ކުރިއަށްއޮތް ދެ އަހަރު ރާއްޖެއިން ފަތުރުވެރިކަމާއި އިންވެސްޓެމެންޓުގެ ބޮޑު "ޖަމްޕެއް" ޖަހާނެ: މައުސޫމް
ރާއްޖޭގެ 18 ރަށެއް ވަނީ އިންވެސްޓަރުންނަށް ހުޅުވާލާފައި
ޓުއަރިޒަމް މިނިސްޓަރ ޑރ. އަބްދުﷲ މައުސޫމް އިންވެސްޓްމެންޓް ފޯރަމްގައި ވާހަކަދައްކަވަނީ
2022 އަދި 2023 ވާނީ ރާއްޖެއިން އިންވެސްޓްމެންޓުގެ ގޮތުންނާއި، ފަތުރުވެރިކަމުގެ ގޮތުން ވެސް ބޮޑު ޖަމްޕެއް ޖަހާނެ ދެ އަހަރަށް ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ދުބާއީގައި ކުރިއަށްދާ ވޯލްޑް އެކްސްޕޯއާ ގުޅޭގޮތުން ރާއްޖެއެމްވީއަށް ދެއްވި ޚާއްސަ އިންޓަރވިއުއެއްގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ މި އެކްސްޕޯގެ ތެރެއިން ރާއްޖެ ވަރަށް ބޮޑަށް އިންވެސްޓަރުންނަށް ހުޅުވާލާފައިވާކަމަށެވެ. މިގޮތުން ފަތުރުވެރިކަމުގެ އެކި ކަންކަމަށް އިންވެސްޓުކުރުމަށާއި، ރިސޯޓުތައް ތަރައްގީކުރުމަށް ރާއްޖޭގެ 18 ރަށެއް ހުޅުވާލާފައިވާކަމަށް މިނިސްޓަރ ވިދާޅުވިއެވެ.
މިގޮތުން އެކްސްޕޯގެ ތެރެއިން އެކި ފަހަރުމަތިން ރަށްތަކާ ބެހޭ މައުލޫމާތު ވެސް ހިއްސާކުރެވިގެންދާނެ ކަމަށް މިނިސްޓަރ ވިދާޅުވިއެވެ. އެގޮތުން އަންނަ އަހަރުގެ ޖެނުއަރީ މަހުގެ 2 ވަނަ ހަފްތާގެ ތެރޭގައި މި ރަށްތައް އިތުރަށް ޕްރޮމޯޓްކުރުމަށް މައުލޫމާތު ދިނުން ކުރިއަށްދާނެ ކަން މިނިސްޓަރ ފާހަގަކުރެއްވިއެވެ.
މިނިސްޓަރ މައުސޫމް ވިދާޅުވީ މިހާރު ހުޅުވާލާފައި އޮތް ރަށްތަކުގެ އިތުރުން އިތުރު ރަށްތައް ވެސް އެކްސްޕޯއަށް ހުޅުވާލެވިގެންދާނެ ކަމަށެވެ. މި މަސައްކަތަކީ ރަށްރަށުގެ ކައުންސިލްތަކާ ވެސް ގުޅިގެން ކުރާ މަސައްކަތެއް ކަމަށާއި، ރަށްތައް ހުޅުވާލާފައިވަނީ ޓޫރިޒަމްގެ އިންވެސްޓްމެންޓުތައް ބޭނުންވާ ސަރަހައްދުތަކަށް ބަލައިގެން ކަމަށް ވިދާޅުވިއެވެ. ހދ. އަތޮޅަށް ފަތުރުވެރިކަމުގެ އިންވެސްޓްމެންޓުތައް ގެނެވޭނެކަމަށް ރައީސުލްޖުމްހޫރިއްޔާ ވިދާޅުވި ވިދާޅުވުމަށް ބާރުދެއްވައި މިނިސްޓަރ ވިދާޅުވީ ހއ. އަދި ހދ. އަތޮޅުން ވެސް ރަށްތަކެއް އެކްސްޕޯއަށް ހުޅުވާލާފައިވާކަމަށެވެ.
މިއާއެކު ރާއްޖެއަށް އިތުރު އިންވެސްޓްމެންޓުތައް އަންނާނެ ކަމަށް ގަބޫލުކުރައްވާކަމަށް މިނިސްޓަރ ވިދާޅުވިއެވެ. މިހާރު ރާއްޖެ މިއޮތީ ވަރަށް ބޮޑަށް ހަމަހިމޭން ވެފައި ކަމަށާއި، މިވަގުތު ދުނިޔޭގައި ތިބި ފައިސާވެރިން ތިބީ މިފަދަ ފުރުސަތަކަށް ވަރަށް ބޮޑަށް ބަލަބަލައި ކަމަށް މިނިސްޓަރ ވިދާޅުވިއެވެ. އެހެންކަމުން 2022 އަދި 2023 ވާނީ އިންވެސްޓްމެންޓުގެ ގޮތުންނާއި، ފަތުރުވެރިކަން ގޮތުން ވެސް ބޮޑު ޖަމްޕެއް ޖަހާނެ ދެ އަހަރަށް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ދުބާއީ އެކްސްޕޯއަކީ ދިގު މުއްދަތަކަށް ދެމިގެންދާ އެކްސްޕޯއަކަށްވުމުން މި ރަށްތަކަށް ބިޑް ކުރުމަށާއި، ރަށްތައް ބަލާލުމަށް ވެސް ދިގު މުއްދަތެއް ލިބިގެންދާނެ ކަމަށް މިނިސްޓަރ ވިދާޅުވިއެވެ. މިއާއެކު ގިނަ އިންވެސްޓަރުން ލިބުމަށް މަގުފަހިވާނެ ކަމަށް ވިދާޅުވިއެވެ.
މި ރަށްތަކަށް ބިޑު ހުށަހަޅާއިރު ވެސް ރާއްޖޭގެ އިންވެސްޓަރުންނާއި، ބޭރުގެ އިންވެސްޓަރުން ގުޅިގެން ބިޑު ކުރާނެ ކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ. އަދި ރަށްތައް ހެދި 2024 ގެ ތެރޭގައި ރަށްތައް ހުޅުވާލެވޭނެ ކަމަށް ވެސް އުންމީދުކުރައްވާކަމަށް މިނިސްޓަރ ވިދާޅުވިއެވެ.
