ޔުގެންޑާގެ ސުކޫލުތައް ހުޅުވާލާނީ އަންނަ ޖެނުއަރީގައި

ޔުގެންޑާގެ ސުކޫލުތައް އަންނަ ޖެނުއަރީ މަހު ހުޅުވާލާނެ ކަމަށް އެ ޤައުމުގެ ރައީސް ޔުވޭރީ މުސޭވެނީ ވިދާޅުވެއްޖެއެވެ.

ކޮވިޑުގެ ސަބަބުން އެ ޤައުމުގެ ސުކޫލުތައް ބަންދު ކުރީ 2020 ވަނަ އަހަރުގެ މާރޗު މަހުގެ ތެރޭގައެވެ. އެ ޤައުމުގެ ރައީސްއާ ޙަވާލާދީ އަލްޖަޒީރާގައި ރިޕޯޓު ކޮށްފައިވާ ގޮތުން އަންނަ އަހަރުގެ ޖެނުއަރީ މަހުގެ ތެރޭގައި އެ ޤައުމުގެ ސުކޫލުތައް އަލުން ހުޅުވާލުމަށް މިހާރު ވަނީ ނިންމާފައެވެ. އަދި އިޤްތިސާދީ އެހެނިހެން ހަރަކާތްތައް ވެސް އަންނަ އަހަރުގެ ޖެނުއަރީ މަހުން ފެށިގެން އަނެއްކާވެސް ފެށިގެންދާނެ ކަމަށް މުސޭވެނީ ވިދާޅުވިއެވެ.

މުސޭވެނީ އެހެން ވިދާޅުވެފައިވާއިރު، ޔުގެންޑާގެ 45 މިލިއަނެއްހާ މީހުންގެ އާބާދީގެ ތެރެއިން ކޮވިޑް-19 ވެކްސިން ފުރިހަމަ ކުރި މީހުންގެ އަދަދު 3 މިލިއަނަށް ވެސް ނާރާ ކަމަށް އަލްޖަޒީރާގައި ރިޕޯޓު ކޮށްފައިވެއެވެ.

އެ ޤައުމުގެ ރައީސް ވަނީ އަލުން އިޤްތިސާދު ހުޅުވާލުމަށް އޮތް މަގަކީ ވެކްސިން ކަމަށް ވިދާޅުވެ، ވީހާވެސް ގިނަ މީހުން ވެކްސިން ޖެއްސެވުމަށް އެދިވަޑައިގަންނަވާފައެވެ. އެގޮތުން މިހާރުވެސް 4.7 މިލިއަނަށްވުރެ ގިނަ ޑޯޒް ވެކްސިން ހޯދާފައިވާއިރު، ކުރިއަށް އޮތް ތަނުގައި އިތުރު 23 މިލިއަން ޑޯޒް ލިބޭނެ ކަމަށް އުއްމީދު ކުރައްވާކަމަށް ރައީސް މުސޭވެނީ ވިދާޅުވެއެވެ.

އަދި ޑިސެމްބަރު މަސް ނިމެންވާއިރަށް އެ ޤައުމުން މަދުވެގެން 12 މިލިއަން މީހުން ވެކްސިން ފުރިހަމަ ކުރަންޖެހޭކަން އޭނާ ފާހަގަކުރެއްވިއެވެ. އޭނާ ވަނީ ވެކްސިން ފުރިހަމަ ނުކުރި ނަމަވެސް ސުކޫލުތަކާއި އިޤްތިސާދީ ޙަރަކާތްތަކަށް އަލުން ހުޅުވާލާނެ ކަމަށް ވިދާޅުވެ، ރައްޔިތުން އަދާ ކުރަންޖެހޭ ފަރުދީ ޒިންމާ އަދާ ކުރުމަށް ގޮވާލައްވާފައެވެ.