ކްރިމިނިލް ކޯޓުގެ ގާޒީ ހަސަން ސައީދުގެ ސުލޫކީ މައްސަލައެއް ތަހުގީގުކުރަނީ
ބަންދު މުރާޖައާކުރުމުގެ އަޑުއެހުމެއްގައި އަމަލުކުރައްވާފައިވަނީ ޖިނާއީ އިޖުރާއަތުގެ ގާނޫނާއި ޝަރީއަތްކުރުމާއިބެހޭ އިޖުރާއަތުގެ ގަވާއިދުގައިވާ އުސޫލުތަކާ ޚިލާފަށް
މީގެ ކުރިން ގާޒީ ހަސަން ސައީދާއި ގުޅޭ މައްސަލައެއްގައި އޭނާ ޖަވާބުދާރީ ވަނީ
ކްރިމިނިލް ކޯޓުގެ ގާޒީ ހަސަން ސައީދުގެ ސުލޫކީ މައްސަލައެއް ތަހުގީގުކުރަން ނިންމާފައިވާ ކަމަށް ޖުޑީޝަލް ސަރވިސް ކޮމިޝަނުން ބުނެފިއެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނީ ކްރިމިނިލް ކޯޓުގެ ގާޒީ ހަސަން ސައީދު ކްރިމިނަލް ކޯޓުގައި ބޭއްވުނު ބަންދު މުރާޖައާކުރުމުގެ އަޑުއެހުމެއްގައި އަމަލު ކުރައްވާފައިވަނީ، ޖިނާއީ އިޖުރާއަތުގެ ގާނޫނާއި ޝަރީއަތް ކުރުމާއިބެހޭ ޖިނާއީ އިޖުރާއަތުގެ ގަވާއިދުގައިވާ އުސޫލުތަކާ ކަނޑައެޅިގެން ޚިލާފަށް ކަމަށް ބުނާ މައްސަލައެއް ތަހުގީގު ކުރުމަށް ކޮމިޝަނުގެ "މައްސަލަ ބެލުމާމެދު ގޮތެއް ނިންމާ ކޮމިޓީ" އިން ނިންމާފައިވާތީ، 2021 ނޮވެންބަރު 02 ވަނަ ދުވަހު ބޭއްވި އެ ކޮމިޝަނުގެ 82 ވަނަ ޖަލްސާގައި މި މައްސަލަ ތަހުގީގު ކުރުމަށް ތަހުގީގު ކޮމިޓީ އެކުލަވާލެވިފައިވާ ކަމަށެވެ.
ފެމެލީ ކޯޓުގެ އިސް ގާޒީކަމުގައި ހުންނަވަނިކޮށް ހަސަން ސައީދު ކްރިމިނަލް ކޯޓަށް ބަދަލުކޮށްފައިވަނީ އޮކްޓޯބަރ 2019 ގައެވެ. ޖޭއެސްސީން އެއިރު ބުނެފައިވަނީ ގާޒީ ހަސަން ސައީދު ކްރިމިނަލް ކޯޓަށް ބަދަލުކުރީ ގާޒީ ސައީދުއާ ބެހޭ ގޮތުން އެ ކޮމިޝަނުން ބެލި ސުލޫކީ މައްސަލަތަކާއި ގުޅިގެން، ފަނޑިޔާރުގެ ސުލޫކަށް އަސަރުކުރާ ފަދަ ކަންތައްތަކެއް ސާބިތުވާކަމަށް ތަހުގީގު ކޮމިޓީން އެކުލަވައިލި ރިޕޯޓް ކޮމިޝަނުން ބަލައިގެންފައިވާ ކަމަށެވެ. އެ ރިޕޯޓަށް ގާޒީ ސައީދު ޖަވާބު ހުށައެޅުމުން އެއަށް ރިޔާއަތްކޮށް ނަސޭހަތް ދިނުމަށް ފަހު އޭނާ ކްރިމިނަލް ކޯޓަށް ބަދަލުކޮށްފައިވާ ކަމަށެވެ. ގާޒީ ސައީދު ކްރިމިނަލް ކޯޓަށް ބަދަލުކޮށްފައިވާއިރު، ފެމެލީ ކޯޓުތެރޭގައި ހައްޖު ގުރޫޕުގެ މަސައްކަތް ކުރަމުންދިޔަ މައްސަލައެއް ފެންމަތިވުމުން ޖޭއެސްސީން ވަނީ 2019 ވަނަ އަހަރުގެ ޖުލައި މަހު އެ މައްސަލައިގެ އަޑުއެހުން ބާއްވާފައެވެ. ހައްޖު ގުރޫޕްގެ މަސައްކަތް ކުރަމުން ދިޔަ ކަމަށް ސައީދު ވަނީ އަޑުއެހުމުގައި އިއުތިރާފްވެ ވަޑައިގަންފައެވެ.
މީގެ ކުރިން 2016 ވަނަ އަހަރު ޖޭއެސްސީން ގާޒީ ހަސަން ސައީދާ ގުޅޭ ގޮތުން ބެލި މައްސަލައެއްގައި އޭނާ ސަސްޕެންޑްވެސް ކުރިއެވެ.
