ކޮޕް ބައްދަލުވުމަށް ޝާހިދު ވަޑައިގެންނެވީ ގަހެއް އިންދަވާފައި
ނިމިދިޔަ ހަފްތާގައި މިނިސްޓަރ ޝާހިދު ވަނީ އެމަނިކުފާނު ފުރަތަމަ މޫސުމީ ބަދަލުތަކާ ބެހޭ ބަހުސް އދގެ އާއްމު މަޖިލީހުގައި ބާއްވަވާފައި
މިނިސްޓަރ ޝާހިދު ގަހެއް އިންދަވަނީ
ކޮޕް26 ބައްދަލުވުމުގައި ބައިވެރިވެވަޑައިގަތުމަށް އިނގިރޭސިވިލާތުގެ ގްލޯސްގޯ އަށް ވަޑައިގަތުމުގެ ކުރިން އދ ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު އދގެ މައި މަރުކަޒުގައި ގަހެއް އިންދަވައިފިއެވެ.
ގަސްއިންދެވުމަށްފަހު މިނިސްޓަރ ވަނީ ސްވިޒެލެންޑްގެ އީޓީއެޗް ޒިއުރިކް ޔުނިވަރސިޓީން ހެދި ދިރާސާއަކުން ދައްކާގޮތުން ބައި ޓްރިލިއަން ގަސް އިންދައިގެން 205 ގިގަޓަނުގެ ކާބަން ކެޕްޗަރ ކުރެވޭނެކަން ހޯދިފައިވާކަމަށް ވިދާޅުވެފައެވެ. މިއީ 1960 ވަނަ އަހަރުން ފެށިގެން އިންސާނުންގެ ސަބަބުން ޖައްވަށް ދޫވި ކާބަންގެ ދެބައިކުޅަ އެއްބައެވެ.
ނިމިދިޔަ ހަފްތާގައި މިނިސްޓަރ ޝާހިދު ވަނީ އެމަނިކުފާނު ފުރަތަމަ މޫސުމީ ބަދަލުތަކާ ބެހޭ ބަހުސް އދގެ އާއްމު މަޖިލީހުގައި ބާއްވަވާފައެވެ. މިނިސްޓަރ ޝާހިދުގެ އިސްނެންގެވުމަކަށް ބޭއްވި މި ބަހުސްގައި 17 ޤައުމެއްގެ ވެރިންނާއި، ދެ ޤައުމެއްގެ ނައިބު ރައީސުން އަދި 27 ޤައުމެއްގެ ޚާރިޖީ ވަޒީރުންގެ އިތުރުން 14 ޤައުމެއްގެ ސަފީރުން ވާހަކަފުޅު ދައްކަވާފައިވެއެވެ. އަދި ހަމައެއާއެކު 6 ޤައުމަކުން ވަނީ ސަރަހައްދީ ޤައުމުތަކުގެ ފަރާތުންވެސް ވާހަކަ ދައްކާފައެވެ.
މޫސުމީ ބަދަލުތަކާ ގުޅޭ މަޝްވަރާތަކަށް ޚާއްސަ އިސްކަމެއް ދެއްވާނެކަމަށް މިނިސްޓަރ ޝާހިދު ވަނީ ވައުދުވެވަޑައިގެންފައެވެ.
މީގެއިތުރުން މިނިސްޓަރ ވަނީ ޔޫ.އެންޑޭ ފާހަގަކުރުމަށް ބޭއްވި ހަރަކާތްތަކުގައި އދގެ މައި މަރުކަޒު ހުންނަ ނިއުޔޯކްގެ ކަނިންހަމް ޕާކްގައި ބޭއްވި ގަސް އިންދުމުގެ ޕްރޮގްރާމްގައިވެސް ގަހެއް އިންދަވާފައެވެ.
