އިންޓަރނޭޝަނަލް ޕާލަމެންޓް ފޯރ ޓޮލަރެންސް އެންޑް ޕީސްގައި ބައިވެރިވުމަށް ރައްޔިތުންގެ މަޖިލީހުން ފާސްކޮށްފި
27 އޮކްޓޯބަރު 2021 | ބުދަ 08:35އެމްއޯޔޫގައި ސޮއިކުރުމަށް މަޖިލީހުން ފާސްކޮށްފައިވަނީ 48 މެމްބަރުންގެ ވޯޓުން
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އިންޓަރނޭޝަނަލް ޕާލަމެންޓް ފޯރ ޓޮލަރެންސް އެންޑް ޕީސްގައި ބައިވެރިވުމަށް ރައްޔިތުންގެ މަޖިލީހުން ފާސްކޮށްފިއެވެ.
މިޖަމުޢިއްޔާއާއެކު މެމޮރަންޑަމް އޮފް އަންޑަރސްޓޭންޑިންގައި ސޮއިކުރުމަށް މަޖިލީހުން ފާސްކޮށްފައިވަނީ 48 މެމްބަރުންގެ ވޯޓުންނެވެ. މިޖަމުޢިއްޔާގެ މައިގަނޑު މަސައްކަތަކީ ދުނިޔޭގެ ސުލްޙަ މަސަލަސްކަމަށް ދިމާވާ ގޮންޖެހުންތައް ޙައްލުކުރުމުގެ ގޮތުން، ސުލްޙައިގެ ސަޤާފަތެއް ފެތުރުމަށް މަސައްކަތްކުރުމެވެ.
އިންޓަރނޭޝަނަލް ޕާލަމެންޓް ފޯރ ޓޮލަރެންސް އެންޑް ޕީސް އަކީ ގްލޯބަލް ކައުންސިލް ފޯރ ޓޮލަރެންސް އެންޑް ޕީސް ގެ ލެޖިސްލޭޓިވް ބޮޑީއެވެ. މި ޖަމުޢިއްޔާގައި ދުނިޔޭގެ 70 އަށްވުރެ ގިނަ ޕާލަމެންޓް މެންބަރުން ހިމެނެއެވެ. ގްލޯބަލް ކައުންސިލް ފޯރ ޓޮލަރެންސް އެންޑް ޕީސް އަކީ މޯލްޓާގައި 2017 ވަނަ އަހަރު އުފެދުނު ނޮން- ގަވަރންމެންޓަލް އޯގަނައިޒޭޝަނެކެވެ. މި ޖަމުޢިއްޔާގެ މައިގަނޑު އަމާޒަކީ ދުނިޔޭގައި ސުލްޙަ އާއި އަމަންއަމާންކަން ފެތުރުމަށް މަސައްކަތްކުރުމެވެ.
މި ޖަމުޢިއްޔާއިން ދުނިޔޭގައި ސުލްޙައިގެ ސަޤާފަތް ފެތުރުމަށް ކުރަމުންދާ މައިގަނޑު މަސައްކަތްތަކުގެ ތެރޭގައި ތަފާތުކުރުމާއި ނަސްލީ އިމްތިޔާޒު، އަދި ހަރުކަށިފިކުރާ ދެކޮޅަށް މަސައްކަތްކުރުމާއި، ބައިނަލްއަޤްވާމީ ސުލްހަ މަސަލަސްކަމާއި ސަލާމަތީ ޚިދުމަތްތައް ހަރުދަނާކުރުމާއި، ހުރިހާ އެންމެންނަށް ވެސް ރަނގަޅު ދިރިއުޅުމެއް ފޯރުކޮށްދެވޭނެ އުސޫލްތައް ކުރިއެރުވުމާއި، އިންސާނީ ހައްޤުތަކާއި މިނިވަންކަމުގެ ސަގާފަތް ކުރިއެރުވުމުގެ އިތުރުން ދެމެހެއްޓެނިވި ތަރައްގީ އިތުރުކޮށް، ކުރިއަރަމުން އަންނަ ގައުމުތަކަށް އިންސާނީ އެހީތެރިކަން ފޯރުކޮށްދެވޭނެ ގޮތްތައް ގިނަކުރުން ހިމެނެއެވެ.
ޖަމުޢިއްޔާގެ ޕާޓްނަރުންގެ ތެރޭގައި އިންޓަރ-ޕާލަމެންޓަރީ ޔޫނިއަން (އައި.ޕީ.ޔޫ.) އާއި، ޔުނައިޓެޑް ނޭޝަންސް ޕޮޕިއުލޭޝަން ފަންޑް (ޔޫ.އެން.އެފް.ޕީ.އޭ) އާއި، ޔުނައިޓެޑް ނޭޝަންސް އޭލިއަންސް އޮފް ސިވިލައިޒޭޝަނާއި، ޔުނިވަރސަލް ޕީސް ފެޑަރޭޝަނުގެ އިތުރުން ޔުނިވަރސިޓީ އޮފް ޕީސް ވެސް ހިމެނެއެވެ.
