ކޮވިޑްގެ އެކްޓިވް ކޭހުގެ އަދަދު 1700ށް
ފާއިތުވި 24 ގަޑިއިރު 128 މީހަކު ވަނީ ކޮވިޑް-19ށް ޕޮޒިޓިވްވެފައި
ކޮވިޑްއަށް ޓެސްޓު ކުރުމަށް ސާމްޕަލް ނެގުން
ކޮވިޑް-19ގެ އެކްޓިވް ކޭހުގެ އަދަދު 1700ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު, ފާއިތުވި 24 ގަޑިއިރު 128 މީހަކު ވަނީ ކޮވިޑް-19ށް ޕޮޒިޓިވްވެފައެވެ. އޭގެތެރެއިން މާލެ ސަރަހައްދުން ޕޮޒިޓިވްވީ 35 މީހުންނެވެ. އަތޮޅުތަކުން 66 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން 27 މީހުން ވަނީ ކޮވިޑަށް ޕޮޒިޓިވްވެފައެވެ. 29 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
ރާއްޖެއިން މުޅި ޖުމްލަ 87،487 މީހުން ވަނީ ކޮވިޑަށް ޕޮޒިޓިވްވެފައެވެ. މީގެތެރެއިން 85،531 މީހުން ވަނީ ބަލިން ރަނގަޅުވެފައެވެ. އަދި 243 މީހުން ވަނީ މިބަލީގައި ނިޔާވެފައެވެ.
ރާއްޖެއިން ފެންނަ ކޭސްތައް އެއްވަރެއްގައި ހިފެހެއްޓިފައި އޮތުމަށްފަހު އަނެއްކާވެސް މިވަނީ ކޭސްތައް މައްޗަށް ދާން ފަށާފައެވެ. މިގޮތުން މިމަހުގެ 23 ވަނަ ދުވަހު މުޅި ރާއްޖެއިން ޕޮޒިޓިވްވި މީހުންގެ ޖުމްލަ ވަނީ 225އަށް އަރާފައެވެ. އޭގެފަހުން މިމަހުގެ 24 ވަނަ ދުވަހު 92 މީހުން ކޮވިޑަށް ޕޮޒިޓިވްވެފައިވެއެވެ. އޮކްޓޯބަރ މަހުގެ 25 ވަނަ ދުވަހު 149 މީހުން ކޮވިޑަށް ޕޮޒިޓިވްވިއިރު 26 ވަނަ ދުވަހު އެއަދަދު ހުރީ 115 ގައެވެ. އަދި 27 ވަނަ ދުވަހު ވަނީ 173 މީހުން ކޮވިޑަށް ޕޮޒިޓިވްވެފައެވެ.
