ގުރައިދޫ މަރުކަޒުގެ ހާލަތު ރަނގަޅުވުމުން ބޫސްޓަރ ޑޯޒް ޖަހަން ތައްޔާރުވެފައި

ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒުގެ ކޮވިޑް ހާލަތު ރަނގަޅުވުމުން ބޫސްޓަރ ޝޮޓް ޖެހުމަށް ތައްޔާރުވެފައިވާ ކަމަށް ޖެންޑަރ މިނިސްޓްރީން ބުނެފިއެވެ.

ޖެންޑަރ މިނިސްޓްރީގެ ބެލުމުގެ ދަށުން ހިންގަމުންދާ، ޚާއްސަ އެހީއަށް ބޭނުންވާ މީހުންގެ މަރުކަޒުން ކޮވިޑް-19ގެ ކޭސްްތަކެއް ފެނި އެތަން ލޮކްޑައުން ކޮށްފައިވަނީ އޮކްޓޫބަރ މަހުގެ 23 ވަނަ ދުވަހުއެވެ. ގުރައިދޫ މަރުކަޒުގެ މުވައްޒަފުންނާއި ބަލި މީހުން ހިމެނޭ ގޮތަށް 112 މީހަކު ކޮވިޑަށް ޕޮޒިޓިވްވެފައިވާ ކަމަށް އެ މިނިސްޓްރީން ވަނީ ބުނެފައެވެ.

އެ މަރުކަޒުގައި ތިބި 191 މީހަކު މިހާރުވަނީ ކޮވިޑް-19އިން ދިފާއުވުމަށް ޖަހާ ވެކްސިންގެ 2 ޑޯޒް ފުރިހަމަކޮށްފައެވެ. އެމީހުންނަށް ބޫސްޓަރ ޑޯޒް ދިނުމަށް ގުރައިދޫ ސިއްޙީ މަރުކަޒުގައި މިހާރު އެދިފައިވާނެ ކަމަށް ޖެންޑަރ މިނިސްޓްރީން މައުލޫމާތު ދެއެވެ. ދެވަނަ ޑޯޒް ފުރިހަމަކުރަން ޖެހޭ 7 މީހަކު އެބަތިބި ކަމަށާއި، އެމީހުންނަށް ދެވަނަ ޑޯޒް ދިނުމަށް ވެސް މިހާރު އެދިފައިވާ ކަމަށް ޖެންޑަރ މިނިސްޓްރީން މައުލޫމާތު ދެއެވެ. މަރުކަޒުގެ ހާލަތު މިނިސްޓްރީން ގެންދަނީ ވަރަށް ގާތުން މޮނިޓަރ ކުރަމުންނެވެ. އެގޮތުން ކޮވިޑް ކޭސްތައް ފެނުމާއެކު ގުރައިދޫ މަރުކަޒުގައި ތިބި މުވައްޒަފުން ވެސް ހިމެނޭ ގޮތަށް އެންމެން މިހާރު ވަނީ ކޮވިޑަށް ޓެސްޓްކޮށްފައެވެ. އަދި ގަވާއިދުން ސިއްހީ ހާލަތު މޮނިޓަރކޮށް، އިތުރު ފަރުވާދޭން ޖެހޭ މީހުންނަށް ވެސް އަންނަނީ ފަރުވާ ދެމުންނެވެ.

ޕޮޒިޓިވް ކޭސްތަކަށް އިތުރު ބަދަލެއް ނާންނަ ކަމަށް މިނިސްޓްރީން ބުނެއެވެ.

މިވަގުތު އޮތް ހާލަތު އިތުރަށް ގޯސްވިޔަ ނުދިނުމަށް އަޅަން ޖެހޭ ފިޔަވަޅުތަކާއި މަރުކަޒަށް ބޭނުންވާ ސިއްހީ ސާމާނާއި އެ ނޫންވެސް ވަސީލަތްތައް ހޯދައި އިތުރަށް ކުރަންޖެހޭ ކަންކަން ވެސް ކުރައްވާނެ ކަމަށް ޖެންޑަރ މިނިސްޓްރީން މައުލޫމާތު ދެއެވެ.