ޖިއާންގެ މަރުގެ ބަދަލަށް 4.5 މިލިއަން ރުފިޔާ ދިނުން މަޑުޖައްސާލަން ހައިކޯޓުން އަމުރުކޮށްފި
ހައިކޯޓުން އެގޮތަށް ނިންމާފައިވަނީ 31 އޮކްޓޯބަރުގައި
ރައުޝަން ޖިއާންގެ މަރާ ގުޅިގެން އޭނާގެ މައިންބަފައިން ބޭއްވި ނޫސްވެރިންގެ ބައްދަލުވުމެއްގެ ތެރެއިން
އިމާރާތަކުން ވެއްޓުނު ސިމެންތި ބަސްތާއަކުން ޖެހުމުގެ ސަބަބުން މަރުވި ރައުޝަން ޖިއާންގެ މަރުގެ މައްސަލައިގައި ދައުވާ ލިބޭ ޑަބްލިއު ކޮންސްޓްރަކްޝަންއިން ބަދަލެއްގެ ގޮތުން 4.5 މިލިއަން ރުފިޔާ ދޭން ސިވިލް ކޯޓުން ޙުކުމް ކޮށްފައިވާއިރު، އެ ޙުކުމް ތަންފީޒު ކުރުން މަޑުޖައްސާލުމަށް ހައިކޯޓުން އަމުރުކޮށްފިއެވެ.
ސިވިލް ކޯޓުން ނިންމި ނިންމުމަކީ ޝަރުޢީ އަދި ޤާނޫނީ އުޞޫލުތަކާ ޚިލާފަށް ނިންމާފައިވާ ނިންމުމެއްކަމަށް ބުނެ، އެ ނިންމުން އިސްތިއުނާފު ކުރުމަށް އެދުމުން ހައިކޯޓުން ވަނީ އެ މައްސަލަ މިހާރު ބަލައިގެންފައެވެ. ވުމާއެކު، ސިވިލް ކޯޓުން ނިންމި ނިންމުން ހައިކޯޓުން ބާތިލު ކުރުމުގެ ފުރުސަތު ވެސް އޮތްކަން ފާހަގަކޮށް ޑަބްލިއު ކޮންސްޓްރަކްޝަން އިން ވަނީ ބަދަލު ދެއްކުން ފަސްކޮށްދިނުމުގެ އަމުރަކަށް އެދި ހައިކޯޓަށް ހުށަހަޅާފައެވެ.
ހައިކޯޓުން އެ ހުށަހެޅުމާމެދު ގޮތެއް ނިންމާފައިވަނީ 31 އޮކްޓޯބަރުގައެވެ. އެގޮތުން ހައިކޯޓުން ވަނީ ސިވިލް ކޯޓުން ކުރި ޙުކުމުގައި ވަނީ ޖިއާންގެ އާއިލާއަށް ލިބުނު ގެއްލުމުގެ ބަދަލުގެ ގޮތުގައި ލިބެންޖެހޭ 4،557،040.86 (ހަތަރު މިލިއަން ފަސް ލައްކަ ފަންސާސް ހަތްހާސް ސާޅީސް ރުފިޔުާ އަށްޑިހަ ހަ ލާރި) 31 އޯގަސްޓުން ފެށިގެން ދެ މަސް ދުވަހުގެ ތެރޭގައި ދެއްކުމަށް ކޮށްފައިވާ ޙުކުމް ތަންފީޒު ކުރުން ފަސްކުރުމަށް އަމުރުކޮށްފައެވެ.
އެގޮތަށް ނިންމަވާފައިވަނީ ހައިކޯޓުގައި މި މައްސަލަ ބައްލަވާ ފަނޑިޔާރު އަލީ ސަމީރާއި، ފަނޑިޔާރު މުޙައްމަދު ފައިސަލްގެ އިތުރުން، ފަނޑިޔާރު މުޙައްމަދު ނިޔާޒުގެ އިއްތިފާޤުންނެވެ.
އުމުރުން ހަތް އަހަރުގެ ރައުޝަން ޖިއާން މަރުވި މައްސަލައިގައި ދައުލަތުން ދައުވާކުރި ހަ މީހުންގެ ތެރެއިން ފަސް މީހުންގެ މައްޗަށް ކުށް ސާބިތުވާ ކަމަށް ކުރިމިނަލް ކޯޓުން ހުކުމް ކޮށްފައިވާއިރު، ޖަލަށްލާން ހުކުމްކުރީ ދެ ބިދޭސީއެއްގެ މައްޗަށެވެ. އޭގެ ތެރެއިން އެކަކަށް ހަ އަހަރުގެ ދުވަހުގެ ޖަލު ހުކުމެއް އިއްވާފައިވާއިރު، އަނެކަކުގެ މައްޗަށް އިއްވީ ތިން އަހަރު ދުވަހުގެ ޖަލު ހުކުމެކެވެ. އަދި އިތުރު ދެ ބިދޭސީއަކު 7،200 ރުފިޔާ އިން ޖޫރިމަނާ ކުރަން ހުކުމްކުރިއެވެ.
މީގެ އިތުރުން ޑަބްލިއު ކޮންސްޓްރަކްޝަންގެ ސީނިއަރ ސައިޓް ސުޕަވައިޒަރު ހަސަންގެ މައްޗަށް ސާބިތުވީ، މީހަކު މަރުވެ ދިޔުމުގެ އިހުމާލެއް ކުރުމުގެ ދައުވާއެވެ. އެ ދައުވާ ސާބިތުވެ އޭނާގެ މައްޗަށް 115،000 ރުފިޔާގެ ޖޫރިމަނާއެއް ވަނީ ކޮށްފައެވެ. ސިވިލް ކޯޓުގައި ކުރިއަށް ގެންގޮސްފައިވަނީ މި މައްސަލައިގައި "ވައިކޭރިއަސް ލައިބިލިޓީ" ގެ ދަށުން ގެއްލުމުގެ ބަދަލު ނަގައިދިނުން އެދި އާއިލާގެ ފަރާތުން ހުށައެޅި މައްސަލައެވެ. އެގޮތުން މި ޙާދިސާގެ ސަބަބުން ޖިއާންގެ މައިންބަފައިންނަށް ލިބުނު މާލީ އަދި ނަފްސާނީ ގެއްލުމުގެ ބަދަލު ނަގައިދިނުން ވަނީ އެދިފައެވެ.
