ނާއިބުރައީސް އައްޑޫ އާއި ފުވައްމުލަކަށް ކުރެއްވި ރަސްމީ ދަތުރުފުޅު ނިންމަވާލައްވައިފި
އެމަނިކުފާނު ފުރަތަމަ ވަޑައިގެންނެވީ ފުވައްމުލަކަށް
އައްޑޫ ސިޓީއާ ފުވައްމުލަކު ސިޓީއަށް ކުރެއްވީ 4 ދުވަހުގެ ރަސްމީ ދަތުރުފުޅެއް
ރައީސުލްޖުމްހޫރިއްޔާގެ ނާއިބު ފައިސަލް ނަސީމް، އައްޑޫ ސިޓީއާޢި ފުވައްމުލައް ސިޓީއަށް ކުރެއްވި 4 ދުވަހުގެ ރަސްމީ ދަތުރުފުޅު ނިންމަވާލައްވައިފިއެވެ.
ރައީސުލްޖުމްހޫރިއްޔާގެ ނާއިބުގެ މިދަތުރުފުޅު ނިންމަވާލައްވައި ހުކުރުދުވަހު މާލެ ވަޑައިގެންފައި ވާއިރު މިދަތުރުފުޅުގައި އެމަނިކުފާނު ފުރަތަމަ ވަޑައިގެންނެވީ ފުވައްމުލައް ސިޓީއަށެވެ. އެއަށްފަހު ދެން ވަޑައިގެންނެވީ އައްޑޫ ސިޓީއަށެވެ.
އެމަނިކުފާނުގެ މިދަތުރުފުޅުގައި ދެ ސިޓީގެ ވެސް ސިޓީ ކައުންސިލާ ބައްދަލުކުރައްވައި ކައުންސިލަރުން ފާހަގަކުރެއްވިކަންކަމާއި ތަރައްގީއަށް ބޭނުންވާ މުހިންމު ކަންކަމާގުޅޭގޮތުން މަޝްވަރާކުރެއްވިއެވެ. އަދި އެމަނިކުފާނުގެ މިދަތުރުފުޅުގައި މި ދެ ސިޓީގެ މުހިންމު ތަންތަނަށް ޒިޔާރަތްކުރެއްވުމާއެކު މި ދެ ސިޓީގައި ކުރިޔަށްދާ ސަރުކާރުގެ ތަރައްގީގެ ބައެއް މަޝްރޫއުތައް ކުރިޔަށްދާގޮތް ބައްލަވާލައްވައި ދެ ސިޓީގެ ކަމާގުޅުންހުރި އެކިއެކި ފަރާތްތަކާއެކު ބައްދަލުކުރައްވައި މަޝްވަރާކުރައްވާފައި ވެއެވެ.
ރައީސުލްޖުމްހޫރިއްޔާގެ ނާއިބުގެ މި ދަތުރުފުޅުގައި މުހިންމު އެކިއެކި އިވެންޓްތަކުގައި ވެސް ބައިވެރިވެވަޑައިގެންފައިވެއެވެ. އެގޮތުން ފުވައްމުލަކުގައި، މަސްޖިދުލްހުދާ ބިނާކުރުމުގެ އަމަލީ މަސައްކަތް ފައްޓަވައިދެއްވުމާއި އައްޑޫގެ އިކުއެޓޯރިއަލް ހޮސްޕިޓަލް (އޭ.އީ.އެޗް) ގައި ސަރވިސް އެކްސެލަންސް ޕްރޮގްރާމް ފަށްޓަވައިދެއްވުން ފާހަގަކޮށްލެއެވެ. ހަމައެހެންމެ އެމަނިކުފާނު ވަނީ މި ދެ ސިޓީގައި ވެސް ރަސްމީގޮތުން ހިފްޒު ކޮމެޓީ އިފްތިތާހު ކޮށްދެއްވާފައެވެ.
ރައީސުލްޖުމްހޫރިއްޔާގެ ނާއިބު، މި ދެ ސިޓީއަށް ކުރެއްވި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފްދެއް ބައިވެރިވެވަޑައިގެންނެވިއެވެ.
