ބޭނުންޖެހިފައިވާ ފަރާތްތަކަށް އަޅާލުމާއި އުފާވެރިކަން ހޯދައި ނުދެވޭ މުޖުތަމައަކީ ބަދުނަސީބު މުޖުތަމައެއް - އިމްރާން
ނުކުޅެދުންތެރިކަން ހުރި ފަރާތްތަކަށް އަޅާލުމަށްޓަކައި އެފަރާތްތަކަކީ މުޖުތަމައުގެ ފުރިހަމަ ބައިވެރިންގެ ގޮތުގައި ހެދުމަށް ސަރުކާރުން ޕްރޮގްރާމްތައް ހިންގާ
ލޯފަން ކުދިންގެ ޖަމުޢިއްޔާގެ ވެބްސައިޓް ހޯމް މިނިސްޓަރ އިފްތިތާހުކޮށްދެެއްވަނީ
މުޖުތަމައުގެ ތެރޭގައި ދިރިއުޅޭ އެންމެ ބޮޑަށް ބޭނުންޖެހިފައިވާ ފަރާތްތަކަށް ފުރިހަމަ އަޅާލުމާއި އުފާވެރިކަން ލިއްބައި ނުދެވޭ މުޖުތަމައަކީ ވަރަށް ބަދުނަސީބު، އަބާއްޖަވެރި މުޖުތަމައެއް ކަމަށް މިނިސްޓަރ އޮފް ހޯމް އެފެއާޒް އައްޝައިޚް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ އިމްރާން މިހެން ވިދާޅުވީ ލޯފަން ކުދިންގެ ޖަމްޢިއްޔާ، ބްލައިންޑް އެންޑް ވިޜުއަލީ އިމްޕެއަރޑް ސޮސައިޓީ އޮފް މޯލްޑިވްސްއިން މާލޭގައި ކުރިއަށް ގެންދިޔަ އެ ސޮސައިޓީގެ އަހަރީ ކޭމްޕް ނިންމުމުގެ ރަސްމިއްޔާތު ޝަރަފުވެރި ކޮށްދެއްވައި ވާހަކަ ދައްކަވަމުންނެވެ.
ހޯމް މިނިސްޓަރ ވިދާޅުވީ މުޖުތަމައެއްގެ ބަދަހިކަމާ އުފާވެރިކަމާއި، ދުޅަހެޔޮކަން ވަޒަން ކުރުމުގެ އެންމެ މުހިންމު މިންގަނޑަކީ އެ މުޖުތަމައެއްގައި ދިރިއުޅޭ އެހެން އަފްރާދުންނާއި އެންމެ ބޮޑަށް ބޭނުންޖެހިފައިވާ ފަރާތްތަކަށް އެ މުޖުތަމައަކުން ލިއްބައިދޭ އެހީތެރިކަމާއި އޯގާވެރިކަމާއި އުފާވެރިކަން ކަމަށެވެ. މި ރޮނގުން ވާހަކަ ދައްކަވަމުން މިނިސްޓަރ އިމްރާން ވިދާޅުވީ ޔޫތް މިނިސްޓްރީއާ ގުޅިގެން ލޯފަން ކުދިންގެ ޖަމްޢިއްޔާއިން ކުރިއަށް ގެންދިޔަ ކޭމްޕަކީ އެތައް އަޚުންނަކާއި، އުޚްތުންނެއްގެ ހިތަށް އުފާވެރިކަން ގެނެސްދިނުމަށްޓަކައި ވަރަށް މުހިންމު ޕްރޮގްރާމެއް ކަމަށެވެ.
މިނިސްޓަރ ވިދާޅުވީ ހުރިހާ މިނިސްޓްރީތަކުން އަދި ދައުލަތުގެ ހުރިހާ މުއްސަސާތަކުން މިކަމާ އަޅާލުމަށް ވަރަށް ބޮޑު ސަމާލުކަމެއް ލޯފަން ކުދިންގެ ޖަމްޢިއްޔާގެ ފަރާތުން ގެނެސްދެވިދާނެ ކަމަށެވެ. އަދި ހަފްތާއެއްގެ ނިޔަލަށް ހިންގި ކޭމްޕުގެ ސަބަބުން އެކަމަށް ވަރަށް ބޮޑަށް މަގުފަހިކޮށްދިންކަން މިނިސްޓަރ އިމްރާންގެ ވާހަކައިގައި ވަނީ ފާހަގަކުރައްވާފައެވެ.
