އަނިޔާތަކަކާއެކު މަރުވެފައި އޮއްވައި ފެނުނު ނައީމާގެ މަރާގުޅޭ މައުލޫމާތު އެނގޭނަމަ ހިއްސާކޮށްދިނުމަށް ފުލުހުން އެދިއްޖެ

ނ މަނަދޫގައި އަނިޔާތަކަކާއެކު މަރުވެފައި އޮއްވައި ފެނުނު ނައީމާ މޫސާގެ މަރާގުޅޭ އެއްވެސް މައުލޫމާތެއް އެނގޭނަމަ އެކަން ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓާ ހިއްސާކޮށްދިނުމަށް ފުލުހުން އެދިއްޖެއެވެ.

ނައީމާގެ ޚަބަރެއް ނުވާތާ ދެ ދުވަސް ވެގެން ފުލުހުންނަށް ރިޕޯޓްކުރީ އޭޕްރީލް މަހުގެ 7 ވަނަ ދުވަހުއެވެ. އެ ރިޕޯޓާ ގުޅިގެން ފުލުހުން އޭނާ ދިރިއުޅޭ ގެއަށް ގޮސް އެ ގެއަށް ވަނީ، އޭނާ ދިރިއުޅޭ ކޮޓަރީގެ ދޮރު ވައްޓާލައިގެން ކަމަށް ފުލުހުން ބުނެއެވެ. ފުލުހުން ބުނީ ގެއަށް ވަދެ ބެލިއިރު އޭނާ ދިރިއުޅޭ ކޮޓަރިތެރޭ ތަޅުންގަނޑުމަތީގައި އަނިޔާތަކާއެކު ނައީމާ މަރުވެފައި އޮއްވާ ފެނިފައިވާކަމަށެވެ.

ނައީމާ މޫސާގެ މަރުގައި ތުހުމަތުކުރެވޭ ކަންތައްތަކެއް ފާހަގަކުރެވިފައިވާތީ މިމައްސަލައިގެ ތަހުގީގު ކުރިޔަށް ގެންދަނީ ހޮމިސައިޑް އިންވެސްޓިގޭޝަނެއް ގޮތުގައި ކަމަށް ފުލުހުން ބުނެއެވެ. އަދި ފުލުހުންގެ ޚިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ ޚާއްޞަ ތަހުގީގު ޓީމަކާއި ފޮރެންސިކް ތަހުގީގު ޓީމެއްގެ އިތުރުން، ޕެތޮލޮޖިސްޓެއް މަނަދޫގައި މިހާރު ހަރަކާތްތެރިވަމުން އަންނަ ކަމަށްވެސް ފުލުހުން ބުނެއެވެ.

ނައީމާގެ ހަށިގަނޑު ބަލައި ތަހުލީލުތަކަށް ބޭނުންވާ ސާމްޕަލް ނެގުމަށްފަހު އިތުރަށް ޕޯސްޓްމޯޓަމް ހަދަންޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޕެތޮލިޖިސްޓް ނިންމުމުން ހަށިގަނޑު ވަނީ އާއިލާ އާ ހަވާލުކޮށްފައިކަމަށާއި، ނައީމާގެ ހަށިގަނޑު ހޮނިހިރު ދުވަހުގެ ހަވީރު 5:20ގައި ވަނީ ވަޅުލާފައިކަމަށް ފުލުހުން ބުނެއެވެ.

ނައީމާއަކީ އެރަށުގައި ކުނިކަހަން އުޅޭ މީހެކެވެ. އެ ރަށު ކައުންސިލްގެ ރައީސް އަބްދުއްރަހްމާން ސަބީހުވެސް ވިދާޅުވީ ފާއިތުވެދިޔަ ތިން މަސް ދުވަހު، ނައީމާއްތައަކީ ވޭޖް އުސޫލުން މަސައްކަތްކުރަމުން ދިޔަ މީހެއްކަމަށެވެ. ސަބީހު ވިދާޅުވީ ނައީމާއަކީ މަސައްކަތަށް ރަނގަޅު، ވަޒީފާއަށްވެސް ބަރާބަރަށް ނުކުތް މީހެއް ކަމަށެވެ. އަދި އޭނާއާމެދު އެއްވެސް ޝަކުވާއެއްވެސް ލިބިފައިނުވާކަމަށެވެ. ރަށުގައި މިފަދަ ބޮޑު ހާދިސާއެއް ހިނގާފައިވާއިރު، މިއީ ދުވަހަކުވެސް ހީކުރިފަދަ ހާލަތެއް ނޫން ކަމަށް ސަބީހު ވިދާޅުވިއެވެ.