ނ. މަނަދޫ ބަނދަރު ބޭނުންކުރާނެ އައު އުސޫލު ތަކެއް ކަނޑައަޅައިފި
މުނިސިޕަލް ސަރވިސްގެ ފަރާތްތައް މެދުވެރިކޮށް އަންނަނީ ބަނދަރު ބަލަހައްޓަމުން
ނ. މަނަދޫ ބަނދަރު ސަރަހައްދު
ނ.މަނަދޫ ބަނދަރު ބޭނުންކުރާނެ އައު އުސޫލުތަކެއް މަނަދޫ ކައުންސިލުން ކަނޑައަޅާއިފިއެވެ.
މަނަދޫ ކައުންސިލުން ކޮށްފައިވާ އިއުލާނުގައިވާ ގޮތުން އާ އުސޫލަށް ޢަމަލު ކުރަން ފަށާނީ މި މަހުގެ 15 ވަނަ ދުވަހުން ފެށިގެންނެވެ.
މަނަދޫ ކައުންސިލްގެ ރައީސް އަބްދުއްރަޙްމާން ޞަބީޙް ރާއްޖެ އެމް.ވީއަށް މައުލޫމާތު ދެއްވަމުން ވިދާޅުވީ ގަވައިދަށް އަމަލުކުރުމުގެ މައިގަނޑު މަގުސަދަކީ, އުސޫލުތަކަކާއެކު ބަނދަރު ތަރުތީބު ކުރެވި, ބަނދަރު އޭގެ އެންމެ އެކަށޭނެ ގޮތުގައި ބޭނުން ކުރުން ކަމަށެވެ. ބަނދަރު ބޭނުން ކުރުމުގައި މިހާރު ވެސް ދަތިތަކެއް ހުރިކަން ފާހަގަ ކުރައްވަމުން ޞަބީޙް ވިދާޅުވީ, ބައެއް ފަރާތް ތަކުން ހިލައާއި ހިލަވެލި ފަދަ ތަކެތި ބަނދަރު މަތީގައި ބަހައްޓާފައި ހުންނަ ކަމަށާއި, މަސް ދުވަސް ވާއިރުވެސް މިތަކެތި ބަނދަރު ސަރަހައްދުން ނުނަގާ ހުންނަ ކަމަށެވެ. އަދި ސިޑި ކައިރީގައި މިފަދަ ތަކެތި ހުރުމުގެ ސަބަބުން ބަލި މީހުން އަރުވާ ބޭލުމަށް ދަތިތަކެއް ކުރިމަތިވެ، އެމްބިއުލާންސް ވެސް ކައިރި ނުކުރެވޭކަމަށެވެ. މީގެ އިތުރުން ކަށިވެލި ފަދަ ތަކެތި ބަހައްޓާއިރު ސަތަރި ނުވަތަ ތަރަފާލު ނާޅައި ކަށިވެލި އެޅުމަށްފަހު, އެ ސަރަހައްދުން ކަށިވެލި ހުސްކުރާއިރުގައި ރަނގަޅަށް ނުނެގި ހުރުމުގެ ސަބަބުން, ބަނދަރު ސަރަހައްދު ސާފުކޮށް ބަލަހައްޓާ ފަރާތްތަކަށް އުދަނގޫތަކާ ކުރިމަތިވާ ކަމަށެވެ.
މި އުސޫލުތަކުގައި މުދާ އަރުވާ ބޭލުމަށް ވަކި ގަވައިދުތަކެއް ހެދިފައިވެއެވެ. އަދި ބަނދަރުގެ ބޭނުން ކުރާ ފަރާތްތަކަށް ބަނދަރު ސާފުކުރުމަށާއި ބަނދަރަށް ލިބޭ ގެއްލުންތަށް މަރާމާތުކުރުމަށްޓަކައި ގަވައިދުތަކެއް ހެދިފައިވެއެވެ. މީގެ އިތުރުން ބަނދަރު ބޭނުން ކުރާ ފަރާތްތަކުގެ އިހުމާލުން ބަނދަރަށް ލިބޭ ގެއްލުންތަށް މަރާމާތު ނުކޮށްދީފިނަމަ އަމަލު ކުރާނެ އުސޫލާއި, މައްސަލަ ހައްލު ކުރުމަށް ހިނގާ ޚަރަދާ ގުޅޭގޮތުން ވެސް އުސޫލުތަކެއް ކަނޑައެޅިފައިވެއެވެ.
މަނަދޫ ކައުންސިލްގެ ރައީސް ޞަބީޙް ވިދާޅުވީ މުނިސިޕަލް ސަރވިސްގައި އުޅުއްވާ ފަރާތްތައް މެދުވެރިކޮށް މިހާރުވެސް މަނަދޫ ބަނދަރު ބަލަހައްޓަމުން އަންނަ ކަމަށެވެ.
