ވޯރލްޑް ބޭންކުގެ އިސް 2 ބޭފުޅަކު ރާއްޖެއަށް!

ވޯރލްޑް ބޭންކުގެ އިސް ދެ ބޭފުޅުން ރާއްޖެ ވަޑައިގެންފިއެވެ.

ފިނޭންސް މިނިސްޓްރީން ބުނީ ވޯރލްޑް ބޭންކުގެ ވައިސް ޕްރެޒިޑެންޓް ހަރޓްވިގް ޝެއިފާ އަދި އެ ބޭންކުގެ އެގްޒެކިއުޓިވް ޑައިރެކްޓަރ ޑރ. މަރްޒާ ޙަސަން ހުކުރު ދުވަހު ރާއްޖެ ވަޑައިގެންފައިވާކަމަށެވެ. މިނިސްޓްރީ އޮފް ފިނޭންސްގެ ބޭފުޅުންނާއި، ވޯރލްޑް ބޭންކުގެ ފަރާތުން ރާއްޖޭގައި މަސައްކަތްކުރައްވާ އިސް ބޭފުޅުން ވަނީ މި ދެ ބޭފުޅުންނަށްވެސް ވެލާނާ އިންޓަރނޭޝަނަލް އެއާޕޯރޓުން މަރުހަބާ ވިދާޅުވެފައެވެ.

މި ދެ ބޭފުޅުންވެސް ރާއްޖެ ވަޑައިގެންނެވީ ރަސްމީ ދަތުރުފުޅެއްގައި ކަމަށް ފިނޭންސް މިނިސްޓްރީން ބުނެފައިވެއެވެ.

ރާއްޖެ ވަޑައިގެން ކުރެއްވި ޓްވީޓެއްގައި ވޯރލްޑް ބޭންކުގެ ވައިސް ޕްރެޒިޑެންޓް ހާޓްވިގް ޝެއިފާ ވަނީ, ދެ އަހަރު ފަހުން ރާއްޖެ ވަޑައިގެންނެވުނީތީ އުފާކުރައްވާކަމަށް ވިދާޅުވެފައެވެ. އަދި ކޮވިޑް-19އާ ގުޅިގެން ރާއްޖޭގެ އިގުތިސާދު ވެއްޓުނު އަނދަވަޅުން އަރައިގަތުމަށް ސަރުކާރުގެ ފަރާތުންނާއި، ޕްރައިވެޓް ކުންފުނިތަކުންނާއި، ސްޓޭކްހޯލްޑަރުން ކުރަމުންދާ މަސައްކަތްތަކާއި، މި މަސައްކަތްތަކުގައި ދިމާވާ ގޮންޖެހުންތައް ދެނެގަތުމަށް އުންމީދުކުރައްވާކަމަށް ވިދާޅުވިއެވެ.

ވަރަށް އަވަހަށް ރާއްޖެ ވަޑައިގަންނަވާނެކަން ހާމަކުރައްވައި ހަރޓްވިގް ދެއްވި ވީޑިއޯ އިންޓަރވިއުއެއްގައި ވިދާޅުވީ, ރާއްޖެ ވަޑައިގެންނެވުމުގެ މައިގަނޑު މަގުސަދަކަށް ވާނީ ކުރިމަގުގައި އިގްތިސާދު ކުރިއެރުވުމަށް ޑިޖިޓަލް ޓެކްނޮލޮޖީގެ ބޭނުން ހިފިދާނެ ގޮތްތަކާ މެދު މަޝްވަރާ ކުރުމަށް ކަމަށެވެ.

ކޮވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ވަރަށް ބޮޑު ނޭދެވޭ އަސަރެއް ކޮށްފައިވާކަން ފާހަގަކުރައްވައި ޝެއިފާ ވިދާޅުވީ, ރާއްޖޭގެ ފަތުރުވެރިކަން އަލުން އާރާސްތުވަމުން އަންނާތީ އެކަމާ އުފާކުރައްވާ ކަމަށެވެ. އަދި މީގެ ސަބަބުން ރާއްޖޭގެ އިގުތިސާދަށާއި ވަކިވަކި ފަރުދުންނަށް ވަރަށް ބޮޑު ހެޔޮ ބަދަލެއް އަންނާނެ ކަމަށެވެ. ޕެންޑެމިކްގެ ތެރޭގައި ރާއްޖޭގެ ސިއްހީ ނިޒާމު އިތުރަށް ހަރުދަނާ ކުރުމަށާއި، މުވައްޒަފުންނަށް އިންކަމް ސަޕޯރޓް ދިނުމަށް ވޯރލްޑް ބޭންކުން ދިން އެހީތެރިކަން ޝެއިފާ ފާހަގަ ކުރެއްވިއެވެ. މީގެ އިތުރުން ރާއްޖޭގެ އުމްރާނީ ތަރައްގީއަށް ވޯލްޑް ބޭންކުގެ ފަރާތުން ފުރިހަމަ އެހީތެރިކަން ލިބޭނެކަން ފާހަގަ ކުރެއްވިއެވެ.