ޗެމްޕިއަންސް ލީގުގައި ރެއާލަށް 1000 ލަނޑު

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ގްރޫޕް ޑީގައި ކުޅުނު މެޗުން ޝަޚްތާރު ޑޮނިއެސްކް އަތުން މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް މެޑްރިޑް މޮޅުވިއިރު، މި މުބާރާތުގައި ރެއާލުން 1،000 ލަނޑު ހަމަކޮށްފިއެވެ.

އަމިއްލަ ދަނޑުގައި ކުޅުނު މެޗުން ރެއާލް މޮޅުވީ 2-1 ގެ ނަތީޖާއަކުންނެވެ.

މި މެޗު ފަށައިގެން 14 ވަނަ މިނެޓުގައި ވިނީޝިއުސް ޖޫނިއާ ދިން ބޯޅައަކުން ރެއާލުގެ ކެޕްޓަން ކަރީމް ބެންޒެމާ ވަނީ އެ ޓީމަށް ލީޑު ނަގައިދީފައެވެ. މިއީ ރެއާލުން ޗެމްޕިއަންސް ލީގުގައި ކާމިޔާބުކުރި 1،000 ވަނަ ލަނޑެވެ. އެއާއެކު ރެއާލް ވެފައިވަނީ މި މުބާރާތުގެ ތާރީޚުގައި 1،000 ލަނޑު ޖެހި ފުރަތަމަ ޓީމެވެ. އެގޮތުން މި ލިސްޓުގެ ދެވަނައިގައި އޮތީ 768 ލަނޑު ޖަހާފައިވާ ބަޔާން މިއުނިކެވެ. އަދި ތިންވަނައިގައި އޮތީ 655 ލަނޑު ހަމަކޮށްފައިވާ ބާސެލޯނާއެވެ.

ބެންޒެމާގެ ލަނޑުން މި މެޗުގައި ރެއާލުން ލީޑު ނެގި ނަމަވެސް، ފުރަތަމަ ހާފު ނިމުމުގެ ކުރިން ޝަޚްތާރުން ވަނީ ނަތީޖާ އެއްވަރުކޮށްފައެވެ. މި ހާފު ނިމެން ހަ މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ ފެނާންޑޯއެވެ.

މި މެޗުގައި ރެއާލުން އަލުން ލީޑު ނަގާފައިވަނީ މެޗުގެ 61 ވަނަ މިނެޓުގައެވެ. މި ލަނޑުވެސް އެ ޓީމަށް ކާމިޔާބުކޮށްދިނީ ބެންޒެމާއެވެ. އެއާއެކު ބެންޒެމާ ވަނީ މި ސީޒަނުގެ ހުރިހާ މުބާރާތެއްގައި މިހާތަނަސް ކުޅުނު 14 މެޗުން 13 ލަނޑު ޖަހާފައެވެ. އެކަމަކު މި މެޗުގެ ދެވަނަ ހާފުގައި ލިބުނު އަނިޔާއަކާ ގުޅިގެން ބެންޒެމާ ވަނީ ބަދަލުކޮށްފައެވެ.

މި މޮޅާއެކު ގްރޫޕް ޑީގެ އެއްވަނައިގައި ރެއާލް އޮތީ ކުޅުނު ހަތަރު މެޗުން ލިބުނު ނުވަ ޕޮއިންޓާއެކުއެވެ. ދެވަނައިގައި އޮތީ ބުދަ ދުވަހުގެރޭ ޝެރިފް އަތުން 3-1 ގެ ނަތީޖާއަކުން މޮޅުވި އިންޓަ މިލާނެވެ. އެ ޓީމަށް ވަނީ ހަތަރު މެޗުން ހަތް ޕޮއިންޓް ލިބިފައެވެ. އަދި ތިންވަނައިގައި އޮތް ޝެރިފަށް ހަތަރު މެޗުން ހަ ޕޮއިންޓް ލިބިފައިވާއިރު، ފުލުގައި އޮތް ޝަޚްތާރަށް ހަތަރު މެޗުން ލިބިފައިވަނީ އެންމެ ޕޮއިންޓެކެވެ.