ފިޗުން ރާއްޖޭގެ ރޭޓިން މަތިކުރުމުން މިނިސްޓަރ އަމީރު ސަރުކާރުގެ ފަރާތުން މަރުހަބާ ވިދާޅުވެއްޖެ

ދުނިޔޭގެ އެންމެ ބޮޑު އެއް ކްރެޑިޓް ރޭޓިން އޭޖެންސީ، ފިޗް ރޭޓިންއިން ރާއްޖޭގެ ދަރަނި އަދާކުރުމުގެ ގާބިލުކަން މަތިކުރުމާއެކު ފިނޭންސް މިނިސްޓަރ އިބްރާހިމް އަމީރު ސަރުކާރުގެ ފަރާތުން މަރުހަބާ ވިދާޅުވެއްޖެއެވެ.

މިދިޔަ އަހަރުގެ ތެރޭގައި ރާއްޖޭގެ އިޤްތިޞާދަށް އައި ހީނަރުކަމާއެކު ފިޗުން ވަނީ ރާއްޖޭގެ ރޭޓީންގ "ބީ" ކެޓެގަރީން "ސީސީސީ" ކެޓެގަރީއަށް ދަށްކޮށްފައެވެ. އެހެންނަމަވެސް ރާއްޖޭގެ އިޤްތިޞާދު މިހާރު ހަލުވިކަމާއެކު ކުރިއަރަމުން އަންނާތީ ފިޗުން ވަނީ މި ރޭޓީންގ "ބީ-" އަށް މަތިކޮށްފައެވެ.

މިކަމަށް މަރުހަބާ ވިދާޅުވެ މިނިސްޓަރ އަމީރު ކުރެއްވި ޓްވީޓެއްގައި ވިދާޅުވީ ރާއްޖޭގެ ރޭޓިންގ މަތިވީ ރާއްޖޭގެ އިގްތީޞާދަށާއި ދަރަނި މެނޭޖުކުރުމަށް އައިސްފައިވާ ހެޔޮ ބަދަލުތަކުގެ ސަބަބުން ކަމަށެވެ. އަދި ރާއްޖޭގެ ދަރަނި ކުޑަކުރުމަށް ސަރުކާރުން އަޅާފައިވާ ފިޔަވަޅުތަކާއެކު ކުރިމަގުގައި ދަރަނި ކުޑަވެގެންދާނެ ކަމަށް ލަފާ ކުރެވޭ ކަމަށެވެ.

މިނިސްޓަރ އިތުރަށް ވިދާޅުވީ ރާއްޖޭގެ އިޤްތިޞާދު ހަރުދަނާކޮށް ކުރިއެރުވުމަށް ފަތުރުވެރިކަމުގެ ސިނާއަތުގެ ބެޑް ކެޕޭސިޓީ އިތުރު ކުރުމާއި، އިޤްތިޞާދަށް ފައިދާހުރި ޕްރޮޖެކްޓްތަކަށް އިންވެސްޓު ކުރުމަށް ސަރުކާރުން ޚާއްސަ ސަމާލުކަމެއް ދޭނެ ކަމަށެވެ.

ފިޗުން ބުނީ ރާއްޖޭގެ ރޭޓިނގް މަތިކުރީ ރާއްޖޭގެ ފަތުރުވެރިކަމަށާއި ދަރަނި މެނޭޖުކުރުމަށް އައިސްފައިވާ ހެޔޮ ބަދަލުތަކުގެ ސަބަބުން ކަމަށެވެ. އަދި ރާއްޖޭގެ ފަތުރުވެރިކަން އަންދާޒާކުރި ވަރަށްވުރެ މާއަވަހަށް ރަނގަޅުވަމުން އަންނަކަން ކަމަށާއި، ޕެންޑެމިކްގެ ކުރިން ހުރި ވަރާއި އަޅާބަލާއިރު މިއަހަރުގެ ތެރޭގައި ފަތުރުވެރިކަމުގެ ސިނާއަތް 70 އިންސައްތައަށް އިޔާދަކުރެވިފައިވާ ކަމަށެވެ. އަދި 2023 ވަނަ އަހަރު ރާއްޖޭގެ ފަތުރުވެރިކަން ކޮވިޑްގެ ކުރިން ހުރި ހާލަތަށް ދާނެ ކަމަށް ފިޗުން ލަފާކުރިއެވެ.

މީގެ އިތުރުން ރާއްޖެއިން ވިއްކާފައިވާ ސުކޫކުގެ ސަބަބުން ދަރަނި އަދާކުރުމުގެ ގާބިލުކަމަށް ހެޔޮ ބަދަލުތަކެއް އައިސްފައިވާ ކަމަށް ވެސް ފިޗުގެ ރިޕޯޓުގައި ބަޔާންކޮށްފައިވެއެވެ.

ފިޗުން އަންދާޒާ ކުރާ ގޮތުގައި ރާއްޖޭގެ އިޤްތިޞާދު މިއަހަރުގެ ތެރޭގައި 29.4 އިންސައްތަ ކުރިއަރާނެއެވެ. އަދި މިއަންނަ އަހަރުގެ ތެރޭގައި 10 އިންސައްތައިގެ ކުރިއެރުމެއް ރާއްޖޭގެ އިޤްތިޞާދަށް ލިބޭނެ ކަމަށް ފިޗުން ލަފާކުރެއެވެ.

ރާއްޖޭގެ ރޭޓިންގް މަތިކުރުމަށް ފަހު ފިޗުން ނެރުނު ރިޕޯޓްގެ ލިންކް؛Fitch Upgrades the Maldives to 'B-'; Outlook Stable (fitchratings.com)