު ވިދާޅުވިއެވެ. އެހެންކަމުން ގައުމުތަކުން ނެޓް ޒީރޯއަށް ވާސިލްވުމަށް އަމާޒުހިފާފައިވާތީ އެކަމަށް މަރުހަބާ ކިޔާ ކަމަށް ރައީސް ނަޝީދު ވިދާޅުވިއެވެ.
އަދި 2024 ވަނަ އަހަރުގެ ކުރިން 500 ބިލިއަން ޑޮލަރު ނުލިބިއްޖެނަމަ މޫސުމީ ބަދަލުތައް ހުއްޓުވުމަށް ކުރާ މަސައްކަތުގައި ކުރިއެރުންތަކެއް ލިބޭނެކަމުގެ އުންމީދު ގެއްލޭނެ ކަމަށް ރައީސް ނަޝީދު ވަނީ ވިދާޅުވެފައެވެ. އެހެންކަމުން ކޮޕް26 ނިމުމުގެ ކުރިން މިކަމަށް ނިންމުންތަކެއް ނިންމަންޖެހޭކަމަށް ވިދާޅުވިއެވެ.
