އެމްއައިބީގެ ސީއީއޯ ހުންނެވީ ޗުއްޓީގައި، ސަސްޕެންޑެއް ނުކުރޭ: ބޭންކް
30 އޮކްޓޯބަރު 2021 | ހޮނިހިރު 06:23ބޭންކިން ދާއިރާގައި 30 އަހަރަށްވުރެ ގިނަ އަހަރުގެ ތަޖުރިބާ ލިބިފައިވޭ
މޯލްޑިވްސް އިސްލާމިކް ބޭންކް (އެމްއައިބީ) ގެ ސީއީއޯ އަދި މެނޭޖިން ޑިރެކްޓަރު އަބްދުލް އެހްތެޝާމް އަބްދުލް މުހައިމިން
މޯލްޑިވްސް އިސްލާމިކް ބޭންކް (އެމްއައިބީ) ގެ ސީއީއޯ އަދި މެނޭޖިން ޑިރެކްޓަރު އަބްދުލް އިހްތިޝާމް އަބްދުލްމުހައިމިން ސަސްޕެންޑްކޮށްފައިވާކަމަށް މީޑިއާތަކުގައި ފަތުރާފައިވާ ޚަބަރުތައް އެ ބޭންކުން ދޮގުކޮށްފިއެވެ.
އޭނާ ސަސްޕެންޑް ކުރީ ފައިސާއާ ގުޅުންހުރި މައްސަލައެއްގައި ކަމަށާއި އޭނާ މިހާރު ރާއްޖެ ދޫކޮށް ގޮސްފައިވާކަމަށް ބައެއް ނޫސްތަކުގައި ވަނީ ރިޕޯޓު ކޮށްފައެވެ.
އެކަމާ ގުޅޭގޮތުން ރާއްޖެއެމްވީން ސުވާލު ކުރުމުން އިސްލާމިކް ބޭންކުގެ މީޑިއާ އޮފިޝަލު ވަނީ އެ ވާހަކަތައް ދޮގު ކުރައްވާފައެވެ. އޭނާ ވިދާޅުވީ، އިހްތިޝާމް މިވަގުތު ހުންނެވީ ރަސްމީ ލީވެއްގައި ރާއްޖެއިން ބޭރުގައި ކަމަށެވެ.
ބޭންކުން ވަނީ އޭނާއަށް އެއްވެސް ސަސްޕެންޝަން އޯޑަރެއް ނުވަތަ ސިޓީއެއްވެސް ދޫކޮށްފައި ނުވާކަން އެ ބޭންކުގެ ޝެއަރ ހޯލްޑަރުންނާއި، ކަސްޓަމަރުންނަށް ޔަގީން ކޮށްދީފައެވެ.
ބަންގްލަދޭޝް ރައްޔިތެއްކަމުގައިވާ މުހައިމިން މީގެ ކުރިން ވަނީ ބަންގްލަދޭޝްގައި ހުންނަ ޔުނައިޓެޑް ކޮމާޝަލް ބޭންކްގެ މެނޭޖިންގް ޑިރެކްޓަރުކަމާއި ޗީފް އެގްޒެކްޓިވް އޮފިސަރކަމުގެ މަގާމު ވެސް އަދާކުރައްވާފައެވެ.
މުހައިމިން އަކީ ބޭންކިންގެ ދާއިރާގައި 30 އަހަރަށްވުރެ ގިނަ އަހަރުގެ ތަޖުރިބާ ލިބިފައިވާ ފަރާތެކެވެ.
2019 ވަނަ އަހަރު މަޤާމާ ހަވާލުވެވަޑައިގެން ވާހަކަ ދައްކަވަމުން އޭނާ ވަނީ އެމްއައިބީއާއެކު މަސައްކަތް ކުރަން ލިބުމުން އެކަމާ އުފާކުރައްވާ ކަމަށް ވިދާޅުވެ، ރާއްޖޭގައި ބޭންކިން ހިދުމަތް ދިނުމުގެ ގާބިލުކަން އެބަހުރި ކަމަށާއި އެ ޚިދުމަތުގެ މައި ރޯލެއް އެމްއައިބީން އަދާކުރާނެ ކަމަށް ވިދާޅުވެފައެވެ.
މީގެ ކުރިން އެމްއައިބީގެ މެނޭޖިން ޑިރެކްޓަރަކަށް ހުންނެވީ ހާރިސް ހާރޫނެވެ. އޭނާ ވަނީ ބޭންކް ހުޅުވި ދުވަހުން ފެށިގެން (2009 ވަނަ އަހަރުން ފެށިގެން) 2018 ވަނަ އަހަރުގެ އޭޕްރީލް މަހާއި ހަމައަށް އެ ބޭންކްގެ މެނޭޖިން ޑިރެކްޓަރުގެ މަގާމު އަދާކުރައްވާފައެވެ.
