ރާއްޖެއަށް 15 ކިލޯގެ ކޮކެއިން އެތެރެކުރި ބްރެޒިލް އަންހެން މީހާގެ ބަންދު ދަމަހައްޓައިފި
އޭނާއަކީ އެއްވެސް ވަރަކަށް އިނގިރޭސި ދަންނަ މީހެއް ނޫން
ކްރިމިނަލް ކޯޓް- ކޯޓުން ވަނީ ލިއެކިއުންތައް ޙަވާލު ކުރުމަށް ދައުލަތަށްވެސް 3 ދުވަހުގެ މުއްދަތެއް ދީފައި
ރާއްޖެއަށް 15 ކިލޯގެ ކޮކެއިން އެތެރެކުރި ބްރެޒިލް އަންހެން މީހާގެ ބަންދު ދަމަހައްޓައިފިއެވެ.
މި މައްސަލައިގައި ރާއްޖެއަށް މަސްތުވާތަކެތި އެތެރެކުރުމުގެ ދައުވާ އުފުލާފައިވަނީ ޖެކުއެލިން ފިލެޓޯ މަންސިނި ނަމަކަށް ކިޔާ ބްރެޒިލްއަށް ނިސްބަތްވާ އަންހެނެއްގެ މައްޗަށެވެ.
އޭނާއަކީ އެއްވެސް ވަރަކަށް އިނގިރޭސި ދަންނަ މީހަކަށް ނުވާތީ ތަރުޖަމާ ކުރުމުގައި މިވަގުތު ވަނީ އެކި ކަހަލަ ދަތިތައް ކުރިމަތިވެފައެވެ. އެކަން ހޯމަ ދުވަހުގެ ދިފާއުން ވެސް ފާހަގަކޮށްފައިވާއިރު، މައްސަލަ ބައްލަވާ ގާޒީ ވިދާޅުވީ، ދެން މި މައްސަލައިގެ އަޑުއެހުމެއް ކުރިއަށް ގެންދާނީ ދިފާއީ ވަކީލާއި ދައުވާލިބޭ ފަރާތް ބައްދަލުކުރެއްވުމަށްފަހު ކަމަށެވެ. ޝަރީއަތުން ވަނީ ދައުލަތަށް ވެސް ލިއެކިއުންތައް ފޯރުކޮށްދޭން 3 ދުވަހުގެ މުއްދަތެއް ދީފައެވެ.
އޭނާގެ ބަންދު މަޖިލީހުގައި މައްސަލަ ބަލާ ފުލުހުންގެ އައިއޯވެސް ވަނީ މަންސިނީއަށް އިނގިރޭސި ބަސް ނޭންގޭކަމަށާއި، އޭނާއަށް އެނގެނީ ޕޯޗުގީޒް އަދި ސްޕެއިން ބަސްކަމަށް ވިދާޅުވެފައެވެ. އަދި އޭނާއަށް ގާނޫނީ އިންޒާރުވެސް ދީފައިވަނީ ގޫގަލް ޓްރާންސްލޭޓަރ މެދުވެރިކޮށެވެ.
މި މައްސަލައާ ގުޅޭގޮތުން އާންމުކޮށްފައިވާ މައުލޫމާތުތަކަށް ބަލާއިރު، އޭނާގެ ލަގެޖުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާ ކަމަށާއި އެތަކެތި ޓެސްޓް ކުރިއިރު ކޮކެއިންއަށް ޕޮޒިޓިވް ވެފައިވާކަމަށް ކަސްޓަމްސްއިން ބުނެފައިވެއެވެ. މި ތަކެތީގެ ބަރުދަނުގައި 3.197 ކިލޯގްރާމް ހުރި ކަމަށާއި، މަގުމަތީ އަގު 15،985،000.00 ރުފިޔާއަށް އަރާކަމަށްވެސް ވަނީ ފާހަގަކޮށްފައެވެ.
އަޑުއެހުމުގައި ދައުވާލިބޭ ޓްރާންސްލޭޓަރެއް ބައިވެރިވެފައިވާއިރު, މަންސިނީ ވަނީ އޭނާއަށް ލިބޭ ކާތަކެތި ކުޅި ކަމުން ކާން އުނދަގޫ ކަމަށާއި، ބަންދު ކުރިފަހުން މިހާތަަނަށް 12 ކިލޯ ލުއިވެފައިވާކަމަށް ބުނެފައެވެ. ޝަރީއަތުން ވަނީ އެކަންކަމާ ގުޅިގެން ބަލަންޖެހޭ ކަންކަން ދައުލަތުންވެސް ބެލުމަށް އަންގަވާފައެވެ.
ޝަރީއަތުން ވަނީ މަންސިނީ ޝަރީއަތް ނިމެންދެން ބަންދު ކުރުމަށް ނިންމެވި ނިންމެވުން ދަމަހައްޓަވާފައެވެ.