އަދި މިއީ އަޅުގަނޑުމެން އެންމެން އެދިމާއަކަށް މަސައްކަތް ކުރަންވީ ދިމާ ކަމަށާއި، ޚާއްސަކޮށް އިސްލާމީ މުޖުތަމައެއްގެ މިފަދަ ޙާޖަތާއި ބޭނުންތެރިކަން ޖެހިފައިވާ އަފްރާދުންނަށް އެހީތެރިކަން ފޯރުކޮށްދިނުމަށްޓަކައި ޤުރުއާނާއި ސުންނަތާއި ރަސޫލުއްﷲ ސައްލައްﷲ އަލައިހި ވަސައްލަމަގެ ސީރަތުގައި ވަރަށް މަތިވެރި ނަމޫނާތައް އެބަހުރި ކަމަށް މިނިސްޓަރ އިމްރާން އަބްދުﷲ ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރ އިމްރާން އަބްދުﷲ ވަނީ، ރާއްޖޭގައި ތިބި ނުކުޅެދުންތެރިކަން ހުރި ފަރާތްތަކަށް އަޅާލުމަށްޓަކައި އެފަރާތްތަކަކީ މުޖުތަމައުގެ ފުރިހަމަ ބައިވެރިންގެ ގޮތުގައި ހެދުމަށް ސަރުކާރުގެ ފަރާތުން ހިންގަވާ ޕްރޮގްރާމްތަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށާއި ޔޫތް މިނިސްޓަރ އަހުމަދު މަހުލޫފަށް ޝުކުރު އަދާކުރައްވާފައެވެ.
މނިސްޓަރ ވިދާޅުވީ ރާއްޖޭގެ އާބާދީއަށް ބަލާއިރު ތަފާތު ނުކުޅެދުންތެރިކަން ހުރި ހުރިހާ ކުދިންނަށް އަޅާލާނެ ގާބިލްކަމާއި ފުދުންތެރިކަން އެބަހުރި ކަމަށާއި ބޭނުންވަނީ އެކަންކަން ރަނގަޅަށް ތަރުތީބުކޮށްގެން ހިންގުން ކަމަށެވެ. އަދި އެކުދިންނަށް ޓަކައި ދޭންޖެހޭ ފުރިހަމަ ތައުލީމާއި ތަމްރީނާއި ހުނަރު ދީގެން، މުޖުތަމުގައި ބޭނުންހިފޭނެ ބަޔަކަށް ހެދުމަށްޓަކައި އެންމެން ގުޅިގެން މަސައްކަތް ކުރަންޖެހޭކަމަށް ވެސް މިނިސްޓަރ ވިދާޅުވިއެވެ. ހޯމް މިނިސްޓަރ ވިދާޅުވީ އިސްނަގައިގެން ރަނގަޅު ނިޒާމެއްގެ ތެރެއިން ތަރުތީބުވެގެން، ޚާއްސަކޮށް ޔޫތް މިނިސްޓްރީން އެމަސައްކަތަށް އިތުރަށް ސަމާލުކަމެއް ދެއްވާނެ ކަމަށް އުއްމީދު ކުރައްވާ ކަމަށެވެ.
އަދި އެ މަސައްކަތުގައި ސަރުކާރުގެ ހުރިހާ މުވައްސަސާތައް ބައިވެރިވެ މަދަނީ ޖަމްއިއްޔާ ޖަމާއަތްތައް ބައިވެރިކޮށް ހުރިހާ ކުދިންނަކީ އުފާވެރި ހިތްހަމަޖެހޭ ހަޔާތެއް ވޭތުކޮށް އަދި މުޖުތަމުގައި އެކުދިންނަށް ފުރިހަމަ ދައުރަކާއި ފުރިހަމަ މަގާމެއް ލިބިގެންވާ ބަޔަކަށް ހަދައިދިނުމުގެ މަސައްކަތް ކުރެވިގެންދާނެ ކަމަށް އުއްމީދު ކުރައްވާ ކަމަށެވެ.
މިނިސްޓަރ ޢިމްރާން ވަނީ ލޯފަން ކުދިންގެ ޖަމްއިއްޔާގެ ވެބްސައިޓް ލޯންޗްކޮށްދެއްވުމުގެ އިތުރުން އެޖަމްއިއްޔާގެ މަދަހަ އަލްބަމް ވެސް ނެރެދެއްވާފައެވެ.
