ޔޫރަޕްގައި ކޮވިޑްގެ ހާލަތު އަނެއްކާވެސް ގޯސްވަނީ

ޔޫރަޕްގެ ގައުމުތަކުގައި ކޮވިޑް-19 ޖެހޭ މީހުންނާއި ކޮވިޑް ޖެހިގެން މަރުވާ މީހުންގެ އަދަދު އިތުރުވަމުން އަންނަކަމަށް ޑަބްލިޔުއެޗްއޯގެ ޔޫރަޕްގެ ހެޑް ވިދާޅުވެއްޖެއެވެ.

ޔޫރަޕްގެ 53 ގައުމުގައި ކޮވިޑް މިހާރު ފެތުރެމުން އަންނަނީ ނުރައްކާތެރި މިންވަރަކަށް ކަމަށާއި ކޭސްތައް ކުރިޔަށް އޮތްތަނުގައި ރިކޯޑް މިންވަރަކަށް މައްޗަށް ދާނެކަމަށް ޑަބްލިޔުއެޗްއޯގެ ޔޫރަޕްގެ ހެޑް, ހާންސް ކްލުގް ވިދާޅުވިއެވެ. އެހެންކަމުން ކޮވިޑް ފެތުރުން ކޮންޓްރޯލްކުރުމަށް ގައުމުތައް ގުޅިގެން މަސައްކަތްކުރަންޖެހޭކަމަށް ހާންސް ވިދާޅުވިއެވެ.

ޔޫރަޕް ސަރަހައްދުގައި މިހާރު ކޭސްތައް އިތުރުވާ މިންވަރު ހުރީ 6 އިންސައްތައިގައެވެ. ފާއިތުވި ހަފްތާގައި މުޅި ޔޫރަޕްގައި 1.8 މިލިއަން ކޭސް ފެނިފައިވެއެވެ. އަދި ހަމަ މިމުއްދަތުގައި ކޮވިޑް ޖެހިގެން މަރުވި މީހުންގެ އަދަދު ވަނީ 12 އިންސައްތަ އިތުރުވެފައެވެ.

ހާންސް ވިދާޅުވީ މިހާރު މިދާގޮތަށް ދާނަމަ ޔޫރަޕުން ކުރިޔަށްއޮތް ފެބްރުއަރީ މަސް އަންނަންވާއިރަށް ފަސް ލައްކަ މީހުން އިތުރަށް މަރުވާނެކަމަށެވެ.

މިހާރު ދުނިޔޭގެ ހާލަތަށް ބަލާއިރު ޔޫރަޕާއި މެދުތެރޭ އޭޝިޔާގެ ގައުމުތަކުގައި ކޮވިޑްގެ ހާލަތު އަންނަނީ ގޯސްވަމުންނެވެ.