ހިޔާ ފްލެޓްތަކަށް ގޭސް ފޯރުކޮށްދިނުމުގެ ނިޒާމެއް ގާއިމުކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މޯލްޑިވް ގޭހާއެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި މޯލްޑިވް ގޭހުގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ ޝަޒައިލް ސިޔާމްއެވެ. އެޗްޑީސީގެ ފަރާތުން ސޮއި ކުރެއްވީ ކުންފުނީގެ މެނޭޖިން ޑިރެކްޓަރ ސުހައިލް އަހުމަދެވެ.

މިއީ މިގޮތަށް ސޯޝަލް ހައުސިން މަޝްރޫއެއްގައި ރާއްޖޭގައި ކުރާ ފުރަތަމަ މަސައްކަތެވެ. އެޗްޑީސީން ބުނީ މި މަސައްކަތް އަންނަ އަހަރުގެ ދެވަނަ ކުއާޓާގައި ނިންމުމަށް ހަމަޖެހިފައިވާއިރު މި ޚިދުމަތް ދިނުމަށް މޯލްޑިވް ގޭހާއި ހަވާލުކޮށްފައިވަނީ 20 އަހަރު ދުވަހުގެ މުއްދަތަށް ކަމަށެވެ.

މީގެ އިތުރުން އެޗްޑީސީން ބުނީ ގޭސް ފޯރުކޮށްދިނުމަށް ނިޒާމެއް ގާއިމުކުރުމަށް ނިންމާފައިވަނީ، ހިޔާ ފުލެޓްތަކަކީ ނިސްބަތުން އުސް އިމާރާތްތަކަކަށްވާތީ، ގޭސް ފުޅި އަރުވައި ބޭލުމުގައި ދިމާވާނެ ތަކުލީފުތައް ކުޑަކުރުމަށް ކަމަށެވެ. އަދި ލިފްޓުތަކުގައި ގޭސް ފުޅި އުފުލުމަކީ އެންމެ ރައްކާތެރި ގޮތެއް ނޫން ކަމަށް އެޗްޑީސީން ބުނެއެވެ.

އެޗްޑީސީން ބުނީ މި މަސައްކަތް ކުރުމަށް ހަމަޖެހިފައި ވަނީ ކޮންމެ ޓަވަރެއްގެ ތިރީގައި ސްޓޯރޭޖް ޔުނިޓްތަކެއް ގާއިމުކޮށްގެން ކަމަށެވެ. މި މަސައްކަތް ކުރެވިގެން ދާނީ އެމްއެންޑީއެފްގެ އުސޫލުތަކާ އެއްގޮތްވާގޮތުގެ މަތިންކަން އެޗްޑީސީން ފާހަގަކޮށްފައިވެއެވެ.