އީރާންގެ ނިއުކްލިއަރ މުއާހަދާގެ މަޝްވަރާތައް މި މަހުގެ 29ގައި ފަށަނީ

އީރާންގެ ނިއުކްލިއަރ މުއާހަދާގެ މަޝްވަރާތައް މި މަހުގެ 29ގައި ފަށަން ނިންމައިފިއެވެ.

އީރާންގެ ޚާރިޖީ ވަޒީރުގެ އެހީތެރިޔާ އަލީ ބާގިރީ ވިދާޅުވީ އެ ޤައުމުގެ ސަރުކާރުން މި މަހުގެ 29 ވަނަ ދުވަހު ޤައުމުތަކާއެކު ވިއެނާގައި ބައްދަލުކުރުމަށް ނިންމާފައިވާ ކަމަށެވެ. އީރާނުގެ ނިއުކްލިއަރ މުއާހަދާ އިން ވަކި އިމެއްގައި ހިފެހެއްޓުމަށް، 2015 ވަނަ އަހަރު އެމެރިކާ އާއި ވިލާތުގެ ގައުމުތަކުން އީރާނާ އެކުގައި ސޮއިކޮށްފައިވާ ނިއުކްލިއަރ މުއާހަދާގައި އެމެރިކާ އަލުން ބައިވެރިވެ، ފުރިހަމައަށް އަމަލުކުރާނެ ކަމަށް އެމެރިކާގެ ރައީސް ޖޯ ބައިޑެން ވަނީ ދާދި ފަހުން ވިދާޅުވެފައެވެ.

ބައިޑެންގެ ސަރުކާރުން ބުނެފައިވަނީ އީރާންގެ ނިއުކްލިއަރ މުއާހަދާގެ މަޝްވަރާގައި އެ ޤައުމުން އިނގިރޭސިވަލާތާއި ޗައިނާ، ފްރާންސް، ޖަރުމަންވިލާތުގެ އިތުރުން ރަޝިއާއެކު ބައިވެރިވާނެ ކަމަށެވެ.

އީރާންގެ ނިއުކްލިއާ މުއާހަދާއިން އެމެރިކާ އަމިއްލައަށް ވަކިވީ 2018 ވަނަ އަހަރުގެ ތެރޭގައި އެމެރިކާގެ އޭރުގެ ރައީސް ޑޮނަލްޑް ޓްރަމްޕު ނެރުއްވި ރިޔާސީ ގަރާރަކުންނެވެ. އެމެރިކާއިން ވަނީ އޭގެފަހުން އީރާނަށް ދަތިކުރުމުގެ ފިޔަވަޅު އަޅާފައެވެ. އެމެރިކާ އާއި ދުނިޔޭގެ ބޮޑެތި ބާރުތައް ހިމެނޭ ގޮތަށް އިރާނާއެކު ސޮއިކުރެވިގެން ދިޔަ ނިއުކްލިއަރ ހަކަތަ އުފެއްދުން މަދުކުރުމުގެ އެއްބަސްވުމަކީ، އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގެ ދުވަސްވަރު ސޮއިކުރެވުނު އެއްބަސްވުމެކެވެ. އޭރު ޖޯ ބައިޑެން ހުންނެވީ ނާއިބުރައީސްގެ މަގާމުގައެވެ.

އީރާންގެ ނިއުކްލިއާ މުއާހަދާގެ ނަމުން މަޝްހޫރުވެފައިވާ "ޖޮއިންޓް ކޮމްޕްރެހެންސިވް ޕްލޭން އޮފް އެކްޝަން" (ޖޭސީޕީއޯއޭ) ގައި އީރާނާ އެކުގައި ޖުލައި، 14، 2015 ގައި ސޮއިކޮށްފައިވަނީ، އދ.ގެ ސަލާމަތީ މަޖިލީހުގެ ދާއިމީ ފަސް މެމްބަރު ގައުމާއި ޖަރުމަނާއި ވިލާތުގެ އިއްތިހާދެވެ.