ދައުރު ނިމުމުގެ ކުރިން ބްރިޖުގެ މައިގަނޑު މަސައްކަތްތައް ނިންމޭނެ: ފައްޔާޒް

2022 ވަނަ އަހަރުގެ ނިމުމުގެ ކުރިން ތިލަމާލެ ބްރިޖުގެ މައިގަނޑު މަސައްކަތްތައް ނިމޭނެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ފައްޔާޒް ވިދާޅުވީ ގްރޭޓަރ މާލެ ކަނެކްޓިވިޓީ ޕްރޮޖެކްޓު ނުވަތަ ތިލަމާލެ ޕްރޮޖެކްޓުގެ މަސައްކަތް މިހާރު ފެށިގެން އެ ދަނީ ކަމަށެވެ. މި މަސައްކަތަކީ ގިނަ ސަރވޭތަކަކާއި، ޑިޒައިންތަކެއް ހަދައިގެން ކުރާ މަސައްކަތެއް ކަން ފާހަގަކުރައްވައި ފައްޔާޒް ވިދާޅުވީ، މިހާރު ކުރިއަށްދަނީ ބްރިޖުގެ ތަނބުތައް ޖެހުމުގެ ކުރިން ކޮންޓްރެކްޓަރުން ހަދަންޖެހޭ ސަރވޭގެ މަސައްކަތް ކަމަށެވެ.

ފައްޔާޒް ވިދާޅުވީ މި މަސައްކަތް ބިޑްކުރުމުގައި ދިމާވި ގާނޫނީ ބައެއް މައްސަލަތަކާ ގުޅިގެން މަސައްކަތް ހަވާލުކުރުމުގައި ލަސްތަކެއް ދިމާވި ކަމަށެވެ. އެހެންނަމަވެސް މިހާރު މަސައްކަތް ކުރިއަށްދާ ސްޕީޑުން ގަބޫލުކުރެވެނީ 2022 ވަނަ އަހަރުގެ ކުރިން ތިލަމާލެ ބްރިޖުގެ މައިގަނޑު މަސައްކަތްތައް ނިންމޭނެކަން ކަމަށް ފައްޔާޒް ވިދާޅުވިއެވެ. އެގޮތުން މި ދައުރު ނިމުމުގެ ކުރިން ވިލިނގިއްޔާ މާލެއާ ގުޅާލެވޭވަރު ކުރެވޭނެ ކަމަށް ފައްޔާޒް ވިދާޅުވިއެވެ.

ފައްޔާޒް ވިދާޅުވީ ބްރިޖް އެޅުމުގެ މަސައްކަތުގެ ތެރެއިން އެންމެ ބޮޑު ގޮންޖެހުމެއް ދިމާވާނީ މާލެއާ ވިލިމާލެއާ ދެމެދު ބްރިޖް އެޅުމުގައި ކަމަށެވެ. އެދެމެދުގައި ވަރަށް ބޮޑު "ޑިޕްރެޝަން"އެއް އޮންނާނެ ކަމަށާއި، އެހެންވުމުން ވަރަށް ގިނަ އުނދަގޫތަކެއް ހުންނާނެ ކަމަށް ފައްޔާޒް ވިދާޅުވިއެވެ. މިފަދަ ކަންކަން ދިމާނުވާނަމަ މި މަސައްކަތް އެއަށްވުރެވެސް އަވަސްކުރެވޭނެ ކަމަށް ފައްޔާޒް ވިދާޅުވިއެވެ.

މީގެ އިތުރުން ގުޅީފަޅުގައި ގާއިމުކުރާ ޕޯޓުގެ މަސައްކަތުގައި ގޮންޖެހުންތަކެއް ހުރިކަން ފައްޔާޒް ވަނީ ފާހަގަކުރައްވާފައެވެ. އެގޮތުން ޕޯޓު އެޅުމަށް ބިން ހިއްކުމުގައި ގޮންޖެހުންތަކެއް ހުރިކަމަށާއި, އެހެންކަމުން މި މަސައްކަތް ޓެންޑަރއަށްވެސް ހުޅުވާލާފައި ނުވާ ކަމަށް ވިދާޅުވިއެވެ.

އެހެންނަމަވެސް 2022 ވަނަ އަހަރު ނިމުމުގެ ކުރިން ޕޯޓުގެ ކޮންކްރީޓް މަސައްކަތް ނިމިގެންދާނެ ކަމަށް ފައްޔާޒް ވިދާޅުވިއެވެ. މަސައްކަތްތަކުގައި ކޮންމެވެސް ވަރެއްގެ ގޮންޖެހުމަށް ހުއްޓަސް ޕޯޓާއި، ބްރިޖުގެ މަސައްކަތްވެސް ނުހުއްޓި ކުރިއަށްދާނެ ކަމަށާއި, މި ދައުރު ނިމޭއިރު ރައްޔިތުންނަށް އެ ތަސައްވަރު ފެންނާނެ ކަމަށް ފައްޔާޒް ވިދާޅުވިއެވެ.

ގްރޭޓަރ މާލޭގެ ކަނެކްޓިވިޓީ ބްރިޖު މަޝްރޫއު ނިންމަން ލަނޑުދަނޑި ކަނޑައަޅައިފައިވަނީ، 2023 ގެ އެޕްރީލް ނުވަތަ މޭމަހާ ހިސާބަށެވެ. އަދި މި މަޝްރޫއު ނިންމައި، މި ބިޔަ ބްރިޖު ހުޅުވިގެން ދާއިރު، މި ސަރުކާރުގެ މިވަގުތުގެ ސިޔާސަތަކީ، އެއްވެސް ޓޯލެއް ނެގުމެއްނެތި، ރައްޔިތުންނަށް އެ މަގުތަކުން، ހިލޭ ދަތުރު ކުރެވޭނެ ބްރިޖަކަށް ވުމެވެ.